پی ایس ڈی پی دے تحت نیشنل فوڈ سکیورٹی اینڈ ریسرچ ݙویژن کیتے 4253.738 ملین روپے رکھئن

اسلام آباد۔ 10 جون (اے پی پی)وفاقی حکومت آندے مالی سال دے بجٹ 26-2025 دے سرکاری شعبہ دے ترقیاتی پروگرام (پی ایس ڈی پی) دے تحت نیشنل فوڈ سکیورٹی اینڈ ریسرچ ݙویژن دے 10 جاری اَتے 5 نویں منصوبیاں کیتے مجموعی طور تے 4253.738 ملین روپے رکھیے ڳئن۔ منگل کوں جاری پی ایس ڈی پی دے اعدادوشمار دے مطابق ݙویژن دے 10 جاری منصوبیاں کیتے 3250.597 ملین روپے جݙاں جو 5 نویں منصوبیاں کیتے 1003.141 ملین روپے رکھین۔ وزارت نیشنل فوڈ سکیورٹی اینڈ ریسرچ ݙویژن دے جاری منصوبے خضدار، تربت اَتے لاہور اچ سیڈ سرٹیفیکیشن لیبارٹری دے قیام کیتے 30 ملین روپے، نیشنل سیڈ انہانسمنٹ پروگرام کیتے 500 ملین روپے، ملک دے بارانی علاقیاں اچ کاشتکاری ودھاوݨ دے منصوبیاں کیتے 585.595 ملین روپے، زیتون دی کمرشل بنیاداں تے کاشت دے منصوبے کیتے 585.597 ملین روپے، آلو دی پیداوار ودھاوݨ کیتے پاکستان کوریا جوائنٹ وینچر پروگرام کیتے 85 ملین روپے، نیشنل ریفارمز پروگرام دے تحت استعداد ودھاوݨ دے منصوبے کیتے 50 ملین روپے، وزارت نیشنل فوڈ سکیورٹی اینڈ ریسرچ دے پراجیکٹ پلاننگ اینڈ ڈویلپمنٹ یونٹ کیتے 150 ملین روپے، جانوراں دیاں بیماریاں روکݨ دے منصوبے کیتے 800 ملین روپے، قومی سطح تے زرعی پیداوار ودھاوݨ دے منصوبے کیتے 450 ملین روپے جݙاں جو پاکستان ماڈل ایگرکلچر ریسرچ سنٹر دے قیام کیتے 100 ملین روپے رکھیے ڳئن۔ جاری اعدادوشمار دے مطابق وزارت نیشنل فوڈ سکیورٹی اینڈ ریسرچ دے نویں منصوبیاں، شیخوپورہ اچ ایگریکلچر ریسرچ انسٹی ٹیوٹ دے قیام کیتے 300 ملین روپے، گنّے دی پیداوار ودھاوݨ اَتے فصل دی نگرانی دے منصوبے کیتے 120.281 ملین روپے، سسٹین ایبل ایگری بزنس اینڈ ڈویلپمنٹ منصوبے کیتے 200 ملین روپے، کپاہ دی پیداوار کوں ودھاوݨ دے منصوبے کیتے 125.800 ملین روپے جݙاں جو پاک سرزمین منصوبے دے تحت دور پار علاقیاں اچ زرعی شعبہ دی ترقی دے منصوبے کیتے 257 ملین روپے رکھیے ڳئن۔