اسلام آباد۔ 18 جون (اے پی پی) نائب وزیراعظم اتے وزیر خارجہ سینیٹر محمد اسحاق ڈار دی صدارت اجلاس اچ کھاوݨ پیوݨ دیاں شئیں، خاص کر کھنڈ دی فراہمی اتے دستیابی دا جائزہ گھدا ڳیا۔ نائب وزیراعظم دے آفس توں بدھ کوں جاری بیان موجب اجلاس اچ وزیر برائے نیشنل فوڈ سکیورٹی، وزیراعظم دے معاون خصوصی ایم طارق باجوہ، سیکرٹری صنعت تے پیداوار، ممبر ایف بی آر، ڈی جی ایف آئی اے دے علاوہ پاکستان شوگر ملز ایسوسی ایشن اتے صوبائی حکومت دے محکمیاں دے نمائندیاں شرکت کیتی۔ نائب وزیراعظم متعلقہ حکام کوں ہدایت کیتی جو شہریاں کوں مناسب قیمتاں تے کھاوݨ پیوݨ دیاں شئیں دی فراہمی دی حکومت دی پالیسی تے مکمل عمل درآمد کیتا ونڄے۔ انہاں آکھیا جو حکومت ذخیرہ اندوزی، کھاوݨ پیوݨ دیاں شئیں دی قلت اتے ودھیک قیمتاں دے خلاف سخت کارروائی کریسی۔
