نیشنل ہائی وے اتھارٹی: 67 جاری اَتے 4 نویں منصوبیاں کیتے 2 کھرب 26 ارب 98 کروڑ 16 لکھ 50 ہزار روپے رکھئے ڳئن

اسلام آباد۔ 10 جون (اے پی پی)حکومت آندے مالی سال 26-2025 دے بجٹ اچ سرکاری شعبہ دے ترقیاتی پروگرام (پی ایس ڈی پی) دے تحت نیشنل ہائی وے اتھارٹی (این ایچ اے) دے67 جاری اَتے 4 نویں منصوبیاں کیتے مجموعی طور تے 2 کھرب 26 ارب 98 کروڑ 16 لکھ 50 ہزار روپے رکھین۔ منگل کوں جاری پی ایس ڈی پی دے اعدادوشمار دے مطابق نیشنل ہائی وے اتھارٹی دے 4 نویں منصوبیاں کیتے 2 ارب 15 کروڑ روپے رکھین جیندے تے لاگت دا تخمینہ 2 کھرب 29 ارب 43 کروڑ 40 لکھ 52 ہزار روپے لایا ڳئے۔ جنہاں اچ ماشخیل – پنجگور روڈ (191.6 کلو میٹر) دی تعمیر دے غیر منظور شدہ منصوبے کیتے 5 کروڑ روپے رکھیے ڳئن، جیںدے تے کل لاگت دا تخمینہ 64 ارب 57 کروڑ 71 لکھ 50 ہزار لایا ڳئے۔ ایویں ہی ضلع رحیم یار خان دے علاقے جمال دین آلی اچ انٹر چینج دی تعمیر کیتے 10 کروڑ روپے رکھیے ڳئن، جیںدے تے لاگت دا تخمینہ ہک ارب 44 کروڑ 85 لکھ روپے توں ودھ لایا ڳئے، اے منصوبہ سی ڈی ݙبلیو پی توں 14 جون 2023 کوں منظور تھیا ہا۔ نویں منصوبیاں اچ این فائیو فیز ون دے مختلف ترجیحی ڄاہیں کوں چوڑا کرݨ اَتے بہتری دے منصوبیاں کیتے ہک ارب 90 کروڑ روپے رکھیے ڳئن، جیندی منظوری گھنݨ باقی اے۔ انہاں منصوبیاں تے لاگت دا تخمینہ ہک کھرب 55 ارب 40 کروڑ 84 لکھ روپے لایا ڳئے۔ لالہ موسیٰ بائی پاس این فائیو دے غیر منظور شدہ منصوبے کیتے 10 کروڑ روپے دے فنڈز رکھیے ڳئن، جیںدے تے لاگت دا تخمینہ 8 ارب روپے لایا ڳئے۔67  جاری منصوبیاں کیتے 2 کھرب 24 ارب 83 کروڑ 18 لکھ 50 ہزار روپے دے فنڈز رکھین جیندے تے ہݨ تئیں 6 کھرب 48 ارب 7 کروڑ 53 لکھ 93 ہزار روپے خرچ تھی چکین جݙاں جو لاگت دا تخمینہ 32 کھرب 93 ارب 13 کروڑ 87 لکھ 80 ہزار روپے لایا ڳئے۔ این ایچ اے دے جاری منصوبیاں اچ ساریاں توں ودھ رقم انڈس ہائی وے (این 55) ایڈیشنل کیرج وے دا منصوبہ (شکارپور – راجن پور) 221.9 کلو میٹر دا (ایشیائی ترقیاتی بینک فنڈڈ) کیتے 8 ارب 62 کروڑ روپے رکھی ڳئی اے۔ ایویں ہی این 55 دے ݙی جی خان اَتے ݙی آئی خان دے حصیاں کوں ݙو طرفہ کرݨ اَتے بحالی دے منصوبے کیتے 7 ارب 23 کروڑ روپے رکھیے ڳئن۔ این 55 دے راجن پور، ݙی جی خان دے حصے دی تعمیر 6 ارب 20 کروڑ روپے، ہوشاب – آوران حصہ دی تعمیر کیتے 6 ارب روپے، خضدار- کچلاک (این 25) کوں ݙو طرفہ کرݨ کیتے 3 ارب 40 کروڑ روپے رکھیے ڳئن۔ جاری منصوبیاں اچ بلوچستان، سندھ اَتے خیبر پختونخوا دیاں شاہراہواں دی تعمیر، مرمت، بحالی، توسیع اَتے ݙو طرفہ کرݨ دے کئی منصوبے شامل ہن، جنہاں اچ ایشیائی ترقیاتی بینک دے فنڈز اَتے این ایچ اے دے وسائل نال تعمیر تھیوݨ آلے متعدد منصوبے ہن۔