پاکستان اتے امریکہ دے تعلقات نویں دور وچ داخل تھیندے پئن، وزیراعظم محمد شہباز شریف دا امریکی سفارتخانے وچ یوم آزادی دی تقریب نال خطاب

اسلام آباد۔ 4 جون (اے پی پی) وزیراعظم محمد شہباز شریف آکھیے پاکستان اتے امریکہ دے تعلقات نویں دور وچ داخل تھیندے پئن۔ انہاں امید ظاہر کیتی جو پاکستان اتے بھارت وچال سیز فائر طویل اتے پائیدار تھیسی، اتے اساں سرمایہ کاری، تجارت سودھا ݙوجھے شعبیں وچ تعاون کوں ودھا سڳدوں۔ انہاں ݙسایا جو اساں آئی ٹی، توانائی، زراعت، تعلیم سودھے ٻہوں سارے شعبیں وچ ݙو طرفہ تجارت، ٹیرف سودھا ݙوجھے امور تے امریکہ دے نال رابطہ وچ ہیسے۔اے ڳالھ انہاں امریکی سفارتخانے وچ یوم آزادی دی تقریب نال خطاب کریندے آکھی۔ انہاں آکھیے پاکستانی حکومت اتے عوام دی طرفوں امریکہ دے 249ویں یوم آزادی دی امریکی صدر ڈونلڈ ٹرمپ، حکومت اتے عوام کوں دلوں مبارخ ݙینداں۔ انہاں ایں عزم دا اظہار کیتا کہ ݙوہیں ملکاں دے تعلقات کوں تکڑا بݨاوݨ کیتے نیڑے رابطے کوں ودھارا ݙتا ویسی۔وزیراعظم آکھیے امریکی اسلاف اپݨے وژن اتے جدوجہد نال تاریخ وچ کامیابی حاصل کیتی، انہاں دے آزادی، برداشت اتے جمہوری نظم و نسق دے نظریات اساݙے آبائو اجداد دی سوچ اتے وژن نال ہم آہنگ ہن۔ انہاں قائد اعظم محمد علی جناح دے آئین، اقلیتاں دے حقوق اتے قانون دی حکمرانی تے یقین دا ذکر کیتا۔انہاں زور ݙتا ݙوہیں ملکاں وچال پائیدار اتے وسیع بنیاداں تے تاریخی تعلقات ہن، اتے امریکہ پاکستان کوں تسلیم کرݨ آلے ابتدائی ملکاں وچ شامل ہئی۔ وزیراعظم ݙسایا پاکستان وچ ڈیماں سودھے ٻہوں سارے منصوبے امریکی حکومت دے تعاون نال مکمل کیتے ڳئے، اتے امریکہ کئی واری پاکستان اتے پاکستانی معیشت دے استحکام کیتے تعاون کیتا۔ انہاں ݙسایا جونائن الیون دے بعد دہشت گردی دے خلاف عالمی جنگ شروع تھئی۔وزیراعظم مزید آکھیے افغان جنگ بالخصوص نائن الیون دے بعد دہشت گردی دے خلاف جنگ وچ پاکستان فرنٹ لائن ملک دا کردار ادا کیتا، اتے 2018ء وچ پاکستان دہشت گردی دا مکمل خاتمہ کر ݙتا ہئی۔ انہاں ݙسایا دہشت گردی دے خلاف جنگ وچ بارا جانی اتے مالی ضیان چاتا ڳیا، 90 ہزار توں ودھ جاناں قربان تھئن، اتے 150 ارب ڈالر توں ودھ دا معاشی ضیان تھیا۔ انہاں ایں عزم دا اعادہ کیتا جو ہر قسم دی دہشت گردی دے مکاوݨ کیتے پرعزم ہیسے اتے پاکستان اپݨی معاشی بحالی کیتے کوشاں ہے۔ پاکستان نہ صرف خطے بلکہ دنیا بھر وچ امن، ترقی و خوشحالی چاہندے۔وزیراعظم آکھیے پاکستان اتے بھارت وچال اڄوکی جنگ توں اے حقیقت عیاں تھئی اے پہلگام واقعہ فالس فلیگ آپریشن ہئی، اتے بھارت کوں پوری دنیا دے سامݨے ٹھوس شواہد پیش کرݨے چا ہیدن اتے انہاں کوں ایں واقعے دے حقائق بارے قائل کرݨا چاہیدے۔ انہاں ݙسایا اساں ایں معاملے دی عالمی سطح تے قابل اعتماد اتے شفاف تحقیقات دی پیشکش کیتی تاں جو دنیا حقائق بارے ڄاݨ سڳے بدقسمتی نال اساݙی سنجیدہ اتے مخلصانہ پیشکش دا بھارت جارحیت نال جواب ݙتا۔ انہاں آکھیے اساں صبر و تحمل دا مظاہرہ کیتا، 6 اتے 7 مئی کوں نینگریں اتے تریمتاں سودھا 33 نشوم پاکستانیاں کوں شہید اتے 55 کوں زخمی کیتا ڳیا۔ انہاں زور ݙتا اساں اپݨے دفاع وچ 6 بھارتی طیارے مار سٹئے کیون جو جواب ݙیوݨا اساݙا حق ہئی، بھارت 9 اتے 10 مئی کوں ول حملہ کیتا، ایں موقع تے اساݙے امریکی دوست اساں نال رابطہ وچ ہن، انہاں مخلصانہ طور تے اساکوں قائل کیتا جئیں تے اساں آکھیا جو ہݨ کافی اے اتے جنگ بندی تے رضامندی ظاہر کیتی۔ اساں امن اتے کشیدگی وچ کمی چاہندے ہاسے، امریکی دوستاں ول اساں نال رابطہ کیتا اتے آکھیے پاکستان کوں صبر و تحمل دا مظاہرہ کرݨا چا ہیدے۔ اساں بھارت دی طرفوں ݙوجھی واری حملے تے اپݨا ردعمل ݙتا۔وزیراعظم آکھیے امریکی صدر ڈونلڈ ٹرمپ کہیں شک و شبہ دے بغیر امن پسند شخصیت ہن اتے امن اتے مفید کاروباری معاہدیں دے داعی ہن، او کشیدگی وچ کمی دے حامی، سرد اتے گرم جنگ دے خلاف ہن۔ او کہیں خاص خطے وچ نی بلکہ دنیا بھر وچ خوشحالی و ترقی دے چاہندن جیں دا انہاں دے اڄوکے بیاناں توں اظہار تھیندے، انہاں پاکستان اتے بھارت ݙوہیں کوں تجارت، سرمایہ کاری اتے جنگ بندی دی تجویز ݙتی۔ پاک۔بھارت جنگ بندی کیتے امریکی صدر ٹرمپ دیاں کوششاں قابل تعریف ہن۔ انہاں ݙسایا جو مشرق وسطیٰ اتے خلیجی دوست ملکاں اساݙا بھرپور ساتھ ݙتا جیں تے انہاں دے شکر گزار ہیسے۔وزیراعظم ایں امید دا اظہار کیتا جو پاکستان اتے بھارت وچال سیز فائر طویل اتے پائیدار تھیسی، اتے اساں سرمایہ کاری، تجارت سودھا ݙوجھے شعبیں کوں ودھارا ݙے سڳسوں۔ اساں آئی ٹی، توانائی، زراعت تعلیم سودھے ٻہوں شعبیں وچ ݙو طرفہ تجارت، ٹیرف سودھا ݙوجھے امور تے امریکہ دے نال رابطہ وچ ہیسے۔ انہاں آکھیے مختلف شعبیں وچ امریکی صدر ڈونلڈ ٹرمپ دا وژن قابل تعریف اے۔