پاکستان ہݨ ٹیک آف دی پوزیشن وچ آڳئے، سارے اقتصادی اشاریے اطمینان بخش ہن،وزیراعظم محمد شہباز شریف دا وفاقی کابینہ دے اجلاس توں خطاب

اسلام آباد۔ 10 جون (اے پی پی) وزیراعظم محمد شہباز شریف آکھیے جو پاکستان ہݨ ٹیک آف دی پوزیشن وچ آ ڳئے، سارے اقتصادی اشاریے باعث اطمینان ہن۔ روایتی جنگ وچ بھارت کوں ہرݨ دے بعد معاشی میدان وچ وی ہݨ اون توں اڳوں نکلݨا اے۔ پوری قوم ہک جان ݙو قالب اے، ایجھے موقع صدیاں وچ پیدا تھیندن۔ پاکستان دے حصے دے پاݨی دا ہک ہک قطرہ گھن تے رہسوں، ایں وچ کوئی خلل برداشت نہ کریسوں۔ تنخواہ دار طبقے معاشی استحکام وچ اہم کردار ادا کیتے، صاحب حیثیت تے دولت مند طبقیں کوں وی اپݨا کردار ادا کرݨا ہوسی۔ اے ڳالھ انہاں وفاقی کابینہ دے اجلاس توں خطاب کریندے آکھی۔وزیراعظم محمد شہباز شریف قوم کوں عید تے حجاج کرام کوں حج دی مبارکباد ݙتی۔ وزیراعظم فلسطین تے کشمیر وچ جاری ظلم و ستم تے بربریت دی شدید مذمت کریندے ہوئیں آکھیا جو فلسطین وچ جاری بربریت ایں دور دا بدترین ظلم اے، عالمی برادری غزہ وچ فوری جنگ بندی کیتے کردار ادا کرے۔ وزیراعظم آکھیا جو بے گناہ ٻالاں، ٻالڑیاں تے نشوم مسلماناں دا خون وہایا ویندا پیئے، ایں توں پہلے ایں دور وچ ایجھا ظلم نئیں ݙٹھا۔ انہاں آکھیا جو کشمیر تے فلسطین دے عوام کوں آزادی ضرور ملسی۔ وزیراعظم فلسطینی تے کشمیری بھیݨ بھراواں دی مکمل حمایت دا اعادہ کریندے آکھیا جو پاکستان دے عوام کشمیری تے فلسطینی بھیݨ بھراواں نال کھڑن تے کھڑے رہسن۔وزیراعظم وفاقی کابینہ وچ آندے مالی سال دے بجٹ تے ڳالھ کریندے آکھیا جو گزریل سوا سال دے دوران حکومت تے عوام سنگین حالات تے چیلنجز دا سامݨا کیتا۔ عام آدمی تے تنخواہ دار طبقے معاشی استحکام وچ اہم کردار ادا کیتے تے تنخواہ دار طبقے گزریل بجٹ وچ جو ٻوجھ چاتا تے 400 ارب روپے قومی خزانے وچ ݙتے، اے معاشرے دے صاحب حیثیت تے دولت مند طبقیں کیتے ہک سوال اے جو انہاں اپݨا کتنا حصہ پاتا؟ تنخواہ دار طبقے دیاں قربانیاں، محنت تے کوششاں دے بدولت پاکستان اج ایجھے مقام تے کھڑے جتھوں اوہ ٹیک آف دی پوزیشن وچ اے۔وزیراعظم آکھیا جو معیشت وچ استحکام دے مثبت اشاریے سامݨے آئے ہن، مہانگ دی شرح تے پالیسی ریٹ وچ کمی آئی اے، برآمدات وچ ودھارا تھئے، زرمبادلہ دے ذخیرے تے آئی ٹی دیاں برآمدات وچ وی وݙا ودھارا تھئے ۔ ویلھا آڳئے جو موجودہ بجٹ وچ معاشی ترقی تے خصوصی توجہ مرکوز کیتی ونڄے۔ انہاں آکھیا جو پاکستان اڄوکی روایتی جنگ وچ ایجھی دشمن کوں شکست فاش ݙتی اے جو آکھیندا ہئی جو اساݙا پاکستان نال کوئی موازنہ ہی کائنی، معاشی میدان وچ وی بھارت کوں شکست ڈیسوں۔ جنون تے تڑپ ہووے تاں کجھ وی ناممکن کائنی ، ساریں کوں رَل تے رات ݙینہہ محنت نال اڳوں ودھݨا ہوسی۔وزیراعظم آکھیا جو معاشی کامیابیاں وچ سارے اداریاں کردار ادا کیتا، ہݨ موقع آ ڳئے جو اساں ساریاں رَل تے اڳوں ودھوں، پوری قوم ہک جان ݙو قالب ہے، صدیاں وچ ایجھے موقع پیدا تھیندن، ایں لمحے کوں ضائع نئیں کرݨا، ایں توں فیدہ چاوݨا ہے۔ بھارت جنگ وچ شکست دے بعد پاݨی کوں بطور ہتھیار استعمال کرݨ دیاں ڳالھیں کریندا پئے، پاکستان دے حصے دا ہک ہک قطرہ گھن تے رہسوں، ایں وچ کوئی خلل برداشت نہ کریسوں، نہ بھارت کوں اساݙے حصے دا پاݨی روکݨ دا کوئی حق اے نہ ہی اوہ ایویں کر سڳدے۔ چارے صوبیں نال رَل تے صورتحال تے ڳالھ مہاڑ کیتی اے ، اساں ایں محاذ تے وی کامیاب تھیسوں۔ وزیراعظم بجٹ دے حوالے نال خزانہ سودھے ساریاں وزارتاں دی محنت دی تعریف کیتی۔