خدمات تے ڈیجیٹل سیلز ٹیکس صوبیاں دا ڈومین ہوسی، سولر پینلز تے ٹیکس دی شرح کوں ہݨ 18 فیصد توں گھٹ کر تے 10 فیصد کرݨ تے اتفاق تھئے: نائب وزیراعظم اتے وزیر خارجہ محمد اسحاق ڈار دی قومی اسمبلی اچ ڳالھ مہاڑ

اسلام آباد۔ 18 جون (اے پی پی) نائب وزیراعظم اتے وزیر خارجہ محمد اسحاق ڈار آکھیا جو خدمات تے ڈیجیٹل سیلز ٹیکس صوبیاں دا ڈومین ہوسی۔ سولر پینلز تے ٹیکس دی شرح کوں ہݨ 18 فیصد توں گھٹ کر تے 10 فیصد کرݨ تے اتفاق تھیے۔بدھ کوں قومی اسمبلی وچ ڳالھ مہاڑ کریندیں ہوئیں نائب وزیراعظم اتے وزیر خارجہ اسحاق ڈار آکھیا جو اتحادی جماعتاں اتے ݙوجھے متعلقہ شراکت داراں نال مشاورت دے بعد کڄھ مسئلیاں کوں حل کرݨ تے اتفاق کیتا ڳیا اتے ایں بارے کڄھ چیزاں تے نظرثانی کیتی ڳئی اے۔ انہاں آکھیا جو بجٹ وچ ڈیجیٹل ٹیکس دے حوالے نال تحفظات دا اظہار کیتا ڳیا ہا جو خدمات تے ڈیجیٹل ٹیکس صوبیاں دا ڈومین اے۔ کل ایں بارے سارے شراکت داراں اتے ایف بی آر نال تفصیلی مشاورت تھئی اے۔ خدمات تے ڈیجیٹل سیلز ٹیکس صوبیاں دا ڈومین ہوسی اتے وزیر خزانہ دی بجٹ تے بحث کوں نبیڑݨ دی تقریر وچ ایں دی وضاحت امسی۔نائب وزیراعظم آکھیا جو ݙوجھی زیادہ بحث سولر پینلز تے 18 فیصد سیلز ٹیکس دی تجویز تے تھئی اے۔ سولر تے ٹیکس دی تجویز دا جائزہ گھدا ڳیا، سولرائزیشن وچ انورٹرز اتے ݙوجھی شئیں دا 54 فیصد حصہ پہلے توں معمول دے ٹیکس نظام وچ شامل اے۔ 18 فیصد سیلز ٹیکس دی تجویز باقی 46 فیصد حصہ متعلق اے۔ آپسی مشاورت دے بعد سولر پینلز تے ٹیکس دی شرح کوں ہݨ 18 فیصد توں گھٹ کر تے 10 فیصد کرݨ دی تجویز ݙتی ڳئی اے۔انہاں آکھیا جو ٹیکس تجاویز محصولات دے اقدامات ہوندن، جڈاں جو ہک شعبے وچ اساں ریونیو اقدامات کوں محدود کریندوں تاں ایں دا ازالہ وی کرݨا ہوندے۔ کابینہ جڈاں ملازمین دیاں تنخواہواں وچ چھ فیصد ودھارا کوں ناکافی قرار ݙتا اتے ایں کوں 10 فیصد تئیں ودھاوݨ دی منظوری ݙتی تاں اضافی خرچے یا لاگت دا وی انتظام کرݨا پوندے۔ انہاں آکھیا جو اساکوں رل تے اڳوں ودھݨے، اساں مفاہمت تے یقین رکھیندوں۔انہاں آکھیا جو تریڄھا اہم ایشو پی ایس ڈی پی وچ سندھ بارے ہا، اساں اتفاق رائے نال فیصلہ کیتے جو پی ایس ڈی پی وچ ایچ ای سی دے حوالے نال سندھ وچ یونیورسٹی کیتے فنڈز دا حجم 4.7 ارب روپے دی سطح تے برقرار رکھیا ویسی۔ انہاں آکھیا جو پی ڈبلیو ڈی بارے اراکین قومی اسمبلی دا موقف جائز ہا، اساں وزیراعظم نال وی مشاورت کیتی اتے ایں گالھ تے اتفاق تھیا جو ایں بارے تحفظات جائز ہن۔ پی ڈبلیو ڈی بند تھیوݨ دے بعد سارے صوبیاں وچ پی آئی ڈی سی ایل کوں منصوبے منتقل تھیسن جو منصوبے سندھ وچ جاری ہن اوہ جاری رہسن۔ انہاں آکھیا جو جائز مسئلیاں اتے تحفظات کوں دور کرݨ کیتے تیارہیسے۔