رباط۔ 23 جون (اے پی پی) وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال کوں اسلامی دنیا دی تعلیمی، سائنسی و ثقافتی تنظیم (آئی سی ای ایس سی او) ولوں اعلیٰ ترین اعزاز “لائف ٹائم اچیومنٹ میڈل آف آنر” نال نوازیا ڳیا۔ اے اعزاز انہاں کوں مراکش دے دارالحکومت رباط اچ تھیوݨ آلے “اسلامی دنیا دیاں یونیورسٹیاں دے وائس چانسلرز دے چھینویں فورم” اچ آئی سی ای ایس سی او دے ہیڈ کوارٹر اچ پیش کیتا ڳیا۔پلاننگ کمیشن ولوں جاری بیان اچ آکھیا ڳیا جو اے اعزاز پروفیسر احسن اقبال دی ݙو ݙھاکیاں توں ودھ عرصے تے پھیلی عوامی خدمات، انسانی وسائل دی ترقی، اعلیٰ تعلیم اچ انقلابی اصلاحات، اَتے سائنسی و ٹیکنالوجی دے شعبے اچ انہاں دیاں گراں قدر خدمات دے اعتراف اچ ݙتا ڳئے۔پروفیسر احسن اقبال دی قیادت اچ پاکستان اچ 2013 توں 2025 اچ سرکاری جامعات دی تعداد 99 توں ودھ تے 154 تھی ڳئی، جݙاں جو طلبا دے اندراج اچ 47 فیصد اَتے استاداں دی تعداد اچ 39 فیصد وادھا ریکارڈ کیتا ڳئے۔ انہاں بلوچستان، گلگت بلتستان، آزاد کشمیر اَتے ٻئے پسماندہ علاقیاں اچ اعلیٰ تعلیمی اداریاں دا قیام یقینی بݨایا، تاں جو تعلیم ہر شہری دا حق بݨ سڳے۔ پروفیسر اقبال دی قیادت اچ پاکستان نے اعلیٰ تعلیم دے شعبے اچ ہک جامع اَتے انقلابی توسیع ݙیکھی۔ 2013 توں 2025 اچ سرکاری جامعات دی تعداد 99 توں ودھ تے 154 تھی ڳئی جو 58 فیصد وادھا اے۔ طلبا دا اندراج 11 لکھ توں ودھ تے 16 لکھ 50 ہزار تھی ڳیا یعنی 47 فیصد وادھا جݙاں جو استاداں دی تعداد 27,633 توں ودھ تے 38,000 توں ودھ تھی ڳئی جو کہ 39 فیصد وادھا اے۔ اے اعداد و شمار تعلیم، جدت اَتے رسائی کوں قومی ترقیاتی حکمت عملی دا مرکز بݨاوݨ دی پالیسی دا عکاس ہن۔انہاں بلوچستان، گلگت بلتستان، آزاد کشمیر اَتے ٻئے پسماندہ علاقیاں اچ جامعات دے قیام کوں یقینی بݨایا تاں جو تعلیم تئیں کجھ لوکاں دی رسائی نہ راہوے بلکہ ہر شہری دا حق بݨے، خواہ اوں دا تعلق کہیں وی علاقے، صنف یا پس منظر توں ہووے۔ تریمتیں اَتے اقلیتاں کوں وی تعلیمی میدان اچ اڳوں گھن آوݨ کیتے انہاں دیاں کوششاں پاکستان دے ترقیاتی اشاریاں کوں بہتر کرݨ اَتے تعلیم اچ عالمی مساواتی اہداف نال ہم آہنگ کرݨ اچ مددگار ثابت تھئین۔1998 اچ پروفیسر احسن اقبال نے 5,000 بیرون ملک اَتے 5,000 مقامی پی ایچ ڈی سکالرشپس دا آغاز کیتا جئیں نال سائنس تے ٹیکنالوجی اچ تحقیق، تدریس اَتے نویں نسل دی تیاری دی بنیاد رکھی ڳئی۔ بعداچ انہاں “پاکستان۔ امریکا نالج کوریڈور” دی بنیاد رکھی جئیں دا مقصد امریکہ دیاں صفِ اول دیاں جامعات اچ 10,000 پاکستانی طلبا کوں پی ایچ ڈی دی تعلیم ݙیوݨ اے۔ آئی ٹی اَتے سائبر ٹیکنالوجی اچ انہاں دی سرمایہ کاری نے ایجھا ماہرین پیدا کیتے ہن جو اڄ عالمی ڈیجیٹل معیشت اچ مؤثر کردار ادا کریندے پئن اَتے پاکستان دے سائبر دفاع کوں مضبوط بݨیندے پئن۔ایں موقع تے پروفیسر احسن اقبال ایں اعزاز کوں پاکستان کیتے اعزاز قرار ݙیندیں ہوئیں آکھیا جو اے کامیابی وزیراعظم شہباز شریف دے وژن اَتے انہاں دی علم تے مبنی پالیسیاں دی مرہونِ منت اے۔ تعلیم اَتے سائنس اچ سرمایہ کاری ای ترقی دا اصل راہ اے۔ اے ایوارڈ پاکستان دی بین الاقوامی سطح تے ودھی ہوئی تعلیمی اَتے سائنسی قیادت دا ثبوت اے اَتے ملک دے روشن مستقبل ول ہک ٻیا اہم سنگ میل اے۔
