بجٹ 2025-26: صحت دے شعبے دے 21 منصوبیں کیتے 14.3 ارب روپے مختص کرݨ دی تجویز

اسلام آباد۔ 10 جون (اے پی پی) وفاقی حکومت مالی سال 2025-26 کیتے پبلک سیکٹر ڈویلپمنٹ پروگرام وچ صحت دے شعبے دے 21 اہم منصوبیں کیتے 14.3 ارب روپے مختص کر ݙتن، جیڑھے جو گزریل سال دی نسبت نمایاں ودھارا اے۔ بجٹ تقریر دے دوران وزیر خزانہ سینیٹر محمد اورنگزیب قومی اسمبلی کوں ݙسایا جو اے رقم بیماریاں دے مؤثر تدارک، جدید طبی انفراسٹرکچر دے قیام اتے سارے شہریاں کوں ہکو جہیاں طبی سہولتاں ݙیوݨ یقینی بݨاوݨ کیتے خرچ کیتی ویسی۔ انہاں آکھیے جو جناح میڈیکل کمپلیکس اینڈ ریسرچ سینٹر، اسلام آباد دے قیام کیتے 4 ارب روپے رکھئن ۔ اے منصوبہ وفاقی دارالحکومت وچ ہک فلیگ شپ ٹیریٹری کیئر اتے ٹیچنگ فیسلٹی دے طور تے قائم کیتا ویسی۔انہاں آکھیا جو ہیپاٹائٹس سی مکاوݨ کیتے وزیراعظم پروگرام دے تحت 1 ارب روپے مختص کیتے ڳئن۔ ایں منصوبے دے ذریعے ملک گیر سکریننگ اتے علاج معالجے دیاں سہولتاں ݙتیاں ویسن۔ شوگر روکݨ اتے کنٹرول پروگرام کیتے 80 کروڑ روپے رکھئے ڳئن تاں جو غیر متعدی امراض (NCDs) نال نبݨݨ وچ مدد ملے۔ انہاں آکھیا جو اسلام آباد وچ کینسر ہسپتال دے قیام کیتے 1.7 ارب روپے جݙاں جو ضروری طبی آلات مل گھنݨ کیتے 90 کروڑ روپے مختص کیتن ۔ پمز اسلام آباد وچ ہک جدید Stroke Intervention Centre دے قیام، Critical Care اتے Cardiac Facilities دی توسیع کیتے وی 90 کروڑ روپے رکھئے ڳئن، جیں دا مقصد ایمرجنسی رسپانس دی صلاحیت کوں بہتر بݨاوݨ اے۔ وزیر خزانہ آکھیے جو اے سارے منصوبے تکڑے جامع اتے پائیدار صحت دے نظام دی تشکیل دے پاسے اہم قدم ہن جیڑھے پاکستان دی سماجی و اقتصادی ترقی کیتے ناگزیر ہن۔