اسلام آباد۔ 19 جون(اے پی پی)پارلیمانی سیکرٹری برائے انسانی حقوق صبا صادق آکھیے جو فیلڈ مارشل سید عاصم منیر اتے پاکستان کوں اللہ تعالی نے بہوں عزت نال نوازیے، امریکی صدر ڈونلڈ ٹرمپ اتے فیلڈ مارشل سید عاصم منیر دی ملاقات ٻہوں اہم اتے خوش آئند اے، پاکستان اتے ساݙیاں فوجاں دا ماݨ ودھیے، اللہ تعالی دی رحمت دے بعد اساݙی قیادت اتے پاک فوج دا جیڑھا کردار اے ایکوں پوری دنیا ٻہوں قدر نال ݙیہدی پئی اے۔ ہندوستان دی جارحیت دے خلاف فیلڈ مارشل عاصم منیر دی قیادت اچ ڄیویں پاک فوج اپݨا کردار ادا کیتے اتے وزیراعظم مؤثر سفارت کاری کیتی اے ایندا دا چرچا پورے ڄڳ اچ اے، خاص کر امریکی صدر ڈونلڈ ٹرمپ نال فیلڈ مارشل سید عاصم منیر دی گزریل ݙینھ وائٹ ہاؤس اچ ملاقات ٻہوں اہمیت آلی رہی اے، پاکستان اتے اساݙیاں فوجاں دا ہی ساݙا وی ماݨ ودھیے۔ “اے پی پی” نال خصوصی ڳالھ مہاڑ کریندے انہاں آکھیا جو حالیہ بھارتی جارحیت دے جواب اچ فیلڈ مارشل سید عاصم منیر دی دانشمندانہ حکمت عملی پاروں دشمن دے مذموم عزائم ناکام تھئین، پاکستان اتے پاکستانی فوج دا مورال بلند تھئے اتے ہندوستان دا خطے اچ ہک وݙی طاقت دا زعم ترٹیے، اے سب کڄھ وزیراعظم شہباز شریف دی قیادت اچ حکومت اتے فیلڈ مارشل عاصم منیر دی مؤثر حکمت عملی اتے انہاں دے دانش مندانہ فیصلیاں دا نتیجہ اے۔ غزہ دے حوالے نال ہک سوال دے جواب اچ انہاں آکھیا جو سارے مسلم اتے غیر مسلم ریاستاں وی غزہ اچ جاری مظالم تے سراپا احتجاج ہن۔ اسرائیل ہک دہشت گرد ریاست اے اتے نیتن یاہو دہشت گرداں دا سربراہ اے جیڑھا یو این دیاں قرارداداں دی وی پرواہ نہ کریندے ہوئیں سکولاں، ہسپتالاں اتے پناہ گاہواں تے حملے کرویندا پئے اتے ایندے اچ اساݙیاں بھیݨیں، ٻھرا، بزرگ اتے ٻال ناحق شہید تھیندے پئن۔ انہاں آکھیا جو او آئی سی، غیر سرکاری تنظیماں سودھا عالمی برادری کوں رل تے اسرائیل دی بربریت روکݨی ہوسی۔ گزریل ݙینھاں اسلام آباد اچ تھیوݨ آالیاں ݙو چھوہریں دے قتل تے انہاں آکھیا جو وزیراعظم دی ہدایت اے جو انہاں واقعات اچ ملوث افراد نال سختی نال نمٹیا ونڄے اتے ایں حوالے نال اسلام آباد پولیس اتے ایجنسیاں ایں کیس تے کم کرینداں پئن۔ ایمان قتل کیس اچ جیڑھا ملزم ہا او پولیس حراست اچ اے اتے ایں توں تفتیش وی کیتی ویندی پئی اے۔ انہاں آکھیا جو عدالتی کارروائی اچ ایں کیس بارے مضبوط دلائل ݙتے ویسن تاں جو مجرم کوں کیفر کردار تئیں پُچایا ونڄ سڳے۔ انہاں آکھیا جو ٻھاویں او ثنا یوسف ہووے یا ایمان، میں سمجھدی ہاں جو ایجھے واقعات اڳو تے نہ تھیون، ایںدی روک تھام کیتے ایںدے تے کم کریندی پئی ہاں۔ انہاں آکھیا جو تریمتاں دے پرائیویٹ ہاسٹل دے حوالے نال ایس او پیز ٻݨائے ویندے پئن تاں جو انہاں ٻچیاں دی سکیورٹی کیتے اتھاں پورا بندوبست ہووے۔ اتھاں ہک اینڄھا منظم نظام ہووے جیکوں انتظامیہ اتے حکومت رل تے ݙیکھن تاں جو اینڄھا افسوسناک واقعہ ول نا تھیوے۔ بجٹ تے انہاں آکھیا جو بجٹ اچ کوشش کیتی ڳئی اے جو عوام کوں ریلیف ݙتا ونڄے اتے صحت، تعلیم دیاں سہولتاں سودھا عوام دیاں بنیادی ضرورتاں سانڳے ہی بجٹ ٻݨایا ڳئے۔
