ثنا یوسف دا قتل ٹیسٹ کیس ہووݨا چاہیدے، کیس توں توجہ ہٹاوݨ نہ ݙیسوں، ملزم کوں سخت سزا ݙتی ویسی،عطاء اللہ تارڑ

اسلام آباد۔ 21 جون (اے پی پی) وفاقی وزیر اطلاعات و نشریات عطاء اللہ تارڑ آکھیے جو معروف ٹک ٹاکر ثنا یوسف دے قتل تے پوری قوم ݙکھی اے۔ ثنا یوسف دا قتل ٹیسٹ کیس ہووݨا چاہیدے تاں جو اڳوں کوئی ایجھا جرم کرݨ دی جرات نہ کر سڳے۔ وزیراعظم محمد شہباز شریف اتے وزیر داخلہ ایں سانحے دا سختی نال نوٹس ڳھدے، ملزم کوں سخت سزا ݙتی ویسی، کیس کوں منطقی انجام تئیں پُڄاوݨ کیتے قانونی ٹیم تشکیل ݙتی ویسی۔اے ڳالھ انہاں مقتولہ معروف ٹک ٹاکر ثنا یوسف دی رہائش گاہ دے دورے دے موقع تے میڈیا نال ڳالھ مہاڑ کریندے آکھی۔ وفاقی وزیر اطلاعات آکھیے جو ثنا یوسف دے قتل تے پوری قوم ݙکھی اے ، اے واقعہ ہک ٹیسٹ کیس ہووݨا چاہیدے۔ انہاں ݙسایا جو وزیراعظم اتے وفاقی وزیر داخلہ ثنا یوسف دے قتل دا سختی نال نوٹس ڳھدے۔ لوڑھ ایں ڳالھ دی اے جو قانونی طور تے کیس تکڑا بݨایا ونڄے تاں جو ملزم کوں سخت سزا ݙتی ونڄ سڳے۔ انہاں آکھیے پولیس اپݨی مہارت اتے بہترین انویسٹی گیشن نال کجھ گھنٹے اچ ملزم کوں گرفتار کیتا، ہݨ لوڑھ ایں امر دی اے جو پراسیکیوشن دے عمل وچ کوئی نقص باقی نہ رہے اتے کیس کوں قانونی طور تے تکڑابݨایا ونڄے۔وفاقی وزیر اطلاعات آکھیے عدالت وچ پیشی دے دوران او چہرے نظر نئیں آئے جیڑھے سوشل میڈیا تے مقتولہ ثنا یوسف دے نال فوٹو سیشن کریندے ہن یا اڄ ایں دے خون تے پوسٹاں لیندے پئن۔ انہاں آکھیے انہاں لوکاں کوں چاہیدے جو او عدالتی کارروائی وچ وی نال کھڑن۔ وفاقی وزیر اطلاعات آکھیے جو اساݙے وکلاء متاثرہ خاندان کوں قانونی معاونت ݙیسن اتے کیس تے مسلسل پیشرفت کوں یقینی بݨایا ویسی۔ انہاں آکھیے جو اکثر اوقات کیس پراݨی ڳالھ بݨ ویندے اتے توجہ ہٹ ویندی اے لیکن اساں ایں کیس توں توجہ ہٹاوݨ نہ ݙیسوں اتے کیس کوں منطقی انجام تئیں پُڄاوݨ کیتے قانونی ٹیم تشکیل ݙتی ویسی تاں جو ملزم کوں سخت سزا ݙتی ونڄ سڳے۔ہک سوال دے جواب وچ وفاقی وزیر اطلاعات آکھیے جو سوشل میڈیا پلیٹ فارمز دا استعمال ٻہوں ذمہ واری نال کیتا ونڄݨا چاہیدے۔جِتھاں اے فورمز مثبت مقصد کیتے استعمال تھی سڳدن اتھاں انہاں دا منفی استعمال معاشرے کوں ضیان پڄیندا پئے ۔ ٻالڑیاں کوں ہراسانی، بلیک میلنگ اتے تشدد جیھے مسئلیں توں تحفظ ݙیوݨ کیتے اساکوں سانجھے اقدامات کرݨے ہوسن۔ وفاقی وزیر اطلاعات آکھیے جو ٻالڑیاں دے تحفظ کیتے باقاعدہ فورم بݨاوݨ دی وی لوڑح اے تاں جو تریمتاں اتے ٻالڑیاں کوں محفوظ ماحول ݙتاونڄ سڳے۔ ایں توں پہلے وفاقی وزیر اطلاعات مقتولہ ثنا یوسف دے گھرآلیں نال ملاقات کیتی اتے ثنا یوسف دے قتل تے تعزیت کیتی ۔ انہاں مرحومہ ثنا یوسف دے ایصال ثواب کیتے دعا وی منڳی۔