عدالتی کارروائیاں کوں تکھا اَتے موثر بݨاوݨ کیتے وکلاء برادری مقدمیں دی ڈیجیٹل فائلنگ اپناوے، چیف جسٹس آف پاکستان جسٹس یحییٰ آفریدی

لاہور۔ 25 جون (اے پی پی) چیف جسٹس آف پاکستان جسٹس یحییٰ آفریدی نظام انصاف دی موثر عملداری اچ وکلاء برادری دے کلیدی کردار دی تعریف کریندے وکلاء تے زور ݙتے جو او عدالتی کارروائیاں کوں تکھا اَتے موثر بݨاوݨ کیتے مقدمیں دی ڈیجیٹل فائلنگ اپناون۔ سپریم کورٹ آف پاکستان دے شعبہ تعلقات عامہ توں جاری اعلامیہ موجب چیف جسٹس آف پاکستان جسٹس یحییٰ آفریدی ،جسٹس شکیل احمد اَتے جسٹس اشتیاق ابراہیم دے رلے سپریم کورٹ بار ایسوسی ایشن لاہور دا دورہ کیتا۔ انہاں دے آوݨ تے سپریم کورٹ بار ایسوسی ایشن دے سیکرٹری سلمان منصور اَتے ݙوجھے وکیلاں پُرتپاک استقبال کیتا۔ چیف جسٹس بار دا شکریہ ادا کیتا اَتے نظام انصاف دی موثر عملداری اچ وکلاء برادری دے کلیدی دی تعریف کیتی۔ ایں موقع تے انہاں سپریم کورٹ برانچ رجسٹری لاہور اچ ہک فزیبلیٹی دی بنیاد تے سہولت مرکز دے قیام دا اعلان کیتا۔ اے سینٹر وکلاء اَتے سائلین کیتے ہک ون ونڈو سروس ݙیسی جیڑھا جو ڈیجیٹل طور تے مربوط اَتے گھٹ لاڳت عدالتی نظام کیتے سپریم کورٹ دے عزم دا مظہر ہوسی۔ چیف جسٹس وکلاء برادری تے زور ݙتا جو او مقدمیں دی ڈیجیٹل فائلنگ کوں اپناون تاں جو عدالتی کارروائیاں اچ رفتار اَتے موثریت گھن آئی ونڄ سڳے ۔ انہاں قانون دی حکمرانی دے قیام اچ بار دے لازمی کردار کوں اجاگر کیتا اَتے ایں پیشہ ورانہ شعبے کیتے بینچ دی عزت اَتے احترام دا اعادہ کیتا۔ ہک اہم پیشرفت دے طور تے چیف جسٹس اعلان کیتا جو قانون و انصاف کمیشن آف پاکستان دے تحت ہک نویں سکیم دا آغاز کیتا ڳئے جیں دے تحت مالی طور تے کمزور سائلین کوں ریاستی خرچ تے وکلاء دی معاونت ݙتی ویسی،بھاویں انہاں دا مقدمہ مجسٹریٹ عدالت اچ ہووے یا سپریم کورٹ اچ، ایں اقدام دا مقصد ہر شہری کیتے مساوی عدالتی رسائی کوں یقینی بݨاوݨ اے۔سیکرٹری سپریم کورٹ بار ایسوسی ایشن سلمان منصور چیف جسٹس دے دورے تے شکریہ ادا کیتا اَتے بار دے مسئلیں دے حل کیتے انہاں دی قیادت دی تعریف کیتی ۔ انہاں سہولت مرکز دے قیام کوں خوش آئند قرار ݙتا اَتے عدالتی اصلاحات اچ بار دے مکمل تعاون دا یقین ݙیوائے۔ ایں توں پہلے چیف جسٹس سپریم کورٹ برانچ رجسٹری لاہور اچ ہک اعلیٰ سطحی اجلاس دی صدارت کیتی جیں اچ عدالت دی آٹومیشن اَتے ڈیجیٹل تبدیلی دے اقدامات دا جائزہ ڳِھدا ڳئے۔ انہاں عدالتی عمل دے ہر مرحلے اچ ٹیکنالوجی دے انضمام دی اہمیت تے زور ݙتا اَتے ایں ڳالھ کوں نشابر کیتا جو ایجھا نظام انصاف تشکیل ݙتا وںجے جو موثر، شفاف اَتے عوامی ضرورتاں دے مطابق ہووے۔ پنجاب انفارمیشن ٹیکنالوجی بورڈ (پی آئی ٹی بی) دے نمائندیں چیف جسٹس کوں لاہور ہائی کورٹ دے کامیاب ڈیجیٹل اقدامات تے بریفنگ ݙتی اَتے اپݨی پیشرفت دیاں جھلکیاں پیش کیتیاں۔