کشمیر دا کوئی سودا ممکن نئیں، کݙاہیں وی کشمیر کوں نئیں بھل سڳدے، پاݨی پاکستان دی ریڈ لائن اے، 24 کروڑ پاکستانیاں دے بنیادی حق تے ہتھ نا آوݨ ݙیسوں، آرمی چیف فیلڈ مارشل سید عاصم منیر

اسلام آباد۔29مئی(اے پی پی)آرمی چیف فیلڈ مارشل سید عاصم منیر آکھیے جو کشمیر دا کوئی سودا ممکن نئیں، کݙاہیں وی کشمیر کوں نئیں بھل سڳدے، پاݨی پاکستان دی ریڈ لائن اے، 24 کروڑ پاکستانیاں دے بنیادی حق تے ہتھ نا آوݨ ݙیسوں۔ آئی ایس پی آر آکھیے جو فیلڈ مارشل اے ڳالھ مختلف جامعات دے وائس چانسلرز، پرنسپلز اتے سینئر استاداں نال ڳالھ مہاڑ کریندے آکھی۔ سید عاصم منیر آکھیا جو استاد پاکستان دا سب توں وݙا سرمایہ ہن، میں اڄ جو کجھ وی ہاں اپݨے والدین اتے استاداں دی وجہ توں ہاں۔ فیلڈ مارشل سید عاصم منیر آکھیا جو پاکستان دیاں اڳلیاں نسلاں دی کردار سازی وی استاداں دی ذمہ داری اے، استاداں پاکستان دی کہانی اپݨیاں اڳلیاں نسلاں کوں ݙسݨی اے۔ انہاں آکھیا جو معرکہ حق اچ اللہ تعالیٰ پاکستان دی پوری مدد کیتی، معرکہ حق ثبوت اے جݙاں پوری قوم ہک آہنی کندھ بݨ ونڄے تاں دنیا دی کوئی طاقت ایکوں ݙھوا نئیں سڳدی۔ چیف آف آرمی سٹاف آکھیا جو کشمیر دا کوئی وی سودا ممکن نئیں، اساں کݙاہیں وی کشمیر کوں نئیں بھل سڳدے، ہندوستان جاݨ ڳھنے جو پاکستان کشمیر کوں کݙاہیں نا چھڑیسی۔ انہاں آکھیا جو پاݨی پاکستان دی ریڈ لائن اے اتے 24 کروڑ پاکستانیاں دے ایں بنیادی حق تے ہتھ نا آوݨ ݙیسوں، پاکستان ہندوستان دی اجارہ داری کݙاہیں قبول نا کریسی۔ چیف آف آرمی سٹاف آکھیا جو ہندوستان کئی ݙہاکیاں توں کشمیر دے مسئلے کوں دباوݨ دی کوشش کیتی اے بھل او ناکام تھی چکیے، ہݨ اے ممکن نئیں رہیا، دہشت گردی ہندوستان دا اندرونی مسئلہ اے جیںدی بنیادی وجہ اقلیتاں بالخصوص مسلماناں تے ودھدا ہویا ظلم اتے تعصب پسندی اے جݙاں جو کشمیر ہک عالمی سطح دا مسئلہ اے۔ انہاں آکھیا جو بلوچستان اچ دہشت گرد فتنہ الہندوستان اے، جیندا بلوچاں نال کوئی تعلق نئیں، اساں پاکستان کوں ہک اینڄھی مضبوط ریاست بݨاوݨے جیںدے اچ سارے ادارے قانون موجب، آئین دے تحت، بغیر کہیں سیاسی دباؤ، مالی اتے ذاتی فائدے دے عوام دی فلاح و بہبود کیتے کم کرن، جو کوئی وی ریاست کوں کمزور بݨاوݨ دا بیانیہ بݨاوݨ دی کوشش کرے ایندی نفی کرن۔ شرکاء سوال و جواب دے سیشن اچ آکھیا جو ایں محفوظ دھرتی اے، ایںدے پچھوں وردی اے، ساکوں پاکستان اتے اپݨیاں مسلح افواج تے ماݨ اے اتے اساں انہاں دے نال کھڑے راہسوں۔