اسلام آباد۔ 28 جون (اے پی پی) وفاقی وزیرِ صحت سید مصطفیٰ کمال دی صدارت اچ ہک اہم اجلاس اچ قومی حفاظتی ٹیکہ جات دے پروگرام کوں مؤثر اَتے ہمہ گیر بݨاوݨ متعلق جامع حکمت عملی تے غور کیتا ڳئے۔ اجلاس اچ ڈوپاسی فاؤنڈیشن دے وفد سودھے سینئر صحت حکام شرکت کیتی۔ ایں موقع تے پاکستان دے “ایکسپینڈڈ پروگرام آن میونائزیشن” دی کارکردگی بہتر بݨاوݨ اَتے ایں دی رسائی کوں پرے دے علاقیں تئیں ممکن بݨاوݨ دے اقدامات زیرِ بحث آئے۔ وزیرِ صحت مؤثر میڈیا مہمات اَتے زمینی سطح تے کمیونٹی آؤٹ ریچ دی اہمیت تے زور ݙتا تاں جو صحت متعلق اہم پیغامات ملک دے ہر طبقے تئیں پڄ سڳن۔ انہاں حکومت دے ایں عزم کوں دوہرائے جیڑھا جو پاکستان اچ ویکسین دی مکمل کوریج کوں یقینی بݨایا ویسی اَتے مجموعی طور تے صحتِ عامہ دے نتیجے اچ بہتری گھن آئی ویسی۔ ایں حوالے نال، ڈوپاسی فاؤنڈیشن ہک اہم اجلاس دی میزبانی کیتی جیں اچ ینگ پارلیمنٹرینز فورم دے ارکان شرکت کیتی۔ ایں اجلاس دا مقصد صحت دیاں منصفانہ اَتے قابلِ رسائی سہولتاں کیتے پالیسی اقدامات کوں ودھاوݨ اَتے “پارلیمانی کاکس گلوبل ہیلتھ اَتے اینڈنگ ٹی بی” دا آغاز کرݨ ہئی۔ اے اقدام ایجھے علاقیں اچ مؤثر پالیسی سازی اَتے زمینی سطح تے سرگرمیاں کوں تکھا کرݨ دی کوشش اے جِتھاں صحت دیاں سہولتاں محدود ہن۔تقریب دا ساریں توں نمایاں لمحہ جدید، انتہائی ہلکے وزن دے، مصنوعی ذہانت نال چلݨ آلے ایکسرے آلے دا عملی مظاہرہ ہئی۔ اے ہک انقلابی ٹول اے جیڑھا دیہاتی اَتے پرے دے علاقیں اچ تپِ دق (ٹی بی) دی تشخیص دے عمل کوں بدل سڳدے۔ ایں ٹیکنالوجی دی علامتی حوالگی دے موقع تے مہمانِ خصوصی، متعدد گنیز ورلڈ ریکارڈز دے حامل مسٹر میکائل کارنی وی شرکت کیتی، انہاں دی شرکت مقامی صحت دے شعبے اچ عالمی یکجہتی دی علامت ہئی۔ ڈوپاسے فاؤنڈیشن جنرل سیکریٹری ینگ پارلیمنٹرینز فورم اَتے سارے وفد دا ایں وختی تعاون اَتے اشتراک دی حمایت کرݨ تے شکریہ ادا کیتا۔ اے اشتراک پاکستان دے ایں قومی مشن پاسے ہک مضبوط قدم اے جیں دا مقصد آوݨ آلیاں نسلاں کوں بیماریاں توں محفوظ بݨاوݨ اَتے تپِ دق جیھے مہلک مرض دا خاتمہ کرݨا اے۔
