راولپنڈی۔ 27 جون (اے پی پی) چیئرمین جوائنٹ چیفس آف اسٹاف کمیٹی جنرل ساحر شمشاد مرزا سالانہ دفاعی اَتے سلامتی مذاکرات دے 14ویں اجلاس اچ شرکت کیتے آسٹریلیا دا دورہ کیتا۔ دورے دے دوران انہاں آسٹریلیا دی اعلیٰ سویلین اَتے عسکری قیادت نال ملاقاتاں کیتیاں جنہاں اچ ڈیفنس فورسز دے سربراہ ایڈمرل ڈیوڈ جانسٹن، ڈائریکٹر جنرل آفس آف نیشنل انٹیلی جنس (او این آئی) اینڈریو شیئرر، آسٹریلوی فوج دے سربراہ لیفٹیننٹ جنرل سائمن اسٹیورٹ اَتے خارجہ امور اَتے تجارت دے محکمہ انسداد دہشت گردی دی سفیر جیما ہگنس نال ملاقات کیتی۔دفاعی اَتے سیکورٹی مذاکرات دا مقصد سانجھی افہام و تفہیم کوں تکڑا بݨاوݨا اَتے افواج دے وچال دفاعی تعاون کوں مزید وسعت ݙیوݨ کیتے شعبیں دی نشاندہی کرݨ ہئی۔ ملاقاتاں دے دوران ݙوہیں فریقاں عالمی اَتے علاقائی ماحول، سلامتی دے چیلنجز اَتے موجودہ ݙو طرفہ فوجی تبادلیں کوں ودھاوݨ دے موقعیں سودھے وسیع تر امور تے ڳالھ مہاڑ کیتی۔ دورے دے دوران انہاں آسٹریلین ڈیفنس کالج اچ پاکستان دی سلامتی دے تناظر اچ ہک لیکچر ݙتا اَتے علاقائی امن و استحکام اچ پاکستان دے کردار تے روشنی پاتی۔ انہاں آسٹریلوی بحری جہاز ہمس ایڈیلیڈ دا دورہ وی کیتا۔ ایں توں پہلے سی ݙی ایف دے دفتر پڄݨ تے ترائی مسلح افواج دے چاق و چوبند دستے انہاں کوں گارڈ آف آنر پیش کیتا۔
