آندے مالی سال دا 17 ہزار 573 ارب روپے حجم دا وفاقی بجٹ پیش، اقتصادی ترقی دی شرح 4.2 فیصد، افراط زردی شرح 7.5 فیصد متوقع، ملازمین دیاں تنخواہواں اچ 10 فیصد، پنشن اچ 7 فیصد ودھارے دی تجویز، ٹیکس محصولات دا حجم 14 ہزار 131 ارب روپے مقرر

اسلام آباد۔ 10 جون(اے پی پی)قومی اسمبلی اچ آندے مالی سال 2025-26ء دا 17 ہزار 573 ارب روپے حجم دا وفاقی بجٹ پیش کر ݙتا ڳیا، اقتصادی ترقی دی شرح 4.2 فیصد، افراط زر دی شرح 7.5 فیصد اَتے بجٹ خسارہ 3.9 فیصد متوقع اے۔ سرکاری ملازمین دیاں تنخواہواں اچ 10 فیصد جݙاں جو پنشن اچ 7 فیصد وادھارے دی تجویز اے۔ ایف بی آر ٹیکس محصولات دا حجم 14 ہزار 131 ارب روپے جݙاں جو نان ٹیکس ریونیو دا ہدف 5 ہزار 147 ارب روپے رکھݨ دی تجویز اے۔ تنخواہواں اچ فرق مکیندے ہوئیں اہل ملازمین کوں 30 فیصد ڈسپیریٹی ریڈکشن الائونس ݙیوݨ دی تجویز اے۔ جݙاں جو مسلح افواج دیاں ملکی سرحداں دے دفاع کیتے بہترین خدمات تے افسراں اَتے سپاہیاں کیتے سپیشل ریلیف الائونس ݙیوݨ دی تجویز اے۔ منگل کوں وفاقی وزیر خزانہ سینیٹر محمد اورنگزیب آندے مالی سال دا بجٹ پیش کریندے آکھیا جو مخلوط حکومت دا ݙوڄھا بجٹ پیش کرݨ اعزاز اے، وزیراعظم محمد شہباز شریف دی قیادت اچ اتحادی حکومت اچ شامل سیاسی جماعتاں دی قیادت خصوصاً محمد نوازشریف، بلاول بھٹو زرداری، خالد مقبول صدیقی، چوہدری شجاعت حسین، عبدالعلیم خان اَتے خالد حسین مگسی دا رہنمائی تے مشکور ہاں، اے بجٹ ہک ٻہوں اہم اَتے تاریخی موقع تے پیش کیتا ویندا پئے جݙاں قوم حالیہ ݙینہاں اچ غیر معمولی اتحاد، عزم اَتے ہمت ݙکھائی اے۔ بھارتی جارحیت دے مقابلے اچ ساݙی سیاسی قیادت افواج پاکستان اَتے غیور عوام جیڑھی جوان مردی، دانشمندی اَتے یکجہتی دا ثبوت ݙتے او تاریخ اچ سنہری ورقیاں اچ ہمیشہ یاد رکھیا ویسی، اے کامیابی ہک شاندار عسکری کامیابی دے علاوہ پوری قوم دے اجتماعی شعور، قومی وقار اَتے غیرت دا مظہر ہئی، ایں تے پاکستان دی عسکری اَتے سیاسی قیادت کوں مبارک ݙینداں۔ انہاں آکھیا جو ساݙیاں افواج اپݨی پیشہ وارانہ مہارت، شجاعت اَتے جذبہ قربانی نال دشمن کوں موثر اَتے بھرپور ولدا ݙتے جیندے نال نہ صرف ساݙیاں سرحداں دا دفاع ناقابل تسخیر بݨیا ٻھل عالمی برادری اچ پاکستان دا ماݨ وی ودھیے، ایں کامیابی سنیہا ݙتے جو پاکستانی قوم ہر آزمائش اچ متحد اَتے مادر وطن دے دفاع کیتے سیسہ پلائی ݙیوار بݨ ویندی اے۔ انہاں آکھیا جو ایں قومی عزم اَتے یکجہتی کوں استعمال کر تے ہݨ ساݙی توجہ معاشی استحکام، ترقی اَتے خوشحالی تے ہے، اساں جیڑھے جذبے نال قومی سلامتی کوں مضبوط بنیاداں تے کھڑا کیتے ایں ہی خلوص اَتے حوصلے نال ساکوں اپݨی معیشت کوں مستحکم اَتے عوام دی فلاح کوں یقینی بݨاوݨے۔ وزیر خزانہ آکھیا جو گزریل سوَا سال اچ قومی اتحاد اَتے عزم دے جذبے نال معاشی بحالی، اصلاحات اَتے ترقی دا سفر کامیابی نال طے کیتا اَتے معاشی اصلاحات، مالیاتی نظم و ضبط اَتے ترقیاتی منصوبہ بندی کوں ہکو ڄاہ کر تے نہ صرف معیشت کوں استحکام ݙتے ٻھل مستقبل دیاں بنیاداں وی مضبوط کیتن۔ وزیر خزانہ آکھیا جو ساݙی ترجیح ہک اینجھی معیشت ݙیوݨ اے ڄیڑھی ہر طبقے کوں ترقی دے ثمرات اَتے ماحولیات و وسائل دے تحفظ کوں یقینی بݨیندے دیرپا ترقی دا رستہ ہموار کرے۔ انہاں آکھیا جو ایہو وژن اساکوں ہک اینجھے پاکستان دو جتھاں ترقی، ہر ڄݨے دی درسال تئیں پڄے اَتے قوم بحیثیت مجموعی خوشحال ہووے، ایہو ساݙا عزم، ساݙی حکمت عملی اَتے ساݙا نعره اے۔ وزیر خزانہ گزریل سال معیشت دی بہتری کیتے چاتے ڳئے اہم اقدامات دا ݙسیندے آکھیا جو انہاں اقدامات نال مالی نظم و ضبط اچ نمایاں بہتری آئی، جی ڈی پی دے 2.4 فیصد دے برابر پرائمری سرپلس دا حصول، افراط زر اچ 4.7 فیصد تئیں نمایاں کمی، سرپلس کرنٹ اکاؤنٹ 1.5 ارب ڈالر تئیں ہووݨ دی امید، روپے دی قدر اچ استحکام، ترسیلات زر اچ 10 مہینے اچ 31 فیصد ودھارا اَتے سٹیٹ بینک دے ذخائر اچ 2 ارب ڈالر دا ودھارا شامل اے۔ اڄوکا مالی سال مکݨ تئیں ترسیلات زر دا حجم 38 ارب ڈالر جݙاں جو زرمبادلہ دے ذخائر 14 ارب ڈالر تئیں پڄݨ دی امید اے۔ وزیر خزانہ آکھیا جو اقتصادی بہتری کیتے حکومت کوں کئی سخت فیصلے گھنݨے پئے، پاکستان دے غیور عوام وی وݙیاں قربانیاں ݙتین جیندے دے مثبت نتائج سامݨے آئن۔ انہاں آکھیا جو ساݙے مائیکرواکنامک استحکام پروگرام دی کامیابی کوں بین الاقوامی سطح تے منیا ڳئے اَتے عالمی ریٹنگ دیاں ایجنسیاں اَتے مالیاتی اداریاں معیشت دی بہتری دی گواہی ݙتی۔ کاروباری اداریاں دے سربراہان دی معیشت اچ بہتری تے اعتماد 83 فیصد تئیں پڄ ڳئے۔ فچ پاکستان دی ریٹنگ کوں سی سی سی پلس توں ودھا تے بی نیگیٹیو کریندے ہوئیں معاشی بہتری دی تجویز ݙتی اے۔ ایشیائی ترقیاتی بینک، عالمی بینک اَتے آئی ایف سی نہ صرف پاکستان دی معیشت تے اعتماد ݙکھائے ٻھل پاکستان کیتے ودھ فنانسنگ ݙیوݨ دا وی اعلان کیتے۔ انہاں آکھیا جو وزیراعظم دی قیادت اچ ڳھٹ مد اچ حکومت مختلف شعبیاں اچ اہم کامیابیاں ڳھدن انہاں اچ ایف بی آر دی اصلاحات شامل ہن۔ ساݙا سب توں اہم معاشی مسئلہ محصولات دے نظام دیاں خامیاں ہن، ایف بی آر کوں ٹرانسفارم کیتے بغیر معیشت کوں مستحکم کرݨ اَتے قومی اہداف حاصل کرݨ ممکن نہ ہئی ایں سانڳے وزیراعظم دی سربراہی اچ ایف بی آر ٹرانسفارمیشن پلان شروع کیتا ڳئے جیںدے اچ وزیراعظم دی زیر نگرانی تفصیلی مشاورت نال منصوبہ ٻݨآیا ڳئے جیندی ستمبر 2024ء اچ منظوری ݙیتی ڳئی، ایں منصوبے دی بنیاد تریڄھے ستون پیپل، پراسیس اَتے ٹیکنالوجی تے رکھی ڳئی اے۔ وزیر خزانہ آکھیا جو ایں منصوبے دا محور ڈیجیٹل ٹرانسفارمیشن اے، پاکستان اچ پہلی واری ایںدی شروعات کیتی ڳئی اے جیندے تحت ڈیجیٹل پروڈکشن ٹریکنگ دا آغاز کیتے ڄیکوں ہݨ سیمنٹ، مشروبات، کھاد اَتے ٹیکسٹائل تئیں توسیع ݙتی ویندی پئی اے، ملک گیر سطح تے ای انوائسنگ دا اجراء اَتے جدید ٹیکنالوجی گھنݨ دے مینڈیٹ نال پی آر اے ایل بورڈ دی تشکیل نو تھی چُکی اے۔ وزیر خزانہ آکھیا جو ٹیکنالوجی دے نال نال اساں انسانی وسائل دی ترقی تے وی وݙی سرمایہ کاری کریندے پئے ہیں، آڈیٹرز دی استعداد کار ودھاوݨ کیتے نویں بھرتیاں کیتیاں ڳئن، افسراں کوں ریوارڈز محض سنیارٹی توں نئیں ٻھل انہاں دی کارکردگی، پیشہ وارانہ رویے اَتے دیانتداری نال مشروط کیتا ڳئے۔ وزیر خزانہ آکھیا جو ایں منصوبے دے ابتدائی نتائج حوصلہ افزاء رہن، چینی دے شعبے توں محصولات اچ 47 فیصد ودھارا تھیا، 9 ارب 80 کروڑ روپے دے جعلی ریفنڈ کلیمز کوں بلاک کیتا ڳیا۔ اے آئی تے مبنی آڈٹ سسٹم دے تحت 13 ارب 30 کروڑ روپے توں ودھ دے 200 کیسز دی نشاندہی کیتی ڳئی۔ فائلنگ اَتے ٹیکس ادا کرݨ آلیاں دی تعداد اچ 100 فیصد ودھارا تھئے اَتے محاصل 45 ارب توں ودھ تے 105 ارب روپے تئیں پڄ ڳئن۔ انہاں ݙسیا جو یکم جولائی توں 800 کالم آلا ریٹرن سادہ فارمیٹ اچ وݙا ݙیتا ویسی، اے سوکھا اَتے صارف دوست ریٹرن خاص طور تے تنخواہ دار اَتے چھوٹے کاروباراں کیتے متعارف کرایا ویندا پئے۔ وزیر خزانہ آکھیا جو تاریخ اچ پہلی واری آئی ایم ایف قوانین دے نفاذ دے ذریعے 389 ارب روپے دے محصولات کوں باضابطہ منیے، اے غیر معمولی اعتراف ساݙے اصلاحاتی اقدامات دی طاقت، وسعت اَتے ساکھ دا واضح ثبوت اے اَتے آئی ایم ایف دا پاکستان دی اصلاحات تے اعتماد دا مظہر اے۔ وزیر خزانہ آکھیا جو کوئی منی بجٹ آندا پئے اَتے نہ ہی کوئی اضافی ٹیکس لایا ڳئے۔ ایف بی آر حکومت دی کامیاب حکمت عملی پاروں کامیاب مقدمہ بازی نال 78 ارب روپے توں ودھ دے محاصل وصول کیتن۔ وزیر خزانہ آکھیا جو پاور سیکٹر معاشی ترقی کیتے اہمیت دا حامل اے، اساں معاشی ترقی دے حصول اَتے ملک دی صنعت کیتے بجلی دی اہمیت سانڳے صنعتی شعبے کیتے بجلی دی قیمت اچ 31 فیصد توں ودھ کمی کیتی اے۔ آئی پی پیز نال معاہدیاں تے نظر ثانی نال 3 ہزار ارب روپے توں ودھ دی بچت تھیسی۔ ماحول کیتے نقصان ݙیوݨ آلے 3 ہزار میگاواٹ توں ودھ فرنس آئل پاور پلانٹس کوں بند کرݨ اچ کامیاب تھئے ہیں۔ گوجرانوالہ، فیصل آباد اَتے اسلام آباد دیاں 3 ݙسٹری بیوشن کمپنیاں دی نجکاری دا ادھا کم مکمل تھی ڳئے۔ این ٹی ݙی سی دی تنظیم نو کر تے اوکوں 3 نویاں کمپنیاں اچ ونڈ ݙتے، بجلی دی تقسیم کار کمپنیاں دا انتظام پیشہ وارانہ بورڈز کوں ݙے تے انہاں توں سیاسی مداخلت مکا ݙتی اے جیندے نال کمپنیاں صرف 9 مہینے اچ نقصانات اچ 140 ارب روپے دی کمی کیتی اے۔ اگلے پنج سالاں اچ کمپنیاں دے انہاں نقصانات کوں مکمل طور تے ختم کر ݙتا ویسی۔ بجٹ دے شعبے اچ مسابقتی اَتے آزاد مارکیٹ دے قیام کیتے قانون سازی اَتے ضوابط کوں حتمی شکل ݙے ݙتی ڳئی اے۔ اگلے 3 مہینے اچ ایںدے تے عمل درآمد شروع تھی ویسی۔ پاکستان دی تاریخ اچ پہلی واری توانائی بچت دے حصول تے مبنی بلڈنگ کوڈز منظور کیتے ڳئن، سستی بجلی دے حصول کیتے جامع منصوبہ بندی کر گھدی اے، جیندے نال آوݨ آلے ݙینہاں اچ سستی بجلی دا حصول ممکن ہوسی، ایں منصوبے دے تحت ہݨ تئیں 4 ہزار ارب روپے توں ودھ دی بچت کیتی اے اَتے 9 ہزار میگاواٹ گنجائش دے مہانگے بجلی گھر جنہاں کوں نیشنل گرڈ اچ رلاوݨا ہئی، ترک کر ݙتن۔ وزیر خزانہ آکھیا جو گزریل کجھ سالاں اچ پاکستان دے تیل اَتے گیس دے شعبے اچ اصلاحات کیتیاں ڳئن جنہاں نال سرمایہ کاری وچ ودھارا تھئے۔ انہاں آکھیا جو ریکوڈیک اچ واقع تانبے اَتے سوݨے دیاں کاناں ساݙے مستقبل دا ہک اہم اثاثہ ہن، حکومت ایں اثاثے کوں مفید بݨاوݨ تے توجہ ݙیندی پئی اے، ایں منصوبے دی فیزیبلٹی سٹڈی جنوری 2025ء اچ مکمل کیتی ڳئی، کان کݨی دی متوقع مدت 37 سال اے جیندے نال ملک کوں 75 ارب ڈالر توں ودھ دے کیش فلوز ملسن۔ 41 ہزار 500 ملازمتاں ملسن، منصوبے توں 7 ارب ڈالر دے ٹیکس اَتے 7 ارب 80 کروڑ ڈالر دی رائیلٹی متوقع اے۔ برآمدات اچ سوکھ کݙھݨ کیتے ریکوڈیک توں پورٹ قاسم اَتے گوادر تئیں سڑک اَتے ریل دے ذریعے نقل و حمل دے بنیادی ڈھانچے دی تعمیر جاری اے۔ اے منصوبہ پاکستان دی معیشت اچ گیم چینجر ثابت تھیسی۔ ٹیرف اصلاحات دا ڈسیندے انہاں آکھیا جو حکومت ساز گار کاروباری ماحول پیدا کرݨ، سرمایہ کاری دی حوصلہ افزائی اَتے برآمدات کوں ودھاوݨ کیتے پرعزم اے۔ وزیراعظم دی ہدایت دے مطابق چار سال اچ اضافی کسٹم ݙیوٹی دے خاتمے، پنج سال اچ ریگولیٹری ݙیوٹیز دے خاتمے، کسٹم ایکٹ 1969ء دے پنجویں شیڈول دا پنج سالاں اچ مکݨ، کل 4 کسٹمز ݙیوٹی سلیوز اَتے ودھ توں ودھ کسٹم ݙیوٹی دی حد 15 فیصد تئیں گھن آوݨ دی ٹیرف اصلاحات کوں قومی ٹیرف پالیسی 2025-30ء دا حصہ بݨایا ویندا پئے جیکوں مرحلہ وار لاگو کیتا ویسی۔ انہاں آکھیا جو ورلڈ بینک دے مطابق انہاں اصلاحات دے کامیاب نفاذ دے بعد پاکستان دے اوسط ٹیرف خطے اچ سب توں گھٹ تھی ویسن۔ قرضیاں دے انتظام اچ بہتری دے حوالے نال چاتے ڳئے اقدامات بارے وزیر خزانہ آکھیا جو ݙو ݙہاکیاں توں ساݙی معیشت قرضیاں اچ جکڑی ہوئی اے۔ اڄ توں ݙو سال پہلے ڈیٹ ٹو جی ڈی پی شرح 74 فیصد ہئی جیڑھی ہݨ گھٹ تھی تے 70 فیصد توں وی ہیٹھ آ ڳئی اے۔ پاکستان دے پہلے ڈیٹ بائی بیک پروگرام دے تحت ہک ہزار ارب روپے دے قرض بائی بیک (Buy back) کیتے ڳئن، ہک فعال ری فنانسنگ پروگرام دے تحت مارک اپ اچ ریکارڈ 850 ارب روپے توں ودھ دی بچت کیتی ڳئی، قرضیاں دی ایوریج ٹائم ٹو میچورٹی اچ 66 فیصد ودھارا کیتا ڳیا جیںدے نال ری فنانسنگ رسک گھٹ اَتے مالیاتی استحکام اچ ودھارا تھیا۔ انہاں آکھیا جو پہلے پانڈا بانڈ دے اجراء دی تیاری مکمل کر گھدی ڳئی اے جیندا مقصد دنیا دی سب توں وݙی اَتے گہری چینی کیپٹل مارکیٹ تئیں پاکستان دی رسائی ممکن بݨاوݨ اے۔ انہاں آکھیا جو ایس او ایز حکومتی خزانے تے 800 ارب روپے توں ودھ دا سالانہ بوجھ پیندے ہن، ایںدے اچ سبسڈیز، گرانٹس اَتے ایکویٹی دی مد اچ ݙیتی ڳئی حکومتی امداد کوں رلایا ونڄے تاں اے تخمینہ ہک ٹریلین روپے سالانہ توں ودھ ویندے۔ حکومت مستقبل اچ نجکاری، تشکیل نو اَتے ٹرپل پی ماڈل دا تعین کیتے، کابینہ دی ہک کمیٹی دے ذریعے ایں دی درجہ بندی کوں مکمل کر گھدا ڳئے۔ انہاں آکھیا جو عوامی شعبے دی کارکردگی کوں بہتر بݨاوݨ، مالی بوجھ کوں گھٹ کرݨ اَتے سرمایہ کاری کوں ودھاوݨ کیتے حکومت ہک جدید اَتے متحرک نجکاری حکمت عملی تے عمل پیرا اے۔ اے حکمت عملی غیر ضروری سرکاری اداریاں دی شفاف اَتے موثر نجکاری تے مرکوز اے تاں جو مختلف شعبیاں، بالخصوص توانائی اَتے مالیاتی شعبے اچ مسابقت، کارکردگی اَتے نجی سرمایہ کاری کوں ودھایا ونڄ سڳے۔ انہاں آکھیا جو مالی سال 26-2025 اچ ساݙا ہدف اے جو اساں پی آئی اے اَتے روزویلٹ ہوٹل، جینکوز اَتے ݙسکوز جھیں کلیدی اثاثیاں دی نجکاری کوں مکمل کروں اَتے ٹرانزیکشن کیتے پالیسی اَتے ضابطہ جاتی اصلاحات کوں اڳوں ودھایا ونڄے۔ منتظم پبلک لسٹنگ اَتے آفرز دے ذریعے ساݙا مقصد اے جو سرکاری اثاثیاں کوں سٹاک مارکیٹ اچ شامل کیتا ونجے تاں جو مارکیٹ اچ شفافیت ودھے، سرمایہ کاراں دی شرکت ممکن تھیوے اَتے عوام دی معیشت اچ شمولیت کوں ودھایا ونڄ سڳے۔ انہاں وفاقی حکومت دی رائٹ سائزنگ بارے آکھیا جو اساں وفاقی حکومت دی ادارہ جاتی تشکیل کوں وزیراعظم دے ویژن دے مطابق درست، منتظم اَتے جدید بݨاوݨ شروع کر ݙتے۔ اے اہم اَتے بنیادی اصلاحات ایں اصول تے مبنی ہین جو حکومت عوامی سہولتاں دی فراہمی کیتے ٹیکس ݙیوݨ آلیاں تے گھٹ توں گھٹ ٻھار سٹے۔ وزیر خزانہ آکھیا جو جدید آئیڈیاز کیتے سازگار ماحول پیدا کرݨ کیتے اساں چاہندے ہیں جو حکومت کاروباری معاملات اچ حصہ نہ گھنے، نجی شعبہ ایں سانڳے لیڈ کرے۔ ہݨ تئیں کابینہ ݙاہ وزارتاں دیاں رائٹ سائزنگ دے منصوبیاں دی منظوری ݙے ݙتی اے جو ہݨ عملدرآمد دے مرحلے اچ ہن، چھ ݙویژناں کوں ضم کر تے 3 بݨا ݙتا ڳئے۔ 45 کمپنیاں کوں پرائیویٹائز، ضم یا بند کیتا ویندا پئے۔ تقریباً چالھی ہزار خالی آسامیاں کوں ختم کر ݙتا ڳئے۔ اڳلیاں ݙاہ وزارتاں کیتے رائٹ سائزنگ دیاں سفارشات کوں حتمی شکل ݙیتی ونڄ چُکی اے جݙاں جو مزید اَٹھ وزارتاں دے حوالے نال تجاویز زیر غور ہن۔ پنشن ریٹائرڈ ملازمین دا بنیادی حق اے۔ پچھلیاں کجھ ݙہاکیاں اچ پنشن سکیم اچ ایگزیکٹو آڈرز دے ذریعے تبدیلیاں کیتیاں ڳئن جیںدی وجہ توں سرکاری خزانے تے بوجھ ودھے۔ انہاں آکھیا جو پنشن سکیم کوں درست کرݨ اَتے سرکاری خزانے تے بوجھ کوں گھٹ کرݨ کیتے حکومت پنشن سکیم اچ اصلاحات کیتین جیڑھیاں پہلے توں ریٹائرمنٹ دی حوصلہ شکنی، پنشن ودھارا، سی پی آئی نال منسلک، شریک حیات دے انتقال دے بعد فیملی پنشن دی مدت 10 سال کرݨ، ہک توں ودھ پنشنز دا خاتمہ اَتے ریٹائرمنٹ دے بعد ولا ملازمت دی صورت اچ پنشن یا تنخواہ اچوں ہک کوں چݨݨ شامل اے۔ وزیر خزانہ آکھیا جو ماحولیاتی تبدیلی پاکستان دی بقاء دا مسئلہ اے، ایںدے منفی اثرات دا سدباب حکومت دیاں اہم ترجیحات ہین، ورلڈ بینک اَتے آئی ایف سی اپݨے کنٹری پارٹنر شپ فریم ورک دے تحت پاکستان کوں اگلے ݙاہ سال اچ چالھی ارب ڈالر دے وسائل ݙیسن۔ ہک سال دی انتھک محنت دے بعد آئی ایم ایف پاکستان کیتے ہک ارب 40 کروڑ ڈالر دی ریزیلینس و سسٹین ایبلٹی فیلسٹی ݙتی اے۔ حکومت پاکستان پہلے گرین سکوک دا وی اجراء کیتے۔ بینظیر انکم سپورٹ پروگرام سودھا سماجی تحفظ دے اقدامات دا ݙسیندے وزیر خزانہ آکھیا جو ساݙی حکومت ہک جامع اَتے موثر سماجی تحفظ دے نظام دے ذریعے معاشرے دے کمزور توں کمزور طبقات دے تحفظ کیتے پرعزم اے۔ جاری مالی سال 25-2024 دے دوران، بینظیر انکم سپورٹ پروگرام کم آمدنی آلے خانداناں کوں معاشی مشکلات توں بچاوݨ کیتے اہم کردار ادا کیتا۔ 592 ارب روپے دے مختص فنڈز اچوں ہک کثیر رقم دے ذریعے 99 لکھ مستحق خانداناں کوں غیر مشروط نقد امداد ݙتی ڳئی۔ انہاں آکھیا جو ایںدے علاوہ ہک کروڑ سولہ لکھ ٻالاں کوں تعلیمی وظائف دی شکل اچ مالی معاونت ݙتی ڳئی۔ بینظیر انکم سپورٹ پروگرام دے نشوونما پروگرام دے تحت 15 لکھ حاملہ عورتاں اَتے انہاں دے 16 لکھ ٻالاں کوں نقد امداد اَتے غذائیت تے مبنی خصوصی خوراک ݙتی ڳئی۔ انہاں آکھیا جو مالی شمولیت سانڳے سال اچ ݙو لکھ پنجاہ ہزار (250,000) مستحقین کوں فنانشل لٹریسی دی تربیت ݙیتی ڳئی۔ وزیر خزانہ ݙسیا جو آئی ٹی دا شعبہ اپݨی برآمدات دی صلاحیت دی وجہ توں ملکی معیشت دا ہک انتہائی اہم حصہ بݨ چُکیے۔ ڈیجیٹل گورننس اَتے سائبر سیکورٹی دے حوالے نال پاکستان دیاں خدمات دا بین الاقوامی سطح تے اعتراف کیتا ڳئے۔ گلوبل سائبر سیکورٹی انڈیکس، ای گورنمنٹ انڈکس، آئی سی ٹی ڈویلپمنٹ انڈکس اچ پاکستان دی ودھدی رینکنگ ملک دے آئی ٹی شعبے دی ترقی دا ثبوت اے۔ اڄوکے مالی سال پاکستان دی آئی ٹی برآمدات متاثر کن ودھین، آڄوکے مالی سال دے 10 مہینے چ اے برآمدات 3 ارب 10 کروڑ ڈالر تئیں پڄ چُکیاں ہن جیڑھیاں پچھلے سال دی نسبت 21.2 فیصد ودھ ہین۔ اگلے 5 سالاں اچ آئی سی ٹی برآمدات کوں 25 ارب ڈالر تئیں ودھاوݨ دی منصوبہ بندی کیتی اے۔ انہاں آکھیا جو ایس ایم ایز سانڳے وزیراعظم ہک اسٹیئرنگ کمیٹی تشکیل ݙتی اے تاں جو سارے سرکاری اداریاں دیاں مربوط کوششاں نال ایں شعبے کوں ودھایا ونڄ سڳے۔ سمیݙا 27-2024 کیتے 3 سالہ کاروباری منصوبہ ٻݨائے جیندے اہم اجزاء اچ ایس ایم ای فنانسنگ اچ وادھا، برآمدات دا فروغ، صنعتاں وچال روابط، عورتاں دی کاروباری شراکت اَتے موسمیاتی تبدیلیاں دے اثرات توں تحفظ شامل ہن۔ انہاں آکھیا جو ہک وݙی کامیابی ایس ایم ای رسک کوریج سکیم اے جیںدے تحت مئی 2025ء تئیں 95 ہزار توں ودھ ایس ایم ایز کوں 311 ارب روپے توں ودھ دی مالی معاونت ݙتی ڳئی۔ ایں سانڳے کل ایس ایم ای فنانس 471 ارب روپے توں ودھ تے 641 ارب روپے تھی ڳئے جݙاں جو مستفید تھیوݨ آلے کاروباراں دی تعداد ہک لکھ چوہتر ہزار توں ودھ تے ݙو لکھ 62 ہزار تئیں پڄ ڳئی اے۔ انہاں آکھیا جو حکومت دا عزم اے جو 2028 تئیں ایس ایم ای فنانس کوں 1100 ارب روپے تئیں ودھایا ونجے اَتے مستفید کاروباراں دی تعداد ست لکھ پنجاہ ہزار تئیں پڄائی ونجے۔ انہاں آکھیا جو اسٹیٹ بینک آف پاکستان بینکاں، فین ٹیک اداریاں اَتے ݙوجھے اسٹیک ہولڈرز دے نال رَل تے ایس ایم ای فنانس دے نظام کوں بہتر بݨاوݨ کیتے سرگرم اے۔ انہاں ضوابط دا مقصد بینکاں کوں ودھ لچک ݙیوݨ، قرضے دے حصول دا عمل سوکھا بݨاوݨ، ٹیکنالوجی دے استعمال کوں ودھاوݨ اَتے ضمانت دیاں شرطاں کوں نرم کرݨ اے۔ انہاں آکھیا جو وزیراعظم پاکستان سماجی و اقتصادی ترقی دیاں سکیماں کوں ودھاوݨ چاہندن جیندا عوام دی فلاح و بہبود تے ݙاݙھا اثر پوسی۔ انہاں آکھیا جو معاشرے دے کم آمدنی آلے طبقے کوں گھراں دی خرید یا تعمیر کیتے سستے قرضے ݙتے ویسن جیندے نال کئی شعبیاں اچ معاشی سرگرمیاں ودھسن اَتے ہنر منداں کیتے نویں روزگار نکلسن، ایں منصوبے دیاں تفصیلات دا اعلان تیکھے اسٹیٹ بینک آف پاکستان کریسی۔ انہاں آکھیا جو بیرون ملک مقیم پاکستانی ساݙا ہک اہم اثاثہ ہن جنہاں اڄوکے مالی سال دے پہلے 10 مہینے اچ 31.2 ارب ڈالر دی ترسیلات زر پاکستان بھیڄن جیڑھیاں پچھلے سال دے مقابلے اچ 31 فیصد ودھ ہین۔ پچھلے ݙو سالاں اچ ترسیلات زر دے حجم اچ 10 ارب ڈالر دا وادھا تھئے، امید اے بیرون ملک مقیم پاکستانی ملکی ترقی اچ ایویں ہتھ ولیندے رہسن۔ انہاں آکھیا جو کرنٹ اکاؤنٹ اچ بہتری آئی اے۔ ساݙی حکومت بیرون ملک پاکستانیاں کوں مزید سہولتاں ݙیسی، بیرون ملک مقیم پاکستانیاں کیتے کئی اقدامات کیتن جیندے اچ خصوصی عدالتاں دا قیام، مقدمیاں دی رجسٹریشن اَتے شواہد کٹھے کرݨ کیتے آن لائن سسٹم متعارف کراوݨ اَتے کوڑے مقدمیاں توں بچاؤ کیتے متعلقہ ضابطہ دیوانی اچ تبدیلی کیتی ویسی۔ بیرون ملک مقیم پاکستانیاں دے ٻالاں کیتے وفاقی حکومت توں چارٹرڈ یونیورسٹیاں اَتے میڈیکل کالجاں اچ کوٹہ رکھیا ویندا پئے اَتے سکل ٹریننگ کیتے وظائف ݙتے ویسن۔ ایںدے علاوہ اسٹیٹ بینک دے ذریعے ودھ ترسیلات بھیجݨ آلے 15 افراد کوں ہر سال 14 اگست کوں سول ایوارڈز ݙتے ویسن۔ انہاں آکھیا جو زراعت ملکی معیشت دی ریڑھ دی ہݙی اے۔ زراعت دا ملکی معیشت اچ حصہ تقریباً 24 فیصد اے، ایں سانڳے وزیراعظم ہک قومی کمیٹی ٻݨائی اے جیڑھی زراعت دے ودھارے کیتے صوبیاں نال بامقصد مشاورت کریسی، زرعی شعبے کوں قرض فراہمی اچ ودھارا تھئے اَتے اے رقم پچھلے مالی سال دے پہلے 10 مہینے اچ 1,785 ارب روپے توں ودھ تے ایں مالی سال دے پہلے ݙاہ مہینے اچ 2,066 ارب روپے تئیں پڄ چُکی اے۔ زراعت دے شعبے خصوصاً چھوٹے کساناں کوں قرض کیتے کئی نویں اقدامات چاتے ڳئن۔ ہک نواں کلین فنانسنگ فیسلٹی پروگرام شروع کیتا ویندا پئے جیںدے تحت بینک چھوٹے کساناں کوں بغیر کہیں ضمانت دے ہک لکھ روپے تئیں دے قرضے ݙیسن۔ اے رقم ڈیجیٹل سسٹم دے ذریعے کساناں دے ای والٹس اچ ٹرانسفر کیتی ویسی، چھوٹے کساناں کوں ݙتے ونجݨ آلے قرضیاں تے حکومت بینکاں کوں پورٹ فولیو تے 10 فیصد نقصانات دے ازالے دے طور تے ݙیسی۔ اے سہولت اینجھے علاقیاں اچ ݙتی ویسی جتھاں فنانسنگ دی سہولت دستیاب کائنی۔ ایں سکیم توں ساݙھے 7 لکھ کسان فائدہ چیسن۔ انہاں آکھیا جو حکومت پاکستان بیج دے شعبے دی بہتری کیتے اہم اقدامات کیتن جنہاں اچ نیشنل سیڈ ڈویلپمنٹ اینڈ ریگولیٹری اتھارٹی دا قیام شامل اے تاں جو معیاری، موسمیاتی تبدیلیاں دے مطابق بیجاں دی فراہمی یقینی بݨائی ونڄ سڳے۔ وزارت قومی غذائی تحفظ و تحقیق بیج دے نظام کوں ڈیجیٹل بنیاداں تے منظم کرݨ شروع کیتے جیںدے اچ کمپنی رجسٹریشن، تجدید، بیج دی تصدیق، نگرانی اَتے نفاذ شامل ہن۔ انہاں آکھیا جو نجی شعبے دی تحقیق اَتے سرمایہ کاری دے فروغ کیتے وی اقدامات کیتے ویندے پئے ہن۔ نیشنل سیڈ پالیسی 2025 اَتے نیشنل ایگریکلچرل بائیوٹیکنالوجی پالیسی 2025 منظوری دے آخری مرحلیاں وچ ہن جݙاں جو پلانٹ بریڈرز رائٹس ایکٹ کوں وی ترجیح ݙیتی ویندی پئی اے تاں جو اختراع دی حفاظت اَتے تحقیق و ترقی کوں ودھایا ونڄ سڳے۔ وزیر خزانہ نے آکھیا جو کپاہ دی فصل دی بحالی کیتے وی مربوط کوششاں کیتیاں ڳئن جو پاکستان دی معیشت اَتے ٹیکسٹائل صنعت دا ستون اے۔ اگرچہ حالیہ سالاں وچ کپاہ دی پیداوار وچ کمی تھئی تاں جو 2023 وچ مثبت پیش رفت ݙیکھݨ وچ آئی اَتے 2024 وچ حکومتی کوششاں دے باوجود موسمی مسلیاں دی وجہ توں پیداوار متاثر تھئی۔ انہاں آکھیا جو حکومت ہر ممکن کوشش کریسی جو کپاہ دی کاشت دے اعتماد کوں بحال کیتا ونڄ سڳے۔ انہاں آکھیا جو خصوصی اقتصادی سرمایہ کاری کونسل دے تحت توانائی، معدنیات، زرعی کاروبار، آئی ٹی ٹین ٹیک، انفراسٹر، افرادی قوت دی ترقی اَتے سیاحت سودھا مختلف شعبیاں اچ 100 توں ودھ اسٹریجک گرین فیلڈ اَتے بران فیلڈ منصوبیاں کوں تیز رفتاری نال اڳوں ودھایا ڳیا، جیںدے نال مالی سال 25-2024 اچ براہ راست غیر ملکی سرمایہ کاری ودھی۔ انہاں آکھیا جو بین الصوبائی اَتے بین الوزارتی روابط اچ بہتری اَتے غیر ضروری ضابطہ جاتی رکاوٹاں مکاوݨ نال ایس آئی ایف سی سرمایہ کاراں دا اعتماد بحال کیتا، نقل و حمل اَتے لاجسٹک دا نظام بہتر بݨایا اَتے مالی سال 26-2025 کیتے برآمدات تے مبنی صنعتی ترقی دے ایجنڈے دی مضبوط بنیاد رکھی۔ وزیر خزانہ آکھیا جو بجٹ مسابقتی معیشت کیتے ترتیب ݙتی ڳئی حکمت عملی دا آغاز اے جیںدے نال برآمدات اچ ودھارا ہوسی، زرمبادلہ دے ذخائر ودھسن تاں جو ادائیگیاں اچ عدم توازن توں بچیا ونڄ سڳے اَتے نال ہی نال اقتصادی پیداواریت کوں ودھایا ونڄ سڳے۔ بجٹ دی حکمت بنیادی تبدیلیاں گھن تے معیشت دے ݙی این اے کوں تبدیل کرݨ اے ۔ انہاں آکھیا جو مالی سال 26ـ2025 کیتے اقتصادی ترقی دی شرح 4.2 فیصد رہݨ دا امکان اے۔ افراط زر دی اوسط شرح 7.5 فیصد متوقع اے۔ بجٹ خسارہ جی ڈی پی دا 3.9 فیصد جݙاں جو پرائمری سرپلس جی ڈی پی دا 2.4 فیصد ہوسی۔ ایف بی آر دے محصولات دا تخمینہ 14 ہزار 131 ارب روپے اے جیڑھا اڄوکے مالی سال توں 18.7 فیصد ودھ اے۔ وفاقی محصولات اچ صوبیاں دا حصہ 8 ہزار 206 ارب روپے ہوسی۔ وفاقی نان ٹیکس ریونیو دا ہدف 5 ہزار 147 ارب روپے مقرر کیتا ڳئے، وفاقی حکومت دی خالص آمدنی 11 ہزار 72 ارب روپے ہوسی۔ وفاقی حکومت دے کل اخراجات دا تخمینہ 17 ہزار 573 ارب روپے اے، جیںدے اچوں 8 ہزار 207 ارب روپے سود دی ادائیگی کیتے مختص ہوسن۔ وفاقی حکومت دے جاری اخراجات دا تخمینہ 16 ہزار 286 ارب روپے اے، وفاقی حکومت دے سرکاری ترقیاتی پروگرام کیتے 1 ہزار ارب روپے دا بجٹ مختص کیتا ڳئے۔ وزیر خزانہ آکھیا جو ملکی دفاع حکومت دی اہم ترین ترجیح اے اَتے ایں قومی فرض کیتے 2 ہزار 550 ارب روپے ݙتے ویسن۔ سول انتظامیہ دے اخراجات کیتے 971 ارب روپے رکھیے ویندے پئن۔ پنشن دے اخراجات کیتے 1 ہزار 55 ارب روپے رکھین۔ بجلی اَتے ݙوجھے شعبیاں کیتے سبسڈی دے طور تے 1 ہزار 186 ارب روپے دی رقم رکھی ویندی پئی اے۔ گرانٹس دی مد اچ 1 ہزار 928 ارب روپے رکھین جیڑھے بینظیر انکم سپورٹ پروگرام، آزاد جموں و کشمیر، گلگت بلتستان اَتے خیبر پختونخوا دے ٻئے ضم شدہ ضلعیاں وغیرہ کیتے ہین۔ کفالت پروگرام کوں ہک کروڑ خانداناں تئیں پڄایا ویسی۔ تعلیمی وظائف پروگرام کوں ودھایا ویسی۔ اگلے مالی سال بی آئی ایس پی کیتے 716 ارب روپے رکھݨ دی تجویز اے جیڑھی پچھلے سال دے مقابلے اچ 21 فیصد ودھ اے۔ جاری اخراجات توں آزاد جموں و کشمیر کیتے 140 ارب روپے، گلگت بلتستان کیتے 80 ارب روپے، خیبر پختونخوا دے ضم شدہ ضلعیاں کیتے 80 ارب روپے اَتے بلوچستان کیتے 18 ارب روپے رکھݨ دی تجویز اے۔ وزیر خزانہ آکھیا جو وفاقی ترقیاتی پروگرام ملکی اَتے بیرونی مالی وسائل کوں متحرک کرݨ دا ہک اہم ذریعہ اے جیںدا مقصد معیشت دے مختلف شعبیاں اچ ترقی ودھاوݨ اے۔ موجودہ مالی حالات سانڳے قومی اقتصادی کونسل مالی سال 2025ـ26 کیتے 4 ہزار 224 ارب روپے دے قومی ترقیاتی اخراجات دی منظوری ݙے ݙتی اے جیںدے اچ 1 ہزار ارب روپے وفاقی پی ایس ڈی پی اَتے 2 ہزار 869 ارب روپے صوبائی سالانہ ترقیاتی پروگرامز دے علاوہ ایس او ایز دی اپݨے وسائل نال 355 ارب روپے دی سرمایہ کاری شامل اے۔ وزیر خزانہ آکھیا جو وفاقی پی ایس ڈی پی 26ـ2025 دا محور بنیادی ڈھانچہ دے منصوبے ہن، جنہاں تے 60 فیصد توں ودھ وسائل خرچ کیتے ویندے پئن تاں جو پورے ملک کوں فائدہ پڄے۔ جݙاں جو Provincial ADPs صوبائی پی ایس ڈی پی دی ترجیح سماجی شعبے ہن جنہاں کیتے 60 فیصد توں ودھ رقماں رکھیاں ڳئن۔ اے رجحان آئین اچ اٹھارویں ترمیم دے بعد ذمیداریاں دی ونݙ تے عمل درآمد دا ثبوت اے۔ انہاں آکھیا جو وفاقی ترقیاتی پروگرام اچ ٹرانسپورٹ انفراسٹرکچر سیکٹر (سڑکاں، ریلوے، سمندری اَتے ہوائی ٹرانسپورٹ) شامل ہن۔ تاں جو اڑان پاکستان اَتے ہزاریہ ترقیاتی اہداف حاصل کیتے ونڄ سڳن۔ وفاقی حکومت پی ایس ڈی پی 26ـ2025 دے مجموعی 1 ہزار ارب روپے وچوں 328 ارب روپے دے سب توں بھاری فنڈز ٹرانسپورٹ انفراسٹرکچر منصوبیاں کیتے رکھین۔ میری ٹائم دے شعبے اچ گڈانی شپ بریکنگ اپ گریڈیشن دے منصوبے کیتے 1.9 ارب روپے، گوادر پورٹ دے بنیادی ڈھانچہ دے منصوبیاں کیتے پی ایس ڈی پی توں معاونت دا تسلسل برقرار رکھیا ڳیا اے۔ صوبائی ٹرانسپورٹ منصوبیاں کیتے امداد جاری رکھی ڳئی اے اَتے صوبائی منصوبیاں کیتے ودھ فنڈز رکھین۔ وزیر خزانہ آکھیا جو اڄوکی پاک بھارت جنگ دے بعد بھارت پاکستان دا پاݨی روکݨ دی دھمکی ݙتی اے اتے او پاݨی کوں بطور ہتھیار استعمال کرݨ دی کوشش اچ اے، پاݨی کوں روکݨ دی کہیں کوشش کوں کامیاب نا تھیوݨ ݙتا ویسی، ایندے نال نال ضروری اے جو اساں اپݨے آبی ذخائر اچ جنگی بنیاداں تے وادھا کروں، حکومت محدود وسائل دے باوجود پاݨی دے ذخائر دے منصوبیاں تے عمل درآمد کریسی اتے تیکھے ایں سانڳے تفصیلی حکمت عملی دا اعلان کیتا ویسی۔ پاکستان کوں بھارتی آبی جارحیت دے نال نال پاݨی دی قلت، فوڈ سیکورٹی، پہاڑی ندی نالیاں توں آوݨ آلے طغیانی، ریلیاں کوں روکݨ، سیلاب دی روک تھام دے اقدامات اَتے موسمیاتی تبدیلی دے مسلیاں جھیں چیلنجز دا سامݨا اے جیندے کیتے حکومت نیشنل واٹر پالیسی 2018 دے تحت جامع آبی وسائل دے نظم ونسق دے طریقہ کار سانڳے مختلف اہداف رکھین جیندے اچ پاݨی ذخیرہ کرݨ اچ 10 ملین ایکڑ فٹ دا وادھا، پاݨی دے ضیاع اچ 33 فیصد دی کمی، پاݨی دے استعمال دی کفایت اچ 30 فیصد وادھا اَتے سندھ طاس آبپاشی نظام دی مانیٹرنگ شامل ہن۔ گزریل سال 59 آبی منصوبیاں اچوں 34 منصوبے مکمل کیتے ڳئن جنہاں دی مجموعی لاگت 295 ارب روپے رہی۔ موجودہ مالی سال اچ آبی وسائل ݙویژن کیتے کل 133 ارب روپے مختص کیتے ڳئن۔ جنہاں اچ 34 ارب جاری آبی منصوبیاں اچ مزید سرمایہ کاری کیتے 102 ارب روپے رکھے ڳئن، جنہاں اچوں 95 ارب روپے 15 اہم منصوبیاں کیتے مختص کیتے ڳئن جو پاݨی ذخیرہ کرݨ، سیلاب توں تحفظ، انڈس بیسن تے ٹیلی میٹری سسٹم اَتے پاݨی دے تحفظ بارے ہن۔ دیامربھاشا ݙیم کیتے 32.7 ارب روپے، مہمند ݙیم کیتے 35.7 ارب روپے، کراچی بلک واٹر سپلائی کے فور منصوبے کیتے 3.2 ارب روپے، کلری باغار فیڈر کینال دی لائننگ کیتے 10 ارب روپے، اَتے انڈس بیسن سٹم تے ٹیلی میٹری سسٹم کیتے 4.4 ارب روپے رکھے ڳئن۔ ایویں ہی پٹ فیڈر کینال کیتے 1.8 ارب روپے اَتے کچھی کینال فلڈ ݙیمیجز پراجیکٹ کیتے 69 کروڑ روپے مختص کیتے ڳئن۔ آواران، پنجگور، گروک، اَتے گیشکور ݙیمز کیتے 5 ارب روپے رکھیے ڳئن۔ وزیر خزانہ آکھیا جو سارے شہریاں کوں سستی اتے قابلِ اعتماد انرجی ݙیوݨ ساݙی ترجیح اے، ایں سانڳے مالی سال 26ـ2025 دے ترقیاتی پروگرام اچ توانائی دے شعبے دیاں 47 ترقیاتی سکیماں کیتے 90.2 ارب روپے مختص کیتے ڳئن۔ تربیلہ دے پنجویں توسیعی منصوبے کیتے 84 کروڑ روپے، داسو پن بجلی منصوبے کیتے 10.9 ارب روپے، سوکی کناری کیتے 3.5 ارب روپے اتے مہمند پن بجلی منصوبے کیتے 2 ارب روپے رکھے ڳئن۔ بجلی دی ترسیل دے نظام کوں مضبوط بݨاوݨ کیتے 500 کے وی مٹیاری موروـ رحیم یار خان ٹرانسمیشن لائن بچھاوݨ کیتے 1 ارب روپے مختص کیتے ڳئن۔ نمایاں مختص رقماں اچ 4.4 ارب روپے علامہ اقبال انڈسٹریل سٹی گرڈ اسٹیشن کیتے اَتے 1.1 ارب روپے قائد اعظم بزنس پارک دے 220 کے وی گرڈ اسٹیشن کیتے رکھین۔ بجلی دے تقسیم دے نظام کوں جدید بݨاوݨ کیتے 100 اَتے 200 کے وی اے ٹرانسفارمرز لاوݨ کیتے ایسیٹ پرفارمنس منیجمنٹ سسٹم دے تحت 1.6 ارب روپے جݙاں جو آئیسکو اچ ایڈوانس میٹرنگ انفراسٹرکچر منصوبے کیتے 2.9 ارب روپے مختص کیتے ڳئن۔ ایںدے علاوہ بجلی دیاں تقسیم کار کمپنیاں دی کارکردگی بہتر بݨاوݨ کیتے ملتان الیکٹرک پاور کمپنی کوں 1.8 ارب روپے، حیدر آباد الیکٹرک پاور کمپنی کیتے 1.9 ارب روپے اَتے پشاور الیکٹرک پاور کمپنی کیتے 2.4 ارب روپے ݙیتے ویسن۔ وزیر خزانہ آکھیا جو واپڈا ولوں شروع کیتے ڳئے صاف، قابل تجدید اَتے پن بجلی دی پیداوار دے منصوبیاں کیتے 672 ارب روپے مختص کیتے ڳئن۔ کلیدی اقدامات اچ 2,160 میگاواٹ داسو ہائیڈرو پاور پراجیکٹ شامل اے جیںدے کیتے 20 ارب روپے رکھیے ڳئن۔ تربیلہ پنجویں توسیعی منصوبے کیتے 35.7 ارب روپے، آزاد جموں و کشمیر اَتے گلگت بلتستان اچ پن بجلی دیاں پنج سکیماں کیتے 3 ارب روپے رکھین۔ وزیر خزانہ آکھیا جو حکومت زراعت دے شعبے دی ترقی کیتے ودھ اقدامات کریندی پئی اے، سرسبز پاکستان اقدام دے تحت جدید کاشتکاری دے طریقیاں اَتے قابل کاشت زمین کوں ودھاوݨ تے توجہ ݙتی ڳئی اے۔ ݙوجھے اہم اقدامات اچ پیداواری صلاحیت کوں ودھاوݨ، پیداوار دے فرق کوں پورا کرݨ، فصلاں اچ جدت گھن آوݨ اَتے کساناں دی منڈیاں تئیں رسائی بہتر بݨاوݨ، صلاحیت سازی، جینیٹک امپرومنٹ اَتے پوسٹ ہارویسٹ تے توجہ اے، چین اچ 1,000 زرعی گریجوئیٹس دی صلاحیت سازی کیتے وزیر اعظم دے اقدام دے تحت مختلف صوبیاں اَتے خطیاں توں نوجوان پاکستانی زرعی گریجویٹس کوں ہک مکمل فنڈڈ تربیتی پروگرام دے تحت چین بھیجیا ویندا پئے، ایں سانڳے پہلے مرحلے اچ 300 زرعی گریجویٹس دا بیچ آڳئے اَتے مزید 300 زرعی گریجویٹس ایں مہینے دے آخر تئیں چین پڄ ویسن جتھاں انہاں کوں جدید ہنر اَتے بین الاقوامی آگاہی مِلسی اَتے انہاں دیاں صلاحیتاں کوں زرعی شعبے دی بہتری کیتے استعمال کیتا ویسی۔ تربیتی پروگراماں دے علاوہ مالی سال 2025ـ26 اچ، کپاہ اَتے لائیوسٹاک دی بحالی تے خصوصی توجہ ݙیوݨ دے نال، ݙاہ جاری سکیماں کوں جاری رکھݨ اَتے پنج نویں منصوبے شروع کرݨ کیتے 4 ارب روپے توں ودھ رکھیے ڳئن۔ وزیر خزانہ آکھیا جو اعلیٰ تعلیم اہم اے جیڑھا تربیت یافتہ انسانی وسائل فراہم کریندے اتے اے عمومی پیداواری صلاحیت ودھاوݨ اتے ملکی صنعت دی برآمدات ودھاوݨ اچ ہتھ ونݙیندے۔ اعلیٰ تعلیم دی مد وچ ایچ ای سی کوں 170 منصوبیاں کیتے 39.5 ارب روپے ݙتے ڳئن۔ انہاں اچ 38.5 ارب روپے جاری منصوبیاں کیتے ہن۔ انہاں وسائل نال جاری سکیماں کوں مکمل کرݨ اچ مدد مِلسی۔ وزیر خزانہ آکھیا جو سائنس و ٹیکنالوجی کیتے مالی سال 26ـ2025 اچ 31 جاری سکیماں کیتے 4.8 ارب روپے رکھین۔ پی وی ماڈیولز کیتے پاک۔کوریا ٹیسٹنگ فسیلٹی دے قیام، سیمی کنڈکٹر چپ ڈیزائن فیسلیٹیشن سینٹر دی اپ گریڈیشن اَتے پرنٹڈ سرکٹ بورڈ کیتے بائیوٹیک ݙیراویڈ بائیو پروڈکٹ ہاؤسز دے قیام ڄھیاں اہم جاری سکیماں مکمل کرݨ تے توجہ رکھی ویسی۔ وزیر خزانہ آکھیا جو تعلیم ملک کوں وݙے چیلنجاں دا سامݨا اے، جنہاں وچ 26 ملین سکول توں باہرو ٻال، تعلیم تئیں رسائی، مساوات، گورننس اَتے تعلیمی معیار جھیں مسلے شامل ہن۔ انہاں چیلنجاں نال نبݨݨ انتہائی اہم اے اَتے ایں سال دے حکومتی اقدامات ایں گیپ کوں پُر کرݨ دی ہک جامع حکمت عملی دی عکاسی کریندن۔ وزیر خزانہ آکھیا جو وزیراعظم دی ہدایت تے پسماندہ علاقیاں دے ہونہار طلباء کیتے دانش سکولاں دے قیام تے خصوصی توجہ ݙتی ویندی پئی اے۔ 11 نویں دانش سکولاں دے قیام دی منصوبہ بندی کیتی ڳئی اے جیںدے اچ 3 آزاد جموں و کشمیر، 3 گلگت بلتستان، چار بلوچستان اَتے ہک اسلام آباد وچ وفاقی پی ایس ڈی پی 26ـ2025 دے تحت قائم کرݨ کیتے کل 9.8 ارب روپے رکھیے ڳئن۔ وزیراعظم پاکستان ڳھٹ وسائل رکھݨ آلے طلباء کوں معیاری تعلیم ݙیوݨ کیتے دانش یونیورسٹی اسلام آباد دے قیام دا اعلان کیتے، اے یونیورسٹی دور پار اَتے پسماندہ علاقیاں دے طلباء کوں خصوصاً ابھردی ہوئی ٹیکنالوجیز، انجنئیرنگ، تعلیم، صحت اَتے آئی ٹی جیڑھے شعبیاں وچ بین الاقوامی معیار دی بلا معاوضہ اعلیٰ تعلیم ݙیسی۔ تعلیم تے مرکوز اضافی منصوبیاں وچ ارلی چائلڈ ہڈ ایجوکیشن دے مراکز، کمپیوٹر لیبز اَتے نیشنل انسٹی ٹیوٹ آف ایکسیلینس دا قیام شامل اے۔ انہاں دا مقصد تعلیم تئیں رسائی کوں بہتر بݨاوݨ، ٻالاں دے ݙراپ آؤٹ دی شرح کوں گھٹ کرݨ، اَتے مجموعی تعلیمی معیار کوں ودھاوݨا اے۔ ایں سانڳے وفاقی پی ایس ڈی پی اچ مجموعی طور تے 18.5 ارب روپے رکھیے ڳئن۔ وزیراعظم یوتھ سکل ڈویلپمنٹ پروگرام دے تحت 4.3 ارب روپے مختص کیتے ڳئن۔ ایں پروگرام دے تحت 161,500 نوجواناں کوں سکلز ٹریننگ فراہم کیتی ویسی، جیںدے وچ 56,000 کوں آئی ٹی، 64,000 کوں صنعتی شعبہ جات اَتے 49,000 کوں روایتی شعبیاں وچ تربیت ݙیتی ویسی۔ انہاں وچوں 2,500 نوجواناں دا تعلق فاٹا دے ضم شدہ ضلعیاں توں ہوسی۔ وزیر خزانہ آکھیا جو مالی سال 26ـ2025 کیتے، وفاقی پبلک سیکٹر ڈویلپمنٹ پروگرام اچ صحت دے شعبے دے 21 اہم منصوبیاں کیتے 14.3 ارب روپے رکھیے ڳئن جیڑھے گزریل مالی سال دے مقابلے ٻہوں ودھ ہن۔ انہاں منصوبیاں دی تکمیل نال بیماریاں تے قابو پاوݨ، صحت دی ݙیکھ بھال کوں جدید بݨاوݨ، اَتے سارے شہریاں کوں علاج معالجے تئیں یکساں رسائی اچ مدد مِلسی۔ انہاں منصوبیاں اچ جناح میڈیکل کمپلیکس اینڈ ریسرچ سینٹر، اسلام آباد کیتے 4 ارب روپےرکھیے ڳئن، جیندا مقصد وفاقی دارالحکومت اچ ہک فلیگ شپ ٹرشری کیئر اَتے ٹیچنگ فیسیلیٹی دا قیام اے۔ صحت دے سنگین چیلنجاں نال نبݨݨ کیتے وزیراعظم پروگرام دے تحت ہیپاٹائٹس سی دے خاتمے کیتے ہک ارب روپے مختص کیتے ڳئن، جیںدے نال ملک گیر سکریننگ اَتے علاج معالجے دیاں سہولتاں ݙتیاں ویسن۔ ایویں ہی متعدی امراض دی ودھدی ہوئی لہر نال نبݨݨ کیتے شوگر دی روک تھام اَتے کنٹرول دے پروگرام کوں 80 کروڑ روپے ݙتے ویسن تاں جو صحت عامہ دے ایں ودھدے ہوئے بوجھ کوں گھٹ کیتا ونڄ سڳے۔ حکومت اسلام آباد دے کینسر ہسپتال دے قیام کیتے 1.7 ارب روپے اَتے ضروری آلات دی خریداری کیتے 90 کروڑ روپے، پمز اسلام آباد وچ ہک جدید ترین توسیعی سہولت اَتے کارڈیک کیئر دے قیام اَتے سٹروک انٹروینشن سینٹر کیتے 90 کروڑ روپے رکھین۔ وزیر خزانہ آکھیا جو متوازن علاقائی ترقی کیتے آزاد جموں و کشمیر، گلگت بلتستان اَتے خیبر پختونخوا دے نویں ضم شدہ ضلعیاں سانڳے وفاقی حکومت آئندے مالی سال دے پی ایس ڈی پی وچ کل 164 ارب روپے رکھین۔ وزیر خزانہ آکھیا جو مالی سال 26-2025 اچ گورننس سیکٹر کیتے 11.0 ارب روپے دی رقم تجویز کیتی ڳئی اے۔ 30 جون 2024 کوں ایف بی آر دا ٹیکس ٹو جی ڈی پی تناسب صرف 8.8 فیصد ہئی۔ موجودہ حکومت دیاں کوششاں نال اَتے اللہ تعالی دے فضل و کرم نال، ایں مالی سال دے پہلے نو مہینے اچ ایف بی آر دا ٹیکس ٹو جی ڈی پی تناسب ودھ تے 10.3 فیصد تھی ڳئے اَتے توقع اے جو جون 2025 دے آخر تئیں اے مزید ودھ تے 10.4 فیصد تھی ویسی۔ وفاقی نان ٹیکس محصولات وی گزریل سال دے 0.8 فیصد دے مقابلے اچ ودھ تے جی ڈی پی دا 1.2 فیصد تھی ڳئن۔ مجموعی طور تے، وفاقی محصولات ہݨ جی ڈی پی دا 11.6 فیصد ہن اَتے ڄیکر اساں صوبیاں دے 0.7 فیصد ٹیکس ٹو جی ڈی پی تناسب کوں شامل کروں تاں اڄوکے مالی سال دے مکݨ تئیں قومی ٹیکس ٹو جی ڈی پی تناسب 12.3 فیصد تھی ویسی۔ ایف بی آر دے ٹیکساں اچ ہک سال دے دوران ٹیکس ٹو جی ڈی پی دے تناسب اچ 1.6 فیصد تئیں دا وادھا نہ صرف پاکستان دی تاریخ اچ بے مثال اے ٻھل اڄوکے دور اچ دنیا دے ݙوجھے حصیاں اچ وی ٻہوں گھٹ ݙیکھݨ اچ آئے۔ وزیر خزانہ آکھیا جو تنخواہ دار طبقے تے ٹیکساں دے ٻھار ڳھٹاوݨ ترجیحج اے، ایں سانڳے تنخواہ دار لوکاں کیتے آمدنی دے سارے سلیبس وچ انکم ٹیکس دیاں شرحاں ڳھٹ کرݨ دی تجویز اے۔ اے ریلیف نہ صرف ٹیکس دے ڈھانچے کوں سوکھا بݨیسی ٻھل متوسط آمدنی آلیاں تے عائد ٹیکس دے بوجھ کوں گھٹ کر تے، افراط زر اَتے ٹیک ہوم تنخواہ وچال توازن یقینی بݨیسی۔ چھی لکھ روپے توں 12 لکھ روپے تئیں تنخواہ گھنݨ آلیاں کیتے ٹیکس دی شرح 5 فیصد توں گھٹ کر تے صرف 2.5 فیصد کر ݙیتی ڳئی اے۔ 12 لکھ آمدنی آلے تنخواہ دار تے ٹیکس دی رقم کوں 30,000 توں گھٹ کر تے 6,000 کر ݙیوݨ دی تجویز اے۔ 22 لکھ روپے تئیں تنخواہ گھنݨ آلیاں کیتے گھٹ توں گھٹ ٹیکس دی شرح 15 فیصد دے بجائے 11 فیصد کرݨ دی تجویز اے۔ ایویں ہی ودھ تنخواہواں حاصل کرݨ آلیاں کیتے وی ٹیکس دی شرح وچ کمی دی تجویز ݙیتی ویندی پئی اے۔ 22 توں 32 لکھ روپے تئیں تنخواہ گھنݨ آلیاں کیتے ٹیکس دی شرح 25 فیصد توں گھٹ کر تے 23 فیصد کرݨ دی تجویز اے۔ اے اقدام ٹیکساں کوں منصفانہ بݨاوݨ اَتے ٹیکس ادا کرݨ آلے تنخواہ دار افراد تے بوجھ کوں گھٹ کرݨ دے حکومتی عزم کوں ݙسیندے۔ ملک دی بہترین پیشہ ور افرادی قوت کوں بیرون ملک منتقل تھیوݨ توں بچاوݨ، ملک دی برین ݙرین کوں روکݨ کیتے ہک کروڑ روپے توں ودھ آمدنی آلے افراد تے عائد سرچارج وچ 1 فیصد کمی دی تجویز اے۔ وزیر خزانہ آکھیا جو کارپوریٹ سیکٹر تے عائد ٹیکساں دی بلند شرح سانڳے ریلف کتیے کئی تجاویز ݙتیاں ڳن، 20 کروڑ روپے توں 50 کروڑ روپے تئیں سالانہ آمدنی حاصل کرݨ آلی کارپوریشنز کیتے ٹیکس دی شرح وچ 0.5 فیصد دی کمی تجویز اے۔ اے رعایت کارپوریٹ ٹیکس دی شرح کوں معقول بݨاوݨ دے حکومتی ارادے دی عکاس اے۔ انہاں آکھیا جو پاکستان دی معیشت وچ تعمیرات دے شعبے دی اہمیت اے، اے شعبہ بھاری ٹیکساں پاروں بہوں اوکھا اے ایں سانڳے جائیداد دی خریداری تے ودہولڈنگ ٹیکس دی شرح 4 فیصد توں گھٹ کر تے 2.5 فیصد اَتے 3.5 فیصد توں گھٹ کر تے 2 فیصد اَتے 3 فیصد توں گھٹ کر تے 1.5 فیصد کرݨ دی تجویز اے۔ کمرشل جائیداداں، پلازیاں اَتے گھراں دی منتقلی تے گزریل سال لڳݨ آلی 7 فیصد تئیں دی فیڈرل ایکسائز ݙیوٹی مکاوݨ دی وی تجویز اے۔ ڳھٹ لاگت گھراں دی تعمیر کیتے قرض ݙیوݨ اَتے مورگیج دی حوصلہ افزائی کیتے 10 مرلے تئیں دے گھراں اَتے 20000 مربع فٹ تئیں دے فلیٹس تے ٹیکس کریڈٹ متعارف کرایا ویندا پئے۔ حکومت مورگیج فنانسنگ کوں ودھیندی پئی اے جیندے کیتے ہک جامع نظام متعارف کرایا ویسی۔ انہاں آکھیا جو حکومت ٹیکس دے نظام وچ مساوات کوں بہتر بݨاوݨ کیتے کئی اقدامات کریندی پئی اے، انکم انٹرسٹ تے ٹیکس دی شرح 15 فیصد توں ودھا تے 20 فیصد کرݨ دی تجویز اے۔ تاں جو چھوٹے پیمانے تے بچت کرݨ آلے اَتے ایں آمدنی تے انحصار کرݨ آلیاں تے ایں شرح دا اطلاق نہ ہوسی کیوں جو اے شرح قومی بچت دیاں سکیماں تے نئیں لڳدی۔ آن لائن کاروبار اَتے ڈیجیٹل مارکیٹ پلیس دی تیزی نال ترقی دی وجہ توں اشیاء دیاں قیمتاں اچ وڳاڑ آ ڳعے جیندے نال دستاویزی کاروبار کرݨ آلے ری ٹیلرز کوں نقصان تھیندے، ای کامرس پلیٹ فارمز اَتے کوریئر سروس مہیا کرݨ آلے، ڈیجیٹل طور تے منگوائی ونجݨ آلی اشیاء اَتے خدمات پڄاوݨ تے ٹیکس کٹسی تاں جو تیزی نال ترقی کریندی ڈیجیٹل معیشت محصولات وچ اپݨا حصہ پاوے۔ آن لائن مارکیٹ پلیس، کوریئر سروس اَتے ادائیگی وچ معاونت کرݨ آلے اداریاں تے لازم ہوسی جو او ہر مہینے اپݨا ٹرانزیکشن ݙیٹا اَتے وصول کیتے ونجݨ آلے ٹیکس دی رپورٹ جمع کراون۔ میوچل فنڈز تے حاصل تھیوݨ آلے منافع تے ٹیکس دی شرح کوں معقول بݨاوݨ دی تجویز اے۔ حصص تے حاصل منافع دی شرح 15 فیصد رہسی ٻھل قرض دی بنیاد تے تھیوݨ آلی آمدنی تے ہݨ 25 فیصد ٹیکس لاوݨ دی تجویز اے تاں جو حصص دی مارکیٹ وچ میوچل فنڈز وچ سرمایہ دی حوصلہ افزائی کیتی ونڄ سڳے۔ وزیر خزانہ آکھیا جو کاروباری برادری دا مطالبہ ہئی جو لوکاں تے انہاں دے ذرائع آمدنی دے بجائے صرف آمدنی دی بنیاد تے ٹیکس لایا ونجے۔ ایں کیتے صوبائی حکومتاں وی زرعی آمدنی تے وفاقی انکم ٹیکس دی شرح تے ٹیکس وصول کرینداں پیاں ہن۔ ایویں ہی 70 سال توں گھٹ عمر او پنشنرز جو سالانہ ہک کروڑ روپے توں ودھ پنشن وصول کریندے پئے ہن انہاں دی ہک کروڑ روپے توں ودھ پنشن دی آمدنی تے 5 فیصد دی شرح نال ٹیکس لاوݨ دی تجویز اے تاں جو ٹیکس دی بنیاد وسیع کیتی ونڄ سڳے۔ کیش لیس معیشت کوں ودھاوݨ کیتے اے ٹیکس اقدامات تجویز کیتے ویندے ہن۔ نان فائلرز کیتے نقد رقم کݙھاوݨ تے ایڈوانس ٹیکس دی شرح 0.6 فیصد توں ودھا تے 1 فیصد کرݨ دی تجویز اے تاں جو غیر دستاویزی نقد لین دین دی حوصلہ شکنی کیتی ونڄ سڳے۔ جتھاں کوئی ٹیکس ݙیوݨ آلا کہیں ہک سیل انوائس تے ݙو لکھ روپے توں ودھ رقم نقد وصول کرے تاں ایں فروخت تے تھیوݨ آلے اخراجات دے 50 فیصد دی اجازت نہ ݙیتی ویسی۔ ایں سانڳے اگلے مالی سال ٻئے اقدامات گھدے ویسن۔ وزیر خزانہ آکھیا جو انکم ٹیکس وچ باقاعدگیاں دے خاتمے کیتے ضروری اصلاحات کیتیاں ویندیاں پئن، تجارتی جائیداداں توں تھیوݨ آلی کرایہ دی آمدنی ہݨ فیئر مارکیٹ ویلیو دے چار فیصد دی معیاری شرح دی بنیاد تے تسلیم کیتی ویسی۔ اپیلاں دا طریقہ کار وی معقول بݨایا ویندا پئے۔ ٹیکس ݙیوݨ آلیاں اَتے ایف بی آر وچال تنازعات گھٹ کرݨ کیتے انکم ٹیکس دے ستویں شیڈول کوں بہتر بݨاوݨ دی تجویز اے۔ توقع اے جو انہاں تبدیلیاں نال ٹیکس دا نظام منصفانہ اَتے مساویانہ تھی سڳسی۔ آن لائن ٹرانزیکشن اَتے ݙوجھے ڈیجیٹل ذرائع توں کیتی ونجݨ آلی ادائیگیاں کوں وی شامل کرݨ دی تجویز اے۔ انہاں آکھیا جو ہک نواں کلاسیفیکیشن سسٹم متعارف کرایا ویندے پئے جیںدے وچ فائلر اَتے نان فائلرز دا فرق ختم کیتا ونڄ سڳے، جیڑھے لوک اپݨے گوشوارے اَتے اپݨی ویلتھ سٹیٹمنٹ جمع کرویسن صرف اوہے وݙے مالیاتی لین دین کر سڳسن۔ شیڈول بینکاں اَتے ایف بی آر دے وچال بینکاری اَتے ٹیکس دے حوالے نال معلومات دے تبادلے کیتے قوانین متعارف کرائے ویندے پئن، ایف بی آر کوں اے اختیار حاصل ہوسی جو او ٹیکس دی بنیاد وسیع کرݨ اَتے ایںدے نفاذ کوں بہتر بݨاوݨ کیتے بیرونی آڈیٹرز دیاں خدمات حاصل کر سڳے۔ سیلز ٹیکس ایکٹ وچ ترامیم دے حوالے نال انہاں ݙسیا جو درآمد شدہ اَتے مقامی طور تے تیار کیتے ڳئے سولر پینلز دوچال مسابقت وچ برابری کوں یقینی بݨاوݨ کیتے سولر پینل دی درآمدات تے 18 فیصد دی شرح نال ٹیکس لاوݨ دی تجویز اے۔ پٹرول یا ݙیزل استعمال کرݨ آلی اَتے ہائی بائیرڈ گڈیاں تے سیلز ٹیکس وچ یکسانیت گھن آوݨ کیتے 18 فیصد ٹیکس توں گھٹ شرح آلی گڈیاں تے وی 18 فیصد عمومی سیلز ٹیکس لاوݨ دی تجویز اے۔ ایں سال کھاد اَتے کیڑے مار ادویات تے مزید ٹیکس نئیں الایا ویندا پیا، سیلز ٹیکس چوری روکݨ کیتے سخت اقدامات تھیندے پئن، غیر رجسٹرڈ کاروباراں دے خلاف سخت سزاواں کوں مزید ودھاوݨ دی تجویز اے، جنہاں وچ بینک اکاؤنٹ منجمد کرݨ، جائیداد دی منتقلی تے پابندی اَتے سنگین جرائم وچ کاروباری ڄاہ کوں سیل کرݨ اَتے سامان ضبط کرݨ شامل اے۔ انہاں سارے اقدامات سانڳے سارے متعلقہ قانونی تقاضے پورے کیتے ویسن۔ ڈیجیٹل پریزننس پروسیڈ ٹیکس ایکٹ 2025ء دے تحت سارے ادارے بشمول بینک، مالیاتی ادارے، لائسنس یافتہ ایکسچینج کمپنیاں اَتے ݙوجھے ادائیگی دے ذرائع ایں گالھ دے پابند ہوسن جو او پاکستان وچ باہروں اشیاء اَتے خدمات فراہم کرݨ آلے غیر ملکی تاجراں کوں کیتی ونجݨ آلی ڈیجیٹل ادائیگیاں تے پنج فیصد ٹیکس وصول کرن۔ انہاں آکھیا جو فیڈرل ایکسائز ݙیوٹی ایکٹ وچ ترامیم دی تجویز ݙیتی ڳئی اے۔ اشیاء دی آمد توں پہلے ہی کلیئرنس کوں ودھاوݨ، بندرگاہواں تے کلیئرنس وچ لگݨ آلے ویلے اَتے مقدمیاں وچ کمی گھن آوݨ کیتے قانونی ترامیم کیتیاں وینداں پین۔ وزیر خزانہ آکھیا جو اساں نہ صرف طریقہ کار دیاں اصلاحات کریندے پئے ہیں ٻھل اپݨے ریاستی معاشی معاہدیاں دیاں بنیاداں دی وی ازسرنو تشکیل کریندے پئے ہیں۔ ہک اینڄھا مضبوط ڈیجیٹل طور تے مربوط اَتے نفاذ تے مبنی ٹیکس نظام ٻݨدا پئے جیڑھا قانون دی پاسداری ودھاوے، ٹیکس چوری دے رستے بند کرے اَتے ساݙی اقتصادی خود مختاری یقینی بݨاوے۔ اے ٹیکس نظام منصفانہ، شفاف اَتے پاکستان دے عوام کیتے قابل اعتماد ہووے۔ وزیر خزانہ آکھیا جو فوسل فیول دے ودھ استعمال دی حوصلہ شکنی اَتے موسمیاتی تبدیلی اَتے گرین انرجی پروگرام کیتے مالی وسائل ݙیوݨ کیتے تجویز اے جو مالی سال 2025-26ء کیتے پٹرول، ہائی سپیڈ ݙیزل اَتے فرنس آئل تے 2.5 روپے فی لیٹر دی شرح نال کاربن لیوی لائی ونڄے جیڑھی مالی سال 2026-27ء اچ ودھا تے 5 روپے فی لیٹر کر ݙتی ویسی۔ ایںدے علاوہ فرنس آئل تے پٹرولیم لیوی وی وفاقی حکومت دی اعلان کردہ شرح دے مطابق لائی ویسی۔ انہاں آکھیا جو پاکستان دے توانائی دے شعبے تے ناقابل برداشت گردشی قرضیاں دا بوجھ اے جو گزریل مالی سال دے اختتام تے 2 ہزار 393 ارب روپے تئیں پڄ چُکیا ہئی۔ ایں گردشی قرض تے KIBOR دے علاوہ ݙو فیصد توں 5.4 فیصد تئیں مالیاتی چارجز لڳدے ہن اَتے مالی سال 2025ء وچ ایںدی متوقع لاگت 454 ارب روپے تئیں پڄݨ دا اندیشہ اے۔ وفاقی حکومت دا ارادہ اے جو موجودہ مہانگے قرضیاں دی ری فنانسنگ، سستے اَتے شریعت دے مطابق بینک فنانسنگ دے ذریعے کیتی ونجے۔ ایں منصوبے کوں عملی جامع پڄاوݨ کیتے نیپرا ایکٹ وچ ترمیم تجویز کیتی ویندی پئی اے جیںدے نال وفاقی حکومت کوں ݙی ایس ایس تے 10 فیصد سرچارج ادا کرݨ دی پابندی کوں کیس ٹو کیس بنیاد تے مخصوص مدت اَتے مقصد کیتے ودھاوݨ دا اختیار حاصل تھی ویسی۔ انہاں آکھیا جو ݙو اَتے 3 پہیاں آلی الیکٹرک گڈیاں دے استعمال کوں ودھاوݨ کیتے حکومت پاکستان نویں انرجی وہیکل پالیسی ٻݨائی اے تاں جو ساݙے ماحول کوں آلودگی توں بچایا ونڄ سڳے۔ وزیر خزانہ آکھیا جو تنخواہ دار طبقے کیتے ٹیکس وچ کمی دے نال نال حکومت اپݨی مالی مشکلاں دے باوجود سرکاری ملازمین کیتے ریلیف اقدامات دا فیصلہ کیتے۔ گریڈ ہک توں 22 دے سارے ملازمین دی تنخواہ وچ 10 فیصد، ریٹائرڈ ملازمین دی پنشن وچ 7 فیصد وادھے دی تجویز اے۔ معذور ملازمین کیتے خصوصی کنوینس الائونس کوں 4 ہزار توں ودھا تے 6 ہزار ماہانہ کیتا ویندا پئے۔ آئین پاکستان وچ مساوی حقوق بارے ݙتی ڳئی شق تے عملدرآمد کریندے ہوئیں تنخواہواں وچ موجود فرق مکایا ویندا پئے۔ اہل ملازمین کوں 30 فیصد دی شرح نال ݙسپیریٹی ریڈکشن الائونس ݙیوݨ دی تجویز اے۔ انہاں آکھیا جو ملک وچ سکیورٹی صورتحال خطرات دا شکار اے اَتے مسلح افواج سرحداں دے تحفظ کیتے قابل تحسین خدمات انجام ݙتین۔ انہاں خدمات دے اعتراف وچ مسلح افواج دے افسراں اَتے سولجرز/جے سی اوز کیتے سپیشل ریلیف الائونس ݙیوݨ دی تجویز اے، اے اخراجات دفاعی بجٹ توں پورے کیتے ویسن۔ وزیر خزانہ وزیراعظم، نائب وزیراعظم، کابینہ، حکومتی اتحادی جماعتاں اَتے ݙوہاں ایواناں دے اراکین دا شکریہ ادا کریندے آکھیا جو انہاں دے مسلسل تعاون، رہنمائی اَتے اعتماد ساکوں قومی ترقی دے ایں اوکھے ٻھل ضروری سفر تے ٹوری رکھیے۔ انہاں خزانہ ݙویژن اَتے ایںدے ذیلی اداریاں، پلاننگ ݙویژن، وزارت قانون اَتے ݙوجھے اداریاں دا وی بجٹ تیاری وچ کلیدی کردار تے انہاں دا شکریہ ادا کیتا۔ انہاں آکھیا جو اے بجٹ محض ہک مالیاتی دستاویز نئیں ٻھل ساݙیاں قومی ترجیحاں، اجتماعی وژن اَتے عوام نال کیتے ڳئے وعدیاں دا آئینہ دار اے، اڄوکے ہفتیاں اچ جیویں ݙشمن دی جارحیت دے خلاف اساں یکجہتی، جرات اَتے قومی عزم ݙکھائے او ساݙی تاریخ دا روشن باب اے، ایویں ہی جذبے نال اساں معاشی استحکام، اصلاحات اَتے پائیدار ترقی دی راہ اپنائی اے، اڄ پاکستان ہک نواں سفر شروع کریندا پئے جیڑھا ہر ڄݨے، ہر طبقے اَتے ہر خطے کوں ترقی دے ثمرات پڄاوݨ دا عزم رکھیندے۔ انہاں قومی مفاد دے اوکھے فیصلیاں وچ حکومت دا ودھ ساتھ ݙیوݨ تے اتحادی جماعتاں دا وی شکریہ ادا کریندے آکھیا جو اے او رویہ اے جیڑھا قوماں کوں مضبوط بݨیندے اَتے ایہو اتحاد پاکستان کوں ترقی اَتے خوشحالی دی منزل تئیں گھن ویسی۔ معاشی اصلاحات صرف اعداد و شمار دا کھیݙ نئیں ٻھل قومی ہم آہنگی، اتفاق رائے اَتے مسلسل محنت دا تقاضا کریندے۔ انہاں ایوان اَتے خاص کر حزب اختلاف کوں آکھیا جو او ایں قومی مقصد وچ ساݙا ساتھ ݙیون اَتے آؤ اساں سارے رَل تے پاکستان دے روشن مستقبل دی بنیاد رکھوں، ہک اینجھا مستقبل جیڑھا شفافیت، شمولیت اَتے پائیدار ترقی تے کھڑا ہووے۔