عرس حضرت بری امام سرکار متعلق محمد اسحاق ڈار دی صدارت اچ اجلاس

اسلام آباد۔ 14 جون (اے پی پی) نائب وزیراعظم و وزیر خارجہ سینیٹر محمد اسحاق ڈار دی صدارت اچ اجلاس وچ فیصلہ کیتا ڳئے جو حضرت بری امام سرکار دا عرس مبارک 8 توں 10 اگست کوں ہوسی جݙاں جو 7 اگست کوں مزار تے چادر پوشی دی تقریب ہوسی۔ دفتر خارجہ توں جاری بیان موجب نائب وزیراعظم اتے وزیر خارجہ سینیٹر محمد اسحاق ڈار دی سربراہی وچ حضرت بری امام دے مزار دی مینجمنٹ اتے ڈویلپمنٹ دے حوالے نال قائم کمیٹی دا اجلاس منعقد تھیا۔ اجلاس وچ وفاقی وزیر ریلوے حنیف عباسی، وزیراعظم دے معاون خصوصی، سیکرٹری داخلہ لیفٹیننٹ جنرل (ر) افضل جنجوعہ، راجہ سرفراز اکرم، گوہر زاہد ملک، سہیل بھٹی، ایمان ربانی، محسن رضا نقوی اتے ڈپٹی کمشنر اسلام آباد شرکت کیتی۔ نائب وزیراعظم و وزیر خارجہ ایں موقع تے کمیٹی ممبران دی ایں اہم روحانی مزار دی ترقی اتے ایں کوں محفوظ بݨاوݨ کیتے انہاں دے عزم دی تعریف کیتی ۔ کمیٹی فیصلہ کیتا جو 7 اگست 2025 کوں چادر پوشی دی تقریب تھیسی جݙاں جو حضرت بری امام سرکار دا عرس مبارک 8 توں 10 اگست 2025 کوں تھیسی نائب وزیراعظم وزیر ریلوے دی سربراہی وچ ہک ذیلی کمیٹی بݨاوݨ دی ہدایت کیتی جیڑھی مزار دے تعمیراتی کم، ایں دی ݙیکھ بھال اتے مرمت متعلقہ امور دی نگرانی کریسی تاں جو ایں دے تقدس اتے تاریخی حیثیت کوں برقرار رکھیا ونڄ سڳے۔