اسلام آباد۔ 18 جون (اے پی پی) وزیراعظم محمد شہباز شریف آکھیے جو ایران اتے اسرائیل وچال جنگ نال پیدا تھیوݨ آلی صورتحال انتہائی تشویشناک اتے خطے اتے عالمی امن کیتے ٻہوں خطرناک اے۔ پاکستان ایران تے اسرائیلی جارحیت دی بھرپور مذمت کیتی اے۔ عالمی برادری ایران اتے اسرائیل وچال جنگ بندی کیتے وختی کردار ادا کرے۔ بھارت دے نال جنگ وچ اللہ تعالی اساکوں عظیم فتح ݙتی۔ بلاول بھٹو زرداری دی سربراہی وچ پاکستانی وفد امریکا، یورپ اتے ݙوجھے ملکاں وچ پاکستان دا موقف بھرپور طریقے نال پیش کیتے۔ سکیورٹی اداریں دیاں ضرورتاں پوریاں کریسوں۔ بجٹ وچ پی ایس ڈی پی کیتے ہک ہزار ارب روپے رکھئے ڳئن۔ تنخواہواں وچ 10 فیصد ودھارا کیتا ڳئے اتے اساں آئی ایم ایف کوں ݙس ݙتا ہئی جو زراعت تے کوئی ٹیکس نہ لڳݨ ݙیسوں۔وفاقی کابینہ دے اجلاس توں خطاب کریندے وزیراعظم آکھیے جو ایران اتے اسرائیل وچال جنگ دی وجہ نال صورتحال تشویشناک اتے افسوسناک اے۔ اسرائیل اساݙے ہمسائے بھرا ملک ایران دے خلاف کھلی جارحیت کیتی اے جیں وچ سینکڑاں لوک شہید اتے سینکڑاں زخمی تھی چُکن۔ میں، نائب وزیراعظم اتے دفتر خارجہ ایں جارحیت دی بھرپور مذمت کیتی اے۔ عالمی برادری کوں جنگ بندی کیتے بھرپور کوششاں کرݨیاں چاہیدن۔وزیراعظم آکھیے جو میݙی ایں حوالے نال ایران دے صدر مسعود پزشکیان نال وی ٹیلی فون تے تفصیلی ڳالھ تھئی، ترکیہ دے صدر رجب طیب اردگان نال وی میں ڳالھ کیتی۔ ایران دے صدر نال ڳالھ مہاڑ وچ میں پاکستان دے عوام دی طرفوں ایران دے نال مکمل یکجہتی دا اظہار کیتا۔ اللہ کرے اتھاں جلدی توں جلدی امن قتھیوے کیونجو اے جنگ نہ صرف خطے بلکہ عالمی امن کیتے وی ٻہوں خطرناک اے۔وزیراعظم آکھیے جو غزہ دی صورتحال وی انتہائی تشویشناک اتے افسوسناک اے، 50 ہزار توں زیادہ ٻال، بڈھے، تریمتاں، نینگر، ڈاکٹرز اتے انجینئرز شہید تھی چُکن۔ غزہ وچ ظلم اتے بربریت تھیندی پئی اے، عالمی ضمیر کݙاں جاڳسی۔ انہاں آکھیا جو نائب وزیراعظم تے وزیر خارجہ 21 اتے 22 تاریخ کوں او آئی سی دے وزرائے خارجہ دے اجلاس وچ شرکت کیتے ترکیہ ویندے پئن۔ ترک صدر رجب طیب اردگان نال وی میݙی ڳالھ تھئی ہئی، انہاں دیاں کوششاں اتے انہاں دا موقف وی وݙا واضح اے۔وفاقی بجٹ دے حوالے نال وزیراعظم آکھیے جو وفاقی بجٹ پیش تھی چُکئے، وزیر خزانہ، سیکرٹری خزانہ، چیئرمین ایف بی آر اتے انہاں دی ٹیم بھرپور محنت کیتی، اتحادی جماعتاں کوں وی بجٹ تے اعتماد وچ گھدا ڳئے، ایں ویلھے پارلیمنٹ وچ بجٹ تے بحث جاری اے۔ وزیراعظم آکھیے جو آئی ایم ایف کوں اساں ݙس ݙتا ہئی جو زراعت تے کوئی ٹیکس نہ لڳسی، نہ کھاد تے اتے نہ ہی کیڑے مار دوائیں تے ٹیکس لڳسی، آئی ایم ایف اساݙی ایں گالھ کوں تسلیم کر گھدا جئیں تے انہاں دے شکر گزار ہیسے۔ زراعت دا شعبہ پہلے ہی دٻاؤ دا شکار اے، ایں دی ترقی کیتے اساکوں اے فیصلہ کرݨا ہئی، 6 توں 12 لکھ آمدݨ تے صرف ہک فیصد ٹیکس لڳسی جیڑھا جو گزریل سال پنج فیصد ہئی، بجٹ وچ تنخواہواں وچ 10 فیصد ودھارا کیتا ڳئے۔وزیراعظم آکھیے جو بھارت دے نال جنگ وچ اللہ تعالی اساکوں عظیم فتح ݙتی اے، اللہ تعالی دے فضل و کرم، افواج پاکستان دی شاندار کارکردگی اتے 24 کروڑ عوام دی والہانہ محبت اتے حمایت نال اساں ایں جنگ وچ کامیابی حاصل کیتی۔ دہشت گردی دے خلاف وی جنگ کیتے پرعزم ہیسے۔ ایں غرض نال افواج پاکستان کوں ضروری ساز و سامان ݙیوݨ کیتے مالیاتی گنجائش کوں بجٹ وچ ودھایا ڳئے کیونجو اے ویلھے دی لوڑھ اے ۔ وزیراعظم آکھیے جو پی ایس ڈی پی دا حجم وی ہک ہزار ارب روپے رکھیا ڳئے، اساں چیلنجز دے باوجود ہک معاہدہ کیتے ایں کوں پورا کرݨا اے، اساں انہاں وچوں نئیں جیڑھے وعدہ خلافی کرتے ملک دی معیشت کوں دیوالیہ تھیوݨ دے نیڑے گھن ڳئے ہن۔ اللہ تعالی دا شکر اے جو اساں 2023ء وچ نہ صرف ملک کوں دیوالیہ تھیوݨ توں بچایا بلکہ اڄ ملک ترقی کریندا پئے۔ وزیراعظم آکھیا جو ہک وفد بلاول بھٹو زرداری دی سربراہی وچ ملک دا موقف پیش کرݨ کیتے ٻاہرلے ملک ڳیا ہئی ، وفد مختلف ملکاں وچ ونڄ تے پاکستان دی بھرپور نمائندگی کیتی، امریکا، یورپ اتے ݙوجھے ملکاں دا دورہ کیتا، بلاول بھٹو زرداری اتے وفد دے سارے ارکان دی کاوش دی تعریف کریندوں جیڑھا جو انہاں ٻاہرلے ملک پاکستان دی بھرپور نمائندگی کیتی۔
