وزارت ریلوے اچ پری بجٹ میٹنگ ، ریلوے نظام دی ڈیجیٹلائزیشن تے غور

اسلام آباد ۔ 29 مئی (اے پی پی) وزارت ریلوے اچ پری بجٹ میٹنگ دا انعقاد کیتا ڳئے جئیں اچ ریلوے نظام دی ڈیجیٹلائزیشن دے حوالے نال اہم امور تے غور کیتا ڳئے۔ اجلاس دی صدارت وزیر ریلوے محمد حنیف عباسی کیتی۔ وزیر ریلوے محمد حنیف عباسی ایں موقع تے آکھیے جو حکومت دی ترجیح اے جو ریلوے نظام کوں مکمل طور تے ڈیجیٹل کر تے مسافراں کوں جدید، شفاف اتے مؤثر سہولتاں ݙتیاں ونڄن۔ انہاں ݙسائے جو 2025 توں 2030 تئیں سانڳے ریلوے دی ڈیجیٹلائزیشن دا تفصیلی فریم ورک تیار کر ڳھدا ڳئے جئیں کوں اڳلے بجٹ اچ ترجیحی بنیاداں تے شامل کیتا ویسی۔اجلاس اچ فیصلہ کیتا ڳئے جو ریلوے انفراسٹرکچر دی جدید کاری اتے اپ گریڈیشن کیتے مناسب مالی وسائل مختص کیتے ویسن تاں جو نظام دی کارکردگی اتے خدمتاں اچ نمایاں بہتری ممکن تھی سڳے۔ گورنمنٹ ٹو گورنمنٹ اتے پبلک پرائیویٹ پارٹنرشپ دے تحت شراکت داری دے منصوبیاں کوں ودھارا ݙتا ویسی تاں جو نجی شعبے دی شمولیت نال ریلوے دے شعبے دی ترقی ممکن تھی سڳے۔ ایں توں انڄ پورے ملک اچ ای ٹکٹنگ سسٹم دی توسیع کیتے بجٹ اچ خاص فنڈز مختص کیتے ویسن تاں جو مسافراں کوں سوکھی، تکھی اتے شفاف ٹکٹنگ سہولت مل سڳے۔ ایں دے نال نال “رابطہ” ایپ دی ترقی اتے بہتری کیتے وی مالی معاونت ݙتی ویسی تاں جو عوام کوں ریلوے خدمتاں دا ݙسایا ونڄ سڳے۔ ریلوے سٹیشنز، فٹ اوورز اتے پُلاں دی برانڈنگ کیتے وی سرمایہ کاری کیتی ویسی تاں جو ریلوے دے عوامی انفراسٹرکچر دی خوبصورتی اتے سڄاݨ اچ ودھارا تھیوے۔ ایں دے علاوہ ریلوے عملے دی صلاحیت سازی اتے تربیتی پروگرامز کیتے مالی معاونت ݙتی ویسی تاں جو عملہ جدید تقاضیں نال ہم آہنگ ہووے۔ وزیر ریلوے عوامی شفافیت اتے ڈیجیٹل شمولیت کوں ودھاوݨ کیتے مختلف اقدامات دی وی منظوری ݙتی تاں جو ہر شہری کوں ریلوے خدمتاں تئیں مساوی رسائی حاصل ہووے۔ منصوبیں دی پیشرفت دی باقاعدہ مانیٹرنگ اتے جائزہ کیتے وی وسائل مختص کیتے ویسن تاں جو مقررہ اہداف ویلھے تے ڳھدے ونڄ سڳن۔ وزیر ریلوے محمد حنیف عباسی زور ݙتے جو 2025 توں 2030 تئیں ریلوے دا ڈیجیٹل انقلاب پاکستان دی ٹرانسپورٹ دی تاریخ اچ ہک نواں باب رقم کریسی اتے ایں مقصد کیتے بجٹ دی ویلھے تے منظوری ٻہوں ضروری اے۔