اسلام آباد۔ 18 جون (اے پی پی) پی آئی اے دی پہلی خصوصی پرواز ایران وچ پھتے 107 پاکستانی شہریاں کوں گھن تے بدھ دی سویل 3 وجے بحفاظت اشک آباد توں اسلام آباد پج ڳئی ۔ پی آئی اے دے ترجمان عبداللہ حفیظ خان ولوں جاری بیان دے مطابق ایرانی فضائی حدیں دی بندش پاروں ایران وچ موجود پاکستانی شہری زمینی رستے توں ترکمانستان دے شہر اشک آباد پجے ہن۔ ایں سارے عمل وچ ایران اتے ترکمانستان وچ پاکستانی سفارتخانے اہم کردار ادا کیتا۔ ترجمان آکھیا جو قومی ایئر لائن دی اے خصوصی پرواز پی کے 9552 حکومت پاکستان دیاں ہدایتاں تے روانہ کیتی ڳئی ہئی۔ وطن واپس پڄݨ آلے پاکستانی شہریاں حکومت اتے پی آئی اے دے بروقت اقدام دی تعریف کیتی اتے قابل تحسین قرار ݙتا اے۔ ترجمان آکھیا جو اوکھے ویلھے وچ ملکی مفادات دی خاطر قومی ایئرلائن ولوں آپݨیاں خدمتاں فراہم کرݨ اساݙی ݙھاکیاں توں روایتاں دا تسلسل اے۔
