راولپنڈی۔ 20 جون (اے پی پی) چیف آف آرمی سٹاف فیلڈ مارشل سید عاصم منیر خطے وچ امن تے استحکام کیتے پاکستان دی غیر متزلزل وابستگی تے زور ݙتا ہے اتے بین الاقوامی اصولاں تے مبنی عالمی نظام دی حمایت دا اعادہ کیتا۔ انہاں پاکستان اتے امریکا وچال انسداد دہشت گردی، علاقائی سلامتی اتے معاشی ترقی جیھے شعبیاں وچ ݙو پاسہ تعاون دی اہمیت کوں اجاگر کیتا۔جمعہ کوں آئی ایس پی آر توں جاری بیان موجب امریکا دے سرکاری دورے اچ چیف آف آرمی اسٹاف فیلڈ مارشل سید عاصم منیر واشنگٹن ڈی سی وچ اعلیٰ امریکی سکالرز، تجزیہ کاراں، پالیسی ماہرین اتے بین الاقوامی میڈیا دے نمائندیاں نال تفصیلی ڳالھ مہاڑ کیتی۔ ایں ملاقات دا مقصد پاکستان دے اصولی مؤقف کوں اجاگر کرݨ، خطے اتے دنیا دے اہم معاملیاں تے پاکستان دے مؤقف کوں بہتر انداز وچ پیش کرݨ اتے آپسی افہام و تفہیم کوں فروغ ݙیوݨ ہا ۔ ایں موقع تے فیلڈ مارشل معرکہ حق اتے آپریشن بنیان مرصوص دی تفصیلات بیان کیتی۔ انہاں دہشت گردی دے خلاف پاکستان دیاں قربانیاں کوں اجاگر کیتا اتے دہشت گردی کوں بطور ہائبرڈ وار فیئر استعمال کرݨ آلے علاقائی عناصر دی نشاندہی کیتی۔انہاں خطے وچ امن تے استحکام کیتے پاکستان دی غیر متزلزل وابستگی تے زور ݙتا اتے بین الاقوامی اصولاں تے مبنی عالمی نظام دی حمایت دا اعادہ کیتا۔ فیلڈ مارشل پاکستان دیاں قابلِ قدر مگر غیر استعمال شدہ صلاحیتاں دا ذکر کریندیں ہوئیں آئی ٹی، زراعت اتے معدنیات دے شعبیاں وچ بین الاقوامی سرمایہ کاری دی دعوت ݙتی۔ فیلڈ مارشل عالمی تے علاقائی تنازعیاں تے پاکستان دے متوازن نقطہ نظر کوں وی اجاگر کیتا اتے مکالمے، سفارت کاری اتے بین الاقوامی قوانین دی پاسداری تے زور ݙتا۔ پاک-امریکا دیرینہ تعلقات دا جائزہ گھندیں ہوئیں، چیف آف آرمی اسٹاف انسداد دہشت گردی، علاقائی سلامتی اتے معاشی ترقی جیھے شعبیاں وچ ݙو پاسہ تعاون دی اہمیت کوں اجاگر کیتا۔ شرکاء فیلڈ مارشل دے واضح، اصولی اتے بااعتماد مؤقف کوں سراہیا اتے ایں ملاقات کوں پاکستان اتے امریکا وچال تزویراتی مکالمے وچ ہک مثبت پیش رفت قرار ݙتا۔ اے ملاقات پاکستان دی شفاف سفارت کاری، عالمی تعلقات وچ فعال شرکت اتے پرامن بقائے باہمی کیتے ایں دے عزم دی عکاس اے۔
