7 ہزار ٹیرف لائنز اچوں 4 ہزار تے اضافی کسٹم ݙیوٹی ختم کر ݙتی ڳئی اے، وزیر خزانہ

ام آباد۔ 11 جون(اے پی پی)وفاقی وزیر خزانہ سینیٹر محمد اورنگزیب پوسٹ بجٹ پریس کانفرنس نال خطاب کریندے آکھیے جو 7 ہزار ٹیرف لائنز اچوں 4 ہزار تے اضافی کسٹم ݙیوٹی ختم کر ݙتی ڳئی اے۔ انہاں آکھیا جو آندے مالی سال دے وفاقی بجٹ اچ ٹیرف اصلاحات تے خصوصی توجہ ݙتی ڳئی اے جیںدی وݙی اہمیت اے، ایندا پہلا مقصد پروٹیکٹڈ رجیم کوں وٹاوݨ اے تاں جو کیش اَتے انسانی وسائل اچ بہتری آوے اَتے ایںدے نال برآمدی شعبے کوں وی فیدہ پڄسی۔ حکومت سمجھیندی اے جو ڈھانچہ جاتی بنیاد تے ملک کوں اڳو گھن ونجݨ کیتے معیشت دے بنیادی ڈی این اے کوں تبدیل کرݨ ضروری اے۔ وزیر خزانہ ݙسایا جو 7 ہزار ٹیرف لائنز اچوں 4 ہزار تے اضافی کسٹم ݙیوٹی صفر کر ݙتی ڳئی اے، 2700 اچ کسٹم ݙیوٹی دی شرح گھٹ کر ݙتی ڳئی اے، ایویں ہی 2 ہزار اینجھے ٹیرف لائن ہن جیندا تعلق خام مال نال اے اَتے ایںدے نال برآمدی صنعت کوں یقینی طور تے فیدہ پڄسی۔ انہاں آکھیا جو ٹیرف اصلاحات دا اے سلسلہ جاری رہسی اَتے ساݙی کوشش اے جو مجموعی طور تے ٹیرف رجیم اچ 4 فیصد کمی گھن آئی ونجے۔