سپیکر قومی اسمبلی سردار ایاز صادق دی یوم عرفہ تے حاجیاں کوں مبارخ

اسلام آباد۔ 5 جون (اے پی پی) سپیکر قومی اسمبلی سردار ایاز صادق یوم عرفہ تے حاجیاں کوں مبارخ ݙیندے آکھیے جو فریضہ حج اللہ تعالیٰ دا خاص انعام اے جیڑھا پوری دنیا دے مسلماناں کوں ہک جاہ جمع تھیوݨ دا موقع ݙٰیندے ۔سپیکر قومی اسمبلی اپݨے تہنیتی پیغام وچ آکھیے فریضہ حج یکجہتی اتے اتحاد دی عظیم مثال اے، حج دا موقع اساکوں اپݨیاں صفاں وچ اتحاد اتے یکجہتی پیدا کرݨ دا پیغام ݙیندے، حج اسلام دے پنج بنیادی ارکان وچوں ہک اے۔ مناسکِ حج، قربانی، صبر اتے اطاعتِ الٰہی دی یاد ݙویندے ہن۔ انہاں آکھیے حج روحانی سفر اے جیڑھا بندے کوں اللہ دے نیڑے کریندے، حج اتحاد، مساوات، صبر اتے ایثار دا درس ݙیندے، حاجی اپݨیاں خواہشات کوں اللہ دی رضا کیتے قربان کریندن، حضرت ابراہیمؑ علیہ سلام دی قربانی دی سنت امت مسلمہ کیتے مشعلِ راہ اے، سنت ابراہیمی اساکوں اپݨا سارا کجھ اللہ تعالیٰ دی راہ وچ قربان کرݨ دا درس ݙیندی اے۔سپیکر قومی اسمبلی حج 2025 دے شاندار انتظامات تے سعودی حکومت کوں مبارخ ݙتی اتے آکھیا جو لکھاں حاجیاں کیتے سہولتاں ݙیوݨ قابلِ تحسین اے۔ انہاں دعا کیتی اللہ تعالیٰ سارے حاجیاں دیاں عبادتاں اتے قربانیاں کوں قبول فرماوے۔ انہاں آکھیے حج دے عظیم موقع تے مسلم امہ کوں فلسطین اتے کشمیر دے مظلوم مسلماناں دی حالت زار کوں نئیں بھلݨا چاہیدا، مسلم امہ توں کشمیر اتے فلسطین دے مظلوم مسلماناں دی آزادی کیتے دعا دی اپیل کرینداں اتے حج دے موقع تے امت مسلمہ دی یکجہتی کیتے دعا کرینداں