عید دے موقع تے معاشرے دے پسماندہ طبقے دا خاص خیال رکھݨ ساݙی دینی اتے اخلاقی ذمہ داری اے، سید یوسف رضا گیلانی

ملتان ۔07 جون (اے پی پی)چئیرمین سینٹ سید یوسف رضا گیلانی دربار موسیٰ پاک شہید ملتان اچ عید دی نماز ادا کیتی۔ سجادہ نشین دربار عالیہ پیر سید ابوالحسن گیلانی، ممبرز قومی اسمبلی سید علی موسیٰ گیلانی، سید علی قاسم گیلانی، سابق رکن صوبائی اسمبلی جاوید صدیقی وی انہاں دے نال ہن۔ چیئرمین سینیٹ ملکی خوشحالی، استحکام اتے ترقی کیتے دعا کیتی۔ نماز توں بعد او او لوکاں نال عید ملین۔ میڈیا نال الیندے انہاں آکھیے جو عید قربان ساکوں ایثار، قربانی اے یکجہتی سکھیدنی اے، ایں موقع تے معاشرے دے پسماندہ طبقے دا خاص خیال رکھݨ ساݙی دینی و اخلاقی ذمہ داری اے، مسلم امہ کوں وی چاہیدے جو او غریباں دی مدد کرن۔ یوسف رضا گیلانی افواجِ پاکستان دے انہاں جواناں کوں خراج عقیدت پیش کیتا جنہاں وطن عزیز دی حفاظت کیتے آپݨیاں جاناں دا نذرانہ پیش کیتے۔ چیئرمین سینیٹ آکھیے جو ملک کوں سیاسی استحکام دی ودھ لوڑھ اے، کیوں جو سیاسی استحکام نال ہی معاشی استحکام ممکن اے۔ ایں سانڳے ساریاں جماعتاں کوں چاہیدے جو او قومی مفاد اچ یکجہتی ݙکھاون۔ ہک سوال دے جواب اچ یوسف رضا گیلانی حکومت توں مطالبہ کیتے جو آندے بجٹ اچ عوام کوں ریلیف ݙتا ونڄے۔ عام لوکاں دا ڄیوݨ سوکھا ٻݨاوݨ پارلیمنٹ، حکومت اتے سارے اداریاں دی سانجھی ذمہ داری اے۔