اسلام آباد۔ 20 جون (اے پی پی) وفاقی وزیر قانون اعظم نذیر تارڑ آکھیا جو وفاقی وزیر خزانہ کل بجٹ تے بحث نبڑیسن، بلوچستان دے مسائل بہوں گھمبیر ہن، اساݙی نیت تے شک نہ کیتا ونڄے، وفاقی حکومت صوبے کیتے جو کڄھ وی کر سڳدی ہے کریسی۔جمعہ کوں سینیٹ اچ مختلف ارکان ولوں چاتے ونڄݨ آلے نکات دا جواب ݙیندیں ہوئیں انہاں آکھیا جو وزیراعظم شہباز شریف بلوچستان دی ترقی تے خصوصی توجہ ݙیندے پئن۔ بلوچستان اچ چار دانش سکول تعمیر کیتے ویسن، ہک سکول تے ترائے ارب روپے لاگت امدی اے، حکومت بلوچستان کوں وی ایں تے آن بورڈ گھدا ڳئے۔ اینویں ای پی ڈی ایل دا جݙاں فیصلہ تھیا تاں وزیراعظم آکھیا جو ٹیکس پورے ملک توں کٹھا تھیوݨے، میں بلوچستان کوں اے سہولت ݙیوݨ چاہندے۔ خونی سڑک دا معاملہ اتھاں کئی واری چاتا ڳئے اتے ساری دی ساری رقم ایں کیتے منتقل کر ݙتی ڳئی اے اتے کوئٹہ، چمن کراچی شاہراہ کوں بہتر ٻݨایا ویسی۔انہاں آکھیا جو بلوچستان اساݙے دل دے بہوں نیڑے اے، اتھاں دے مسائل بہوں گھمبیر ہن، اساݙی نیت تے شک نہ کیتا ونڄے، وفاقی حکومت جو کڄھ وی کر سڳدی اے کریسی۔ انہاں آکھیا جو سندھ حکومت قانون منظور کر ڳھدے 18 سال توں گھٹ عمر دی شادی تے پابندی اے۔ ہندو ٻالڑیاں دے اغوا دا جو واقعہ پیش آئے ایں بارے وزارت انسانی حقوق صوبائی حکومت دے نال مسلسل رابطے اچ اے، ایں واقعے دی مکمل چھان بین تھیسی۔ وفاقی حکومت اتے وزارت داخلہ ایں بارے صوبائی حکومت نال مکمل تعاون کریسی۔
