وزیراعظم شہباز شریف سعودی عرب دے ولی عہد /وزیراعظم دی دعوت تے ݙو ݙینھ دے دورہ سعودی عرب روانہ

اسلام آباد۔ 5 جون (اے پی پی) وزیر اعظم محمد شہباز شریف سعودی عرب دے ولی عہد / وزیراعظم شہزادہ محمد بن سلمان بن عبدالعزیز آل سعود دی دعوت تے اپݨے ݙو ݙینھ دے دورہ سعودی عرب کیتے اسلام آباد توں جدہ روانہ تھی ڳئن۔ وزیراعظم دفتر میڈیا ونگ توں جاری بیان موجب وزیراعظم 5 اتے 6 جون کوں سعودی عرب دا دورہ کریندے پئن اتے عید الاضحیٰ سعودی عرب وچ گزریسن۔عید الاضحیٰ دے ݙینھ وزیراعظم شہباز شریف ولی عہد / وزیراعظم سعودی عرب شہزادہ محمد بن سلمان بن عبدالعزیز نال عید ملسن اتے انہاں دے وچال خصوصی ملاقات تھیسی ۔ بیان موجب ݙوہیں رہنماواں دی ملاقات وچ پاکستان اتے سعودی عرب وچال تجارت اتے سرمایہ کاری، امت مسلمہ دی فلاح و بہبود اتے علاقائی امن و سلامتی سودھا اہم شعبیں وچ ݙو طرفہ تعاون کوں تکڑا بݨاوݨ تے ڳالھ مہاڑ تھیسی۔ وزیراعظم شہباز شریف اڄوکے پاک بھارت جھیڑے کوں گھٹ کرݨ وچ تعمیری کردار تے سعودی قیادت دا شکریہ وی ادا کریسن۔ ہک اعلیٰ سطح دا وفد وی وزیراعظم دے رلے سعودی عرب دا دورہ کریندا پئے۔