جمہوریت دے تسلسل اتے اداریں دے استحکام کیتے آپسی ہم آہنگی ضروری اے، آصف علی زرداری

لاہور ۔ 29 مئی (اے پی پی) صدر مملکت آصف علی زرداری آکھیے جو جمہوریت دے تسلسل اتے اداریں دے استحکام کیتے آپسی ہم آہنگی دا ودھارا ضروری اے، عوامی مسئلیں دے دیرتئیں حل کیتے سارے طبقیں نال مشاورت اتے تعاون نال اڳوں ودھݨا ہوسی۔اے ڳالھ انہاں گورنر ہاؤس لاہور اچ پیپلز پارٹی جنوبی پنجاب دے رہنماواں نال ملاقات اچ آکھی۔ ایں موقع تے گورنر پنجاب سردار سلیم حیدر، پیپلز پارٹی جنوبی پنجاب دے رہنما چوہدری ذکا اشرف، ممتاز علی چانگ، مخدوم شہاب الدین اتے رکن قومی اسمبلی مخدوم طاہر موجود ہن۔ ملاقات اچ جنوبی پنجاب کوں پیش آندے پراݨے مسئلیں اتے ݙوجھے معاملیں تے صدر مملکت کوں ݙسایا ڳئے۔ صدر آصف علی زرداری جمہوری اقدار دے استحکام اچ ساریاں سیاسی طاقتاں دے کردار دی تعریف کیتی ۔ انہاں آکھیے جو نینگر نسل ساݙا سرمایہ اے، انہاں دی تعلیم و تربیت اتے شراکت نال ہی ہک خوشحال پاکستان دی بنیاد رکھی ونڄ سڳدی اے، وفاق دی سطح تے ساریاں اکائیاں کوں رلے گھن تے چلݨ، صوبیں نال تعاون کوں ودھاوݨا اتے شہریاں دی فلاح و بہبود کوں یقینی بݨاوݨا ملکی مفاد دا تقاضا اے۔ وفد صدر مملکت کوں فیصل آباد، گجرات اتے حافظ آباد سودھے وسطی پنجاب دے ݙوجھے ضلعیں دے عوام کوں پیش آندے مسئلے ݙسائے اتے نینگراں دی صلاحیتاں کوں قومی ترقی دے دھارے اچ گھن آوݨ دے حوالے نال تجویزاں وی پیش کیتیاں۔ صدر مملکت آکھیے جو ملک دے سارے خطیں اچ مساوی ترقی، قومی یکجہتی اتے جمہوری اداریں دی مضبوطی پہلی ترجیح اے ۔ ایں دوران رکن پنجاب اسمبلی انعام لالیکا، چوہدری اویس، پیپلز پارٹی دے رہنما نوازش علی پیرزادہ، میاں عامر، اتحاد ملازمین او جی ڈی سی ایل دے صدر زاہد بھٹو اتے مائرہ ہاشمی تے مشتمل وفد وی گورنر ہاؤس لاہور اچ صدر آصف علی زرداری نال ملاقات کیتی جئیں اچ ملک دے مختلف سیاسی و سماجی مسئلیں تے ڳالھ مہاڑ کیتی ڳئی۔ صدر مملکت آکھیے جو پاکستان دی ترقی و استحکام کیتے ضروری اے جو سارے شعبے، سیاسی و سماجی طاقتاں رلے کم کرن، اساں ساریں دا مقصد عوام دی خدمت اتے ملک دی بہتری ہووݨی چاہیدی اے۔ انہاں آکھیے جو کارکناں دے حقوق دا تحفظ اتے نینگراں کوں بااختیار بݨاوݨ کیتے مربوط حکمت عملی اپناوݨ لازم اے۔