آندے مالی سال دے اچ مجموعی قومی پیداوار دی نمو دی شرح 4.2 فیصد تئیں رہݨ دا امکان

اسلام آباد (اے پی پی) حکومت آندے مالی سال دے دوران مجموعی قومی پیداوار (جی ڈی پی) دی نمو دی شرح 4.2 فیصد تئیں رہݨ دا امکان ظاہر کیتے۔وفاقی وزیر خزانہ و محصولات سینیٹر محمد اورنگزیب قومی اسمبلی وچ اپݨی بجٹ تقریر دے دوران ݙسایا جو آندے مالی سال کیتے اقتصادی ترقی دی شرح 4.2 فیصد رہݨ دا امکان اے۔ افراط زر دی اوسط شرح 7.5 فیصد متوقع اے۔ بجٹ خسارہ جی ڈی پی دا 3.9 فیصد جڈاں جو پرائمری سرپلس جی ڈی پی دا 2.4 فیصد ہوسی۔ایف بی آر دے محصولات دا تخمینہ 14,131 ارب روپے اے جیڑھا جو جاری مالی سال توں 18.7 فیصد ودھ اے۔ وفاقی محصولاں وچ صوبیں دا حصہ 8,206 ارب روپے ہوسی۔ وفاقی نان ٹیکس ریونیو دا ہدف 5,147 ارب روپے مقرر کیتا ڳئے، وفاقی حکومت دی خالص آمدنی 11,072 ارب روپے ہوسی۔وفاقی حکومت دے کل خرچے تخمینہ 17,573 ارب روپے اے، جئیں وچوں 8,207 ارب روپے سود دی ادائیگی کیتے مختص ہوسن ۔ وفاقی حکومت دے جاری خرچے دا تخمینہ 16,286 ارب روپے اے، وفاقی حکومت دے سرکاری ترقیاتی پروگرام کیتے 1,000 ارب روپے دا بجٹ مختص کیتا ڳئے ۔ ملکی دفاع حکومت دی اہم ترین ترجیح اے اتے ایں قومی فرض کیتے 2,550 ارب روپے ݙتے ویسن۔ سول انتظامیہ دے خرچے کیتے 971 ارب روپے رکھئے ویندے پئن ۔ پنشن دے خرچے  کیتے 1,055 ارب روپے رکھئے ڳئن۔ بجلی اتے ٻئے شعبیاں کیتے سبسڈی دے طور تے 1,186 ارب روپے دی رقم رکھی ویندی پئی اے، گرانٹس دی مد وچ 1,928 ارب روپے رکھئے ویندے پئن جیڑھے بے نظیر انکم سپورٹ پروگرام، آزاد جموں و کشمیر، گلگت بلتستان اتے خیبر پختونخوا دے غیر ضم شدہ ضلعیاں وغیرہ کیتے ہن۔ کفالت پروگرام کوں ہک کروڑ خانداناں تئیں پڄایا ویسی۔