پیپرا 408 ماسٹر ٹرینرز دی تربیت مکمل کر ڳھدی

اسلام آباد۔ 4 جون (اے پی پی) پبلک پروکیورمنٹ ریگولیٹری اتھارٹی (پیپرا) پاکستان وزیرِاعظم دے وژن شفافیت، گڈ گورننس اتے کارکردگی تے عمل کریندے 408 ماسٹر ٹرینرز دی تربیت مکمل کر ڳھدی۔ گزریل ہک سال دے دوران پیپرا 15 خصوصی تربیتی پروگراماں دا انعقاد کیتا تاں جو ای پروکیورمنٹ دے نفاذ کوں ودھارا ݙتا ونڄ سڳے اتے پروکیورمنٹ قوانین تے عملدرآمد کوں یقینی بݨایا ونڄ سڳے۔ منیجنگ ڈائریکٹر پیپرا حسنات احمد قریشی پیپرا ہیڈکوارٹرز وچ منعقدہ تقریب دے دوران تربیتی پروگراماں دے شرکا وچ سنداں ونڈیاں ۔ سند یافتہ ماسٹر ٹرینرز ہݨ ای-پاک ایکوزیشن اینڈ ڈسپوزل سسٹم یعنی ای پیڈز دے حوالے نال اپݨے متعلقہ اداریں وچ تربیت ݙیسن جئیں نال پاکستان وچ عوامی خریداری دے شعبے وچ ڈیجیٹل اتے معیاری طریقہ کار کوں ودھارا ملسی۔ اپݨے خطاب وچ حسنات احمد قریشی تربیتی پروگراماں دی اہمیت تے زور ݙیندے واضح کیتا جو پیپرا دی تاریخ وچ پہلی واری ہک منظم اتے جامع تربیتی منصوبہ متعارف کروایا ڳئے تاں جو ای پروکیورمنٹ کوں ادارہ جاتی شکل ݙتی ونڄ سڳے اتے عوامی فنڈز دے شفاف، مؤثر اتے منصفانہ استعمال کوں یقینی بݨایا ونڄ سڳے۔ انہاں شرکا توں مطالبہ کیتا جو او اپݨے محکمیں وچ خریداری دے عمل کوں فعال طریقے نال اڳوں ودھاون اتے اپݨے ساتھیں کوں ای پیڈز دے مؤثر استعمال دی تربیت ݙیون جو پاکستان وچ سرکاری خریداری دے عمل وچ انقلاب ڳھن آوݨ آلا اے۔ انہاں مزید اعلان کیتا جو پیپرا ایکریڈیٹیشن فریم ورک کوں حتمی شکل ݙیندا پئے تاں جو پیشہ ورانہ صلاحیتاں کوں مزید بہتر بݨایا ونڄ سڳے۔ تقریب وچ پیپرا دے سینئر افسراں بشمول عتیق سلطان راجہ، عبدالمجید، فرخ بشیر اتے ݙوجھے افسراں شرکت کیتی۔ وزیرِ اعظم دے وژن موجب وفاقی وزارتاں، ڈویژناں، منسلک محکمیں اتے خودمختار اداریں وچ پروکیورمنٹ سیلز قائم کیتے ویندے پئن۔ پیپرا ہک جامع تربیتی پروگرام نافذ کریندا پئے تاں جو ای پیڈز دے مؤثر نفاذ اتے پبلک پروکیورمنٹ ریگولیٹری فریم ورک تے عملدرآمد کوں یقینی بݨایا ونڄ سڳے۔