فرانس پاکستان دا ہک اہم ترقیاتی شراکت دار اے، احد خان چیمہ

اسلام آباد۔ 29 مئی (اے پی پی )وفاقی وزیر اقتصادی امور احد خان چیمہ آکھیے جو فرانس توانائی، شہری ترقی، بلدیاتی خدمات اتے ٹیکنالوجی دے شعبیں وچ پاکستان دا ہک اہم ترقیاتی شراکت دار رہیے۔ انہاں آکھیے جو فرانسیسی ترقیاتی ادارے (AFD) دے تعاون نال ایں ویلھے 14 منصوبے جاری ہن جݙاں جو مزید 7 منصوبے منظوری دے مرحلے وچ ہن۔ اے ڳالھ انہاں خمیس کوں پاکستان وچ فرانس دے سفیر نکولس گالے نال ملاقات وچ آکھی۔ ملاقات وچ ݙوہیں ملکاں وچال معاشی تعاون ودھاوݨ اتے جاری تے آوݨ آلے ترقیاتی منصوبیاں تے ڳالھ مہاڑ کیتی ڳئی۔ ملاقات وچ فرانسیسی ترقیاتی ایجنسی دے کنٹری ڈائریکٹر وینسینٹ تھیونو وی موجود ہن۔وفاقی وزیر فرانسیسی حکومت اتے فرانس دی ترقیاتی ایجنسی دا پاکستان کیتے مسلسل امداد تے شکریہ ادا کریندے آکھیے جو 2008 توں فرانس خاص طور تے توانائی، شہری ترقی، بلدیاتی خدمات اتے ٹیکنالوجی دے شعبیں وچ پاکستان دا ہک اہم ترقیاتی شراکت دار رہیے۔ انہاں ݙسایا جو ایں ویلھے فرانسیسی ترقیاتی ایجنسی دے تعاون نال 14 منصوبے جاری ہن، جݙاں جو مزید 7 منصوبے منظوری دے مرحلے وچ ہن جنہاں دی وختی منظوری دی امید اے۔ وفاقی وزیر گلگت بلتستان اتے خیبرپختونخوا وچ دیہی ترقی و موسمیاتی موزونیت دے منصوبے دی اہمیت تے زور ݙتا۔ ایں منصوبے دے تحت 216 پیوݨ دے صاف پاݨی دیاں سکیماں، 70 پائپڈ سیوریج سسٹم، 1200 توں 1300 کلو واٹ تئیں مائیکرو ہائیڈرو پاور یونٹس دی تنصیب، 3,000 گھراں دی مرمت اتے 700 گھراں دی توانائی بچاوݨ آلے انداز وچ نویں تعمیر شامل اے۔ انہاں پنجاب دے وݙے شہراں کیتے سیوریج دے نظام دی بہتری دے منصوبیں دی وی تعریف کیتی اتے امید ظاہر کیتی جو اے منصوبہ وی وختی فائنل تھی ویسی۔ انہاں خاص طور تے لاہور کیتے 120 ملین یوروز مالیت دا بابو صابو ویسٹ واٹر ٹریٹمنٹ پلانٹ منصوبہ شہری صفائی دے حوالے نال اہم قرار ݙتا۔فرانسیسی سفیر حکومت پاکستان دیاں ترقیاتی ترجیحات کیتے فرانس اتے فرانسیسی ترقیاتی ادارے دی پوری حمایت دا یقین ݙیوایا اتے آکھیے جو فرانس پاکستان نال پراݨی شراکت داری کوں قدر دی نگاہ نال ݙیکھدے اتے جامع ترقی، موسمیاتی بہتری اتے پائیدار بنیادی ڈھانچے کیتے تعاون جاری رکھیسی۔ وفاقی وزیر لاہور اتے فیصل آباد دے پاݨی و صفائی دے منصوبیں کیتے ݙتی ڳئی گرانٹ تے فرانسیسی حکومت دا شکریہ ادا کیتا۔ انہاں یورپی یونین دی جی ایس پی پلس سہولت وچ فرانس دی حمایت دی تعریف کریندے آکھیے جو اے سہولت پاکستان دیاں برآمدات ودھاوݨ کیتے ٻہوں اہم اے۔ ݙوہں فریقین سانجھے معاشی تعاون کوں مزید مستحکم بݨاوݨ اتے پائیدار ترقی و موسمیاتی اہداف کوں اڳوں ودھاوݨ دے عزم دا اعادہ کیتا