وزیراعظم محمد شہباز شریف دا ایرانی صدر ڈاکٹر مسعود پیزشکیان کوں ٹیلی فون ، ایران دے خلاف اسرائیل دی اشتعال انگیزی اتے مہم جوئی دی شدید مذمت

لاہور۔ 14 جون (اے پی پی) وزیراعظم محمد شہباز شریف ایران دے خلاف اسرائیل دی اشتعال انگیزی اتے مہم جوئی دی شدید مذمت کریندے ایں کوں علاقائی اتے عالمی امن و استحکام کیتے سنگین خطرہ قرار ݙتے۔ وزیراعظم دفتر دے میڈیا ونگ توں جاری پریس ریلیز موجب وزیراعظم محمد شہباز شریف ہفتہ دی شام اسلامی جمہوریہ ایران دے صدر ڈاکٹر مسعود پیزشکیان نال ٹیلی فون تے ڳالھ مہاڑ کیتی۔انہاں آکھیا جو پاکستان ایران دے نال مکمل یکجہتی دا اظہار کریندے، وزیراعظم عالمی برادری اتے اقوام متحدہ تے زور ݙتا جو او اسرائیل دے جارحانہ رویے اتے ایں دے غیر قانونی اقدامات مکاوݨ کیتے وختی اتے قابل اعتبار اقدامات کرن۔ وزیراعظم آکھیے جو پاکستان، اسرائیل دی بلا اشتعال اتے بلا جواز جارحیت تے حکومت ایران اتے بھرا عوام دے نال کھڑے۔ انہاں ایران دے خلاف اسرائیلی حملیں دی شدید مذمت کیتی، جیڑھے ایں دی خودمختاری اتے علاقائی سالمیت دی خلاف ورزی ہن، اتے اے حملے اقوام متحدہ دے چارٹر اتے بین الاقوامی قوانین دے منافی ہن۔ انہاں آکھیے جو ایران کوں اقوام متحدہ دے چارٹر دے آرٹیکل 51 دے تحت اپݨے دفاع دا حق حاصل اے۔حملیں وچ قیمتی جاناں دے ضیان تے صدر پیزشکیان نال دلی تعزیت کریندے وزیراعظم گزریل ݙینھ اقوام متحدہ دی سلامتی کونسل دے ہنگامی اجلاس وچ ایران کیتے پاکستان دی حمایت دا ذکر کیتا۔ وزیراعظم اسرائیل دی طرفوں مظلوم فلسطینیاں دے خلاف ظالمانہ نسل کشی دی بلا روک ٹوک کارروائیاں دی وی شدید مذمت کیتی۔ انہاں آکھیا جو پاکستان خطے وچ امن دے ودھارے کیتے پوری طرح پرعزم اے اتے ایں تناظر وچ اپݨا کردار ادا کرݨ کیتے تیار اے۔صدر پیزشکیان اوکھے ویلھے بالخصوص اقوام متحدہ دی سلامتی کونسل وچ ایران دے نال پاکستان دی حمایت اتے یکجہتی تے وزیراعظم دا شکریہ ادا کیتا۔ انہاں آکھیا جو اے ݙوہیں ملکاں وچال نیڑے اتے برادرانہ تعلقات کوں ظاہر کریندے ۔ انہاں وزیراعظم کوں اسرائیل دے نال بحران تے ایران دے نقطہ نظر دا ݙسایا اتے عالمی برادری بالخصوص اسلامی ملکاں تے زور ݙتا جو او انہاں خطریں دا مقابلہ کرݨ کیتے رل تے کم کرن۔ ݙوہیں رہنماواں نیڑے رابطے وچ رہݨ تے وی اتفاق کیتا۔