عید الاضحیٰ آپݨے نفس، خواہشات اتے مفادات کوں اعلیٰ مقاصد کیتے قربان کرݨ دا درس ݙیندی اے، پاکستان دی ترقی کیتے یکجہتی، قربانی اتے ایثار دے جذبے کوں اپناوݨا ہوسی۔ وزیرِ اعظم شہباز شریف دا عید الاضحیٰ تے سنیہا

اسلام آباد۔ 7 جون (اے پی پی) وزیرِ اعظم محمد شہباز شریف عید الاضحیٰ اتے عظیم الشان اسلامی عبادت حج دے بابرکت موقع تے پاکستانی قوم اتے عالم اسلام کوں مبارک ݙیندے آکھیے جو قربانی دا ایہہ جذبہ انسان کوں صبر، حوصلے، ایثار اتے قربانی دا جذبہ ودھیندے جیڑھا کہیں وی قوم دی ترقی دی بنیاد ہوندے، ساکوں آپݨیاں اقتصادی اتے سماجی ذمہ داریاں کوں سمجھدے ہوئیں آپݨے سارے وسائل کوں ہکو جاہ کرݨا ہوسی تاں جو اساں آپݨے ملک کوں مضبوط، خوشحال اتے خود کفیل بݨا سڳوں، ساکوں اڄ دے ݙینھ خاص طور تے آپݨے فلسطینی بھیݨ بھراواں کوں وی یاد رکھݨا چاہیدے جیڑھے ہک بے رحم اتے غیر انسانی مظالم اتے بھک دا شکار ہن۔ ایویں اساں بھارت دے غیر قانونی طور تے زیرِ تسلط مقبوضہ جموں و کشمیر دے بہادر عوام دے نال آپݨی غیر متزلزل یکجہتی دا وی اعادہ کریندے ہن۔ عید الاضحیٰ 1446ھ دے موقع تے قوم دے ناں آپݨے سنیہے اچ انہاں آکھیا جو اے بابرکت ایام ساکوں حضرت ابراہیم علیہ السلام اتے حضرت اسماعیل علیہ السلام دی بے مثال اطاعت، ایثار اتے قربانی دی یاد ݙیویندن، عظیم ہستیاں دی اطاعت و قربانی کوں رب ذوالجلال اینڄھا پسند فرمایا جو ایکوں قیامت تئیں امت محمدی ﷺ کیتے عبادت دا درجہ عطا فرما ݙیتا۔ انہاں آکھیا جو اللہ رب العزت توں دعا اے جو او پاکستانی قوم اتے پوری امت مسلمہ دیاں عبادتاں اتے قربانیاں کوں آپݨی بارگاہ اچ شرف قبولیت عطا فرماوے، اتے ساݙیاں زندگیاں اچ اے برکتاں ول ول نازل فرماوے، عید الاضحیٰ دا سنیہا صرف جانور دی قربانی تئیں محدود نہیں، ٻھل اے آپݨے نفس، خواہشات اتے مفادات کوں اعلیٰ مقاصد کیتے قربان کرݨ دا درس ݙیندے، قربانی دا اے جذبہ انسان کوں صبر، حوصلے، ایثار اتے قربانی جیڑھے اوصاف ݙیندے۔ وزیرِ اعظم آکھیا جو اڄ جݙاں ساݙا پیارا وطن پاکستان ترقی دی راہ تے گامزن اے، تاں ایں موقع تے ساکوں آپݨی یکجہتی، قربانی اتے ایثار دے جذبے کوں اپناوݨا ہوسی، عید الاضحیٰ دا اے بابرکت موقع ساکوں ایں ڳالھ دی یاد ݙیویندے جو قربانی دا راستہ ہمیشہ کامیابی دو ویندے، جیڑھا حالیہ بھارتی حملے اچ پوری قوم ہک جان اتے متحد تھی تے دشمن کوں واضح سنیہا ݙتا جو پاکستانی قوم آپݨے دفاع اتے وقار کیتے کہیں وی قربانی توں دریغ نئیں کریسی۔ انہاں آکھیا جو ساکوں آپݨیاں اقتصادی اتے سماجی ذمہ داریاں کوں سمجھدے ہوئیں آپݨے سارے وسائل کوں ہکو جاہ کرݨا ہوسی تاں جو اساں آپݨے ملک کوں مضبوط، خوشحال اتے خود کفیل بݨا سڳوں، اے عید ساکوں نہ صرف جان و مال دی قربانی دی اہمیت سکھیندی اے ٻھل اے وی ݙسیندی اے جو قوماں اوں ویلھے عظمت دی منزل تئیں پڄیندن جݙاں او فرد دی ترقی دے نال نال اجتماعی بھلائی و ایثار کیتے کم کریندن۔ وزیرِ اعظم آکھیا جو ساکوں اڄ دے ݙینھ خاص طور تے آپݨے فلسطینی بھیݨ بھراواں کوں وی یاد رکھݨا چاہیدے ڄیڑھے ہک بے رحم اتے غیر انسانی مظالم اتے ٻکھ دا شکار ہن۔ ایں طرحاں، اساں بھارت دے غیر قانونی طور تے زیرِ تسلط مقبوضہ جموں و کشمیر دے بہادر عوام دے نال آپݨی غیر متزلزل یکجہتی دا اعادہ کریندے ہیں، جنہاں دی آپݨے حق خود ارادیت کیتے عشریاں توں منصفانہ اتے بہادرانہ جدوجہد جاری اے۔ اساں ہمیشہ انہاں دی آواز بݨسوں اتے انہاں دی عظیم جدوجہد اچ انہاں دا ساتھ ݙیسوں۔ انہاں آکھیا جو اڄ اساں کوں آپݨیاں نسلاں کیتے ہک اینڄھے پاکستان دا عہد کرݨا ہوسی جتھاں محبت، بھائی چارہ، اتے اتحاد دی فضا ہووے، ساکوں ایں عزم دے نال اڳو تے ودھݨا ہوسی تاں جو پاکستان عالمی سطح تے ہک طاقتور اتے کامیاب ملک دے طور تے اُبھریے، پاکستان دی ترقی اتے خوشحالی دا خواب اوں ویلھے حقیقت بݨسی جݙݨ اساں ذاتی مفادات توں بالا تر تھی تے قومی مفاد کوں ترجیح ݙیسوں۔ وزیرِ اعظم آکھیا جو عید الاضحیٰ دا اے سنیہا ساکوں ایں ڳالھ دی ترغیب ݙیندے جو اساں آپݨیاں ذاتی خواہشات اتے مفادات توں بلند تھی تے صرف اتے صرف آپݨے وطن دی فلاح و بہبود کیتے سوچوں اتے عمل کروں۔ یقیناً اے جذبہ اتے اتحاد پاکستان دی تقدیر بدل سڳدے۔ انہاں آکھیا جو میݙی اللہ تعالیٰ توں دعا اے جو او ساکوں عید الاضحیٰ دیاں حقیقی خوشیاں ݙیوے، اتے ساکوں ایثار و قربانی دی اصل روح دے مطابق عمل کرݨ دی توفیق عطا فرماوے۔ آمین۔