اسلام آباد۔ 27 جون (اے پی پی) حج 2026 کیتے عازمین دی لازمی رجسٹریشن شروع کر ݙتی ڳئی اے جو 9 جولائی تئیں جاری راہسی۔ جمعه کوں وزارت مذہبی امور دے ترجمان عمر بٹ موجب حج رجسٹریشن کیتے کوئی فیس کائنی۔ سرکاری اَتے نجی سکیماں کیتے حج 2026 کیتے پہلے ویلھے رجسٹریشن کراوݨا لازمی اے۔ ٻاہرلے ملک رہݨ آلے پاکستانیاں کیتے وی رجسٹریشن کراوݨا لازمی ہوسی۔ رجسٹریشن کراوݨ آلے درخواست گزار ای حج 2026 دے اہل سمجھیے ویسن۔ حج رجسٹریشن پورے ملک اچ منظور شدہ 15 بنکاں توں کرائی ون٘ڄ سڳدی اے۔ حج رجسٹریشن دے بعد عازمین سرکاری یا نجی حج سکیم منتخب کر سڳسن۔ ایں سال پرائیویٹ سکیم توں رہ ون٘ڄݨ آلے عازمین کیتے وی رجسٹریشن لازمی ہوسی۔ حج 2026 دے اخراجات اَتے ٻئی شرطاں تے ضوابط حج پالیسی دے مطابق جاری کیتے ویسن۔ حج رجسٹریشن حکومت سعودی عرب دی ہدایت تے کیتی ویندی پئی اے۔ رجسٹریشن دے اعداد و شمار دا سعودی حکومت کوں ݙسیا ویسی۔
