پلاسٹک آلودگی اساݙے ماحولیاتی نظام، معیشت اتے آوݨ آلیاں نسلاں کیتے خطرہ اے، وزیراعظم شہباز شریف

اسلام آباد۔ 5 جون (اے پی پی) وزیراعظم محمد شہباز شریف آکھیے پلاسٹک آلودگی ماحولیاتی چیلنج اے جیڑھا اساݙے ماحولیاتی نظام، اساݙی معیشت اتے آوݨ آلیاں نسلاں کیتے خطرہ اے۔ وزیراعظم دفتر دے میڈیا ونگ توں جاری بیان موجب 5 جون کوں ماحولیات دے عالمی ݙینھ دی مناسبت نال اپݨے پیغام وچ وزیراعظم آکھیے پاکستان کرہء ارض دے تحفظ اتے پائیدار ترقی کوں اڳوں ودھاوݨ دے اپݨے عزم دا اعادہ کرݨ کیتے بین الاقوامی برادری دے رلے کھڑ ے۔ ایں سال ماحولیات دے عالمی ݙینھ دا تھیم “پلاسٹک دی آلودگی دا خاتمہ” اے، پلاسٹک توں پیدا تھیوݨ آلی آلودگی نال نبݨݨ کیتے وختی عمل درآمد دی لوڑھ اے۔وزیراعظم آکھیے پلاسٹک دی آلودگی ہک ماحولیاتی چیلنج اے جیڑھا اساݙے ماحولیاتی نظام، اساݙی معیشت اتے آوݨ آلیاں نسلاں کیتے خطرہ اے۔ اے آلودگی نہ صرف دریاواں اتے سمندراں کوں متاثر کریندی اے بلکہ سمندری حیات کیتے وی مضر اے۔ پوری دنیا وچ پلاسٹک دا فضلہ خطرناک حد تئیں ودھ چکیے اتے پاکستان وی ایں آلودگی توں ٻہوں متاثر اے۔ پلاسٹک توں پیدا تھیوݨ آلی آلودگی دے خلاف پوری دنیا کوں جرات مندانہ مشترکہ اقدامات چاوݨ دی لوڑھ اے۔وزیراعظم آکھیے حکومت پاکستان ایجھیاں پالیسیاں تے عمل درآمد کیتے پرعزم ہے جیڑھے ماحول دوست متبادل ذرائع توانائی کوں ودھارا ݙیندن، ایندے ذمہ دارانہ استعمال دی حوصلہ افزائی کریندن اتے پلاسٹک دے استعمال تے سخت قوانین و ضوابط دا نفاذ کریندن۔ تاہم، حقیقی تبدیلی انفرادی سطح تے شروع تھیندی اے ۔ اساݙے گھراں، اساݙے محلے، اتے زندگی دے سارے شعبیں وچ اساݙے انتخاب توں ایندا آغاز تھیندے۔ آؤ اڄ دے ݙینھ اے عزم کروں جو اساں آوݨ آلیاں نسلاں دے تحفظ کیتے ماحول کوں بہتر اتے صاف بݨاوݨ کیتے اپݨا اپݨا کردار ادا کریندے رہسوں۔