پاکستان دی فارما انڈسٹری وچ بے پناہ صلاحیت اے، برآمدات ودھاوݨ کیتے موثر اقدامات کیتے ونڄن، وفاقی وزیر مصطفیٰ کمال

اسلام آباد۔ 4 جون (اے پی پی) وفاقی وزیر قومی صحت مصطفیٰ کمال آکھیے جو پاکستان دی فارما انڈسٹری وچ بے پناہ صلاحیت اے، ایکسپورٹ کوں ودھاوݨ کیتے موثر اقدامات کیتے ونڄن، فارماسیوٹیکل صنعت دی مقامی سطح تے ترقی اتے خود انحصاری کیتے بھرپور اقدامات کیتے ونڄن۔ انہاں اے ڳالھ پاکستان فارماسیوٹیکل مینوفیکچررز ایسوسی ایشن دے وفد نال ملاقات اچ آکھی ۔ ملاقات وچ مقامی پیداوار دی تیاری و برآمدی مواقع اتے ڈرگ رولز وچ اصلاحات دا جائزہ وی ڳھدا ڳئے۔ ایں موقع تے ایکٹو فارماسیوٹیکل انگریڈینٹس (APIs) دی مقامی پیداوار متعلق اہم امور تے تفصیلی ڳالھ مہاڑ کیتی ڳئی۔ افغانستان نال سانجھے تجارتی معاہدے اتے API دی مقامی تیاری تے پیشرفت تے وی ڳالھ مہاڑ تھئی۔وفاقی وزیر آکھیے مشترکہ طور تے API دی مقامی تیاری کوں یقینی بݨیسوں تاں جو قیمتی زرمبادلہ دی بچت کیتی ونڄ سڳے۔ انہاں آکھیے ڈریپ نفٹھا کریکر منصوبے دے قیام متعلق ہک جامع رپورٹ پیش کرے، اے اقدام فارماسیوٹیکل صنعت کیتے ضروری خام مال دی خود کفالت دے حصول دے مقصد نال کیتا ویندا پئے۔ انہاں آکھیے اساکوں رل تے APIs دی مقامی پیداوار کوں یقینی بݨاوݨا اے تاں جو زرمبادلہ دے ضیان کوں روکیا ونڄ سڳے، ملکی دوائیں کوں عالمی منڈیاں تئیں پڄاوݨ کیتے مربوط اقدامات کرݨے ہوسن، نقلی دوائیں مکاوݨ کیتے حکومت پرعزم اے، ایں مقصد کیتے ہک جدید بار کوڈ نظام متعارف کروایا ویندا پئے جئیں دے تحت ہر دوا تے بار کوڈ پرنٹ کیتا ویسی، ایں بار کوڈ دے ذریعے مریض کہیں وی دوا دی اصل شناخت اتے قیمت دی تصدیق سوکھیں کر سڳسی۔ انہاں آکھیے نقلی دوائیں نال پاکستان دی ساکھ اتے فارماسیوٹیکل انڈسٹری دی شہرت وی متاثر تھیندی اے، اے انسانی جاناں دا معاملہ اے جئیں تے کوئی سمجھوتہ نی کیتا ونڄ سڳدا، فارما انڈسٹری ایں سلسلے وچ سارے ضروری اقدامات کرے۔ ملاقات وچ ایڈیشنل سیکرٹری ہیلتھ چیف ایگزیکٹو افسر ڈریپ وی موجود ہن۔