پی ایس ڈی پی دے تحت پاور ڈویژن دے 47 جاری منصوبیں کیتے 90,225.783 ملین روپے رکھئن

اسلام آباد۔ 10 جون (اے پی پی) وفاقی حکومت سرکاری شعبہ دے سالانہ ترقیاتی پروگرام (پی ایس ڈی پی) دے تحت آندے مالی سال 2025-26 دے دوران پاور ڈویژن دے 47 جاری منصوبیں کیتے مجموعی طور تے 90,225.783 ملین روپے دے فنڈز رکھئن ۔ جنہاں وچ 72,106.914 ملین روپے دی غیر ملکی معاونت شامل اے۔ جاری پی ایس ڈی پی دے اعدادوشمار موجب  سپیشل اکنامک زون رشکئی کوں بجلی ݙیوݨ کیتے 314.580 ملین روپے، کاسا-1000 دے تحت تاجکستان تے پاکستان وچال 500 کے وی دے ایچ وی ڈی سی ٹرانسمیشن منصوبے کیتے غیر ملکی معاونت نال 3000 ملین روپے، جامشورو وچ کولیں نال چلݨ آلے پاور پلانٹ کیتے 4250 ملین روپے رکھیے ڳئن جنہاں وچ 1575 ملین روپے غیر ملکی معاونت شامل اے۔ اسلام آباد ویسٹ گرڈ سٹیشن کیتے غیر ملکی معاونت نال 5000 ملین روپے، تربیلا دے پنجویں توسیعی منصوبے توں بجلی گھنݨ کیتے غیر ملکی معاونت دے ذریعے 840 ملین روپے، جھمپیر وچ غیر ملکی معاونت نال ہوا توں بجلی دے گھنݨ کیتے 800 ملین روپے، سیالکوٹ سب سٹیشن کیتے غیر ملکی معاونت نال 2500 ملین روپے، وہاڑی سب سٹیشن دی اپ گریڈیشن کیتے غیر ملکی معاونت نال 2000 ملین روپے، بجلی دی ترسیل دی استعداد کوں بہتر بݨاوݨ دے پراجیکٹ کیتے غیر ملکی معاونت نال 3150 ملین روپے، مہمند ڈیم توں 816 میگا واٹ بجلی گھنݨ کیتے غیر ملکی معاونت نال 2000 ملین روپے سودھے 47 مختلف ترقیاتی منصوبیں کیتے فنڈز رکھئے ڳئن۔