وفاقی وزیررانا تنویر حسین نال ڈائریکٹر جنرل ایس آئی ایف سی دی ملاقات

اسلام آباد۔ 30 مئی (اے پی پی) وفاقی وزیر قومی غذائی تحفظ و تحقیق رانا تنویر حسین نال وزارت اچ خصوصی سرمایہ کاری سہولت کونسل (ایس آئی ایف سی) دے ڈائریکٹر جنرل ملاقات کیتی، جیندے اچ وزارت اتے ایس آئی ایف سی وچال آپسی تعاون ودھاوݨ تے ڳالھ مہاڑ کیتی ڳئی تاں جو زرعی شعبے کوں پیش آندے چیلنجز نال مؤثر طریقے نال نبݨیا ونڄ سڳے اتے قومی معیشت دی ترقی اچ ایں شعبے دا کردار تکڑا بݨایا ونڄ سڳے۔ایں موقع تے کساناں کوں ریلیف ڈیوݨ اتے شعبے دی مجموعی پیداواری صلاحیت اچ بہتری گھن آوݨ متعلق کئی اہم اقدامات تے تفصیلی ڳالھ مہاڑ تھئی۔ کساناں دے ودھدے ہوئے زرعی خرچے اتے موسمیاتی اثرات نال پیش آندے مسئلیں نال نبݨݨ کیتے ہک جامع ریلیف پیکیج زیر غور اے، ایں ڳالھ تے اتفاق کیتا ڳئے جو ہک شفاف قیمتاں دا نظام وضع کیتا ویسی تاں جو کساناں کوں انہاں دی پیداوار دا مناسب معاوضہ مل سڳے اتے انہاں کوں معاشی استحکام ݙتا ونڄ سڳے۔ کپاہ تے جنرل سیلز ٹیکس دے مسئلے تے وی غور کیتا ڳئے اتے ٹیکس اچ کمی یا مکاوݨ دیاں تجویزاں زیر غور ہن تاں جو کپاہ دے کاشتکاراں کوں سہولت ݙتی ونڄ سڳے اتے پیداوار اچ وادھا تھیوے۔وزارت اتے ایس آئی ایف سی ݙوہیں مویشی پالݨ دے شعبے کوں ودھاوݨ کیتے عزم دا اظہار کیتا جئیں سانڳے بہتر صحت دیاں سہولتاں، افزائش نسل دیاں خدمتاں اتے ویلیو چین دی ترقی جہیں ہدف کیتے اقدامات کیتے ویسن۔ ایں دے علاوہ آوݨ آلے وفاقی بجٹ اچ کساناں دے ضیان دے ازالے اتے مالی امداد کیتے ہک خصوصی “کسان پیکیج” شامل کرݨ تے غور کیتا ویندا پئے۔ وفاقی وزیر بین الاداراتی ہم آہنگی کوں ودھاوݨ اچ ایس آئی ایف سی دے کردار دی تعریف کیتی اتے پالیسی اصلاحات دے نفاذ اچ وزارت دا مکمل تعاون دا یقین ݙیوائے۔ میجر جنرل اسد الرحمٰن چیمہ زرعی شعبے اچ سٹریٹجک سرمایہ کاری کوں سہولت ڈیوݨ اتے اقدامات دے وختی نفاذ کوں یقینی بݨاوݨ کیتے ایس آئی ایف سی دے عزم دا اعادہ کیتا، ملاقات خوشگوار ماحول اچ مک ڳئی جتھاں ایں امر تے اتفاق کیتا ڳئے جو انہاں پالیسی اقدامات کوں عملی شکل ڈیوݨ کیتے ݙوہں ادارے نیڑے رابطہ برقرار رکھیسن تاں جو پاکستان دے کساناں کوں حقیقی فیدہ پُڄ سڳے۔