پاکستان ہک ذمہ دار ایٹمی ملک اے، حالیہ پاک بھارت کشیدگی اچ فوجی اتے سول قیادت ذمہ داری ݙکھائی اے، سید یوسف رضا گیلانی

ملتان۔ 06 جون(اے پی پی)پاکستان ہک ذمہ دار ایٹمی ملک اے، بھارت نال حالیہ کشیدگی تے ساݙی فوجی اتے سول قیادت ٻہوں صبر اتے ذݨہ داری ݙکھائی اے۔ ملتان اچ نجی ہوٹل دی افتتاحی تقریب دے بعد میڈیا نال ڳالھ مہاڑ کریندے چیئرمین سینیٹ سید یوسف رضا گیلانی آکھیا جو بھارت ولوں پاݨی بند کرݨ دی دھمکی اتے حملے دا جواب اساں ہک قوم بݨ تے ݙتے، کشیدگی توں پہلے اساں بھارت نال پہلگام واقعے تے ہک شفاف انکوائری دا مطالبہ کیتا ہا ٻھل بھارت ساݙا مطالبہ نئیں منیا، سیلف ڈیفنس اچ کیتے ڳئے ساݙے اقدامات کوں پوری قوم خراجِ تحسین پیش کیتتے، پاکستان اتے بھارت ݙو ایٹمی ملک ہن جنہاں دے تصادم دے حق اچ کائنی، سفارتی محاذ تے چیئرمین بلاول بھٹو زرداری اتے انہاں دی ٹیم آپݨے حالیہ امریکہ دے دورے تے پاکستان دے بیانیے کوں ٻہوں سوھݨے اتے تکڑے انداز اچ پیش کر تے قوم دے دل جیتئن۔ بلاول بھٹو واضح کیتے جو اساں امن پسند ملک ہیں اتے جنگ نئیں چاہندے۔ چیئرمین سینیٹ دا آکھݨ ہئی جو ساݙے بزرگاں پاکستان بݨایا اتے ہݨ اساں رل تے ایںدی خوشحالی اتے ترقی کیتے کم کریندے پئے ہیں۔ انہاں آکھیا جو برطانیہ اچ 1.7 ملین دی تعداد پاکستانیاں دی اے، ہاوس آف لارڈ اچ ساݙے 10 ممبرز ہن۔ اتھاں دے لارڈ میئر دا تعلق وی پاکستان نال اے۔ پاکستان دے لوک اتھاں محنت کریندن، آپݨے ملک دا ناں روشن کریندن، ساکوں انہاں تے وی ماݨ اے۔ ہک سوال دے جواب اچ انہاں آکھیا جو بجٹ دے حوالے نال اساں حکومت دے نال ہیں ٻھل ڄیکر ایں بجٹ اچ عوام کوں ریلیف نہ ملیا تاں اساں عوام دے نال ہوسوں۔ سید یوسف رضا گیلانی آکھیا جو فلسطین دے نہتے لوکاں اتے ساݙے شہدا دی قربانیاں کوں بھلایا نئیں ونڄ سڳدا، عید قربان تے انہاں کوں دعاواں اچ یاد رکھݨا اتے خراج تحسین پیش کرݨا ساݙا فرض اے۔ بعد اچ سید یوسف رضا گیلانی سمیجہ آباد اچ ہک نجی بیکری دا وی افتتاح کیتے۔ ایں موقعے تے ممبر قومی اسمبلی سید علی موسیٰ گیلانی، ممبر صوبائی اسمبلی رانا اقبال سراج سمیت رانا عبدالجبار، چوہدری، آصف نواز ورک، رب نواز ورک، چوہدری محمد حسین، رب نواز ورک، معززین شہر اتے اہلِ علاقہ دی وݙی تعداد موجود ہئی۔