وزیراعظم یوتھ پروگرام اتے فوجی فاؤنڈیشن وچال نوجواناں کوں بااختیار بݨاوݨ سانگے تریخی مفاہمتی دستاویز تے دستخط

اسلام آباد۔ 17 جون (اے پی پی) نوجواناں کوں بااختیار بݨاوݨ سانگے وزیراعظم یوتھ پروگرام اتے فوجی فاؤنڈیشن (ایف ایف) وچال ہک تریخی مفاہمتی دستاویز (لیٹر آف انٹینٹ) تے دستخط کیتے ڳئے۔ اے شراکت داری پاکستان دے نوجواناں سانگے ہک نواں باب کھولݨ آلے پاسے ہک اہم قدم اے، جئیں دا مقصد تعلیمی معیار اچ بہتری، ہنرمندی دے فروغ اتے کھیڈاں اچ کارکردگی ݙکھاوݨ آلے طلباء سانگے میرٹ دی بنیاد تے موقعے پیدا کرݨ اے۔ منگل کوں وزیراعظم یوتھ پروگرام توں جاری بیان موجب وزیراعظم یوتھ پروگرام دے چیئرمین رانا مشہود احمد خان دی زیر صدارت ایں بارے وزیراعظم آفس اچ ہک اہم اجلاس تھیا جئیں اچ نوجواناں کوں بااختیار بݨاوݨ سانگے وزیراعظم یوتھ پروگرام اتے فوجی فاؤنڈیشن (ایف ایف) وچال ہک تریخی مفاہمتی دستاویز (لیٹر آف انٹینٹ) تے دستخط کیتے ڳئے۔ وزیراعظم یوتھ پروگرام اتے فوجی فاؤنڈیشن دے ادارہ جاتی وسائل، وژن اتے صلاحیتاں کوں ہکو جاہ کر تے ایں اشتراک دا مقصد نوجواناں کوں قومی اتے بین الاقوامی سطح تے کامیابی سانگے تیار کرݨ اے۔اے اقدام فوجی فاؤنڈیشن دے تعلیمی اداریاں دے طلباء تے استاداں اتے وزیراعظم یوتھ پروگرام دے مختلف منصوبیاں نال منسلک نوجواناں اتے ٻئے معاون عملے سانگے بھرپور فیدے مند ہوسی۔ ݙوہیں ادارے رل تے کئی مشترکہ پروگرامز دا آغاز کریسن جنہاں اچ سکالرشپس، تعلیمی تے کھیڈاں دے مقابلے، عالمی تعلیمی اشتراک، تکنیکی تربیت، ڈیجیٹل سکلز دی تربیت، استاداں دی پیشہ ورانہ تربیت اتے شہری تعلیم شامل ہوسن۔ ایں اشتراک دے ذریعے خواندگی اچ وادھے، فن و ثقافت دے فروغ اتے نوجواناں اتے کارپوریٹ سیکٹر وچال روابط مضبوط بݨاوݨ تے وی توجہ ݙیتی ویسی۔ اے مفاہمتی دستاویز ایں قومی عزم دی عکاسی کریندی اے جو پاکستان دے نوجواناں کوں باصلاحیت، ذمہ وار، اتے عالمی سطح تے مسابقت دے قابل لیڈر بݨایا ونڄے جو پاکستان دا مثبت تشخص دنیا بھر اچ اجاگر کرے۔ ایں اچ فوجی فاؤنڈیشن دی طرفوں بریگیڈیئر (ر) عابد حسین شاہ، جنرل منیجر اکیڈمکس لیفٹیننٹ جنرل (ر) محمد احسان، ڈائریکٹر ایجوکیشن اتے ڈاکٹر عطا الرحمٰن ہیڈ آف مارکیٹنگ (ایجوکیشن ڈویژن) جڈانجو وزیراعظم یوتھ پروگرام دی نمائندگی چیئرمین رانا مشہود احمد خان اتے ڈپٹی سیکرٹری ڈاکٹر محمد علی کیتی، ݙوہیں اداریاں دے ٻئے سینئر حکام وی ایں موقع تے موجود ہن۔ اے اشتراک پاکستان دے نوجواناں دی مکمل صلاحیتاں کوں اجاگر کرݨ اتے انہاں دے روشن، بااختیار مستقبل دی راہ ہموار کرݨ دیاں قومی کوششاں اچ ہک سنگ میل ثابت ہوسی۔