وزیراعظم شہباز شریف دا آذربائیجان نال تعلقات مضبوط کرݨ دا عزم، آذربائیجان پاکستان اچ 2 ارب ڈالر دی سرمایہ کاری کریسی

لاچین۔ 29 مئی (اے پی پی) وزیراعظم محمد شہباز شریف آکھیا جو پاکستان تے آذربائیجان وچال مختلف شعبیاں اچ تعلقات مضبوط کرݨ دا پکا ارادہ اے، اساں آذربائیجان نال تجارت، دفاع، تعلیم، صحت سودھے مختلف شعبیاں اچ آپسی تعاون کوں ودھیسوں۔ آذربائیجان پاکستان اچ 2 ارب ڈالر دی سرمایہ کاری کریسی۔ انہاں اے گالھ خمیس کوں اتھاں آذربائیجان دا دورہ پورا کرݨ دے بعد تاجکستان روانگی توں پہلے لاچین ایئرپورٹ تے میڈیا نال گالھ مہاڑ کریندیں ہوئیں آکھی۔وزیراعظم پاکستان تے آذربائیجان کیتے 28 مئی دی اہمیت بیان کریندیں ہوئیں آکھیا جو اے ہک اہم ڈینھ اے، 28 مئی 1998 کوں پاکستان ایٹمی دھماکے کیتے تے ایٹمی طاقت آلا ملک بݨیا، اے بھرا ملک آذربائیجان دی آزادی دا ݙینھ وی اے۔ انہاں آکھیا جو صدر الہام علیوف دی قیادت اچ آذربائیجان مکمل طور تے بدل گئے اتے شاندار ترقی کیتی اے۔ انہاں آکھیا جو دورے اچ اساں تجارت، سرمایہ کاری، کاروباری شعبے اچ سانجھے کم بارے تفصیلی گالھ مہاڑ کیتی اے۔ انہاں ݙسایا جو صدر الہام علیوف پاکستان اچ 2 ارب ڈالر دی سرمایہ کاری کرݨ دا ارادہ کیتے جڈانجو اساں سانجھے مفادات کیتے اے سرمایہ کاری کرݨ کیتے تیار ہیسے۔ وزیراعظم آکھیا جو اساں تجارت، دفاع، تعلیم اتے صحت سودھے ٻئے شعبیاں اچ آپسی تعاون کوں ودھیسوں۔ایندے بعد وزیراعظم محمد شہباز شریف آذربائیجان دا ترائے ڈینہاں دا دورہ پورا کرݨ دے بعد تاجکستان دے دارالحکومت دوشنبہ کیتے روانہ تھیے تاں لاچین دے بین الاقوامی ہوائی اڈے تے آذربائیجان دے نائب وزیر خارجہ ایلنور مامیدوف، آذربائیجان اچ پاکستان دے سفیر قاسم محی الدین اتے ٻئے سفارتی عملے انہاں کوں رخصت کیتا۔ وزیراعظم آپݨے دورہ آذربائیجان اچ آذربائیجان دے صدر الہام علیوف نال ملاقات کیتی۔ انہاں پاکستان۔ ترکیہ۔ آذربائیجان ترائے پاسے دے سربراہی اجلاس اچ وی شرکت کیتی۔ انہاں آذربائیجان دے یوم آزادی دی تقریب اچ وی شرکت کیتی۔ وزیراعظم دوشنبہ وچ گلیشیئرز دے تحفظ بارے تھیوݨ آلی بین الاقوامی کانفرنس وچ شرکت کریسن۔