اسلام آباد۔ 28 جون (اے پی پی) آندے چووی گھنٹے وفاقی دارالحکومت اسلام آباد سودھے، شمال مشرقی پنجاب، خطہ پوٹھوہار، اُتلے خیبرپختونخوا اَتے کشمیر اچ اکثر جہیں تے تکھی ہوا گھلݨ اتے کھمݨ گاجاں نال مینھ جݙاں جو کجھ جہیں تے زور دا مینھ وسݨ دا امکان اے ۔ایں دوران شمال مشرقی/جنوبی بلوچستان، وسطی/جنوبی پنجاب، جنوب مشرقی/تلویں سندھ اچ کجھ جہیں تے تکھی ہوا تے کھمݨ گاجاں نال مینھ وسݨ دا امکان اے۔محکمہ موسمیات موجب گزریل 24 گھنٹے اچ پنجاب، سندھ، کشمیر، اُتلے خیبرپختونخوا، اسلام آباد، شمال مشرقی/جنوبی بلوچستان اچ تکھی ہوا تے کھمݨ گاجاں نال مینھ وسیا تے کجھ جہیں تے زور دا مینھ وٹھا ۔ ساریں توں ودھ مینھ (ملی میٹر) اٹک اچ 102، لاہور ایئرپورٹ 65، چکوال 32، بہاولپور ایئرپورٹ اَتے رحیم یار خان 22، خانپور 19، بہاولپور سٹی 8، نور پور تھل اَتے نارووال 2، قصور ہک، شہید بینظیر آباد 54، کراچی 32، پڈعیدن 26، کراچی (گلشن معمار 28، سعدی ٹاؤن 20، یونیورسٹی روڈ 13، فیصل بیس، بحریہ ٹاؤن 10، ناظم آباد، جناح ٹرمینل 9، کورنگی ٹاؤن، نارتھ کراچی 7، کیماڑی، اورنگی ٹاؤن 6، گلشن حدید، ایئرپورٹ 5، ڈی ایچ اے فیز ٹو ہک)، دادو 15، سکرنڈ 12، ٹنڈو جام اَتے مٹھی 10، حیدر آباد 7، بدین 3، حیدرآباد ایئرپورٹ اَتے میرپور خاص 2، خیرپور ہک، کوٹلی 25، مظفر آباد (ایئرپورٹ اَتے سٹی 4)، کاکول 24، مالم جبہ 9، بالاکوٹ 8، تخت بائی 2 اَتے لسبیلہ اچ 3 ملی میٹر مینھ ریکارڈ کیتا ڳئے۔ہفتے کوں ریکارڈ کیتے ڳئے ودھ توں ودھ درجہ حرارت دی رپورٹ موجب چلاس، سبی، موہنجوداڑو، کوٹ ادو، جیکب آباد اچ43 ڈگری سینٹی گریڈ ریکارڈ کیتا ڳئے۔محکمہ موسمیات چتاوݨی ݙتی اے جو ہفتے دی رات اتوار کوں زور دے مینھ وسݨ پاروں مری، گلیات، مانسہرہ، کوہستان، دیر، سوات، شانگلہ، نوشہرہ، صوابی اَتے ڈی جی خان اچ مقامی/برساتی ندی نالیں اچ طغیانی دا ݙر اے۔ ایویں زور دے مینھ پاروں موسیٰ خیل، بارکھان، خضدار، لسبیلہ اَتے قلات دے مقامی/برساتی نالیں اچ طغیانی دا وی خطرہ اے۔ ایں توں انڄ اندھاری/جھکڑ چلݨ اَتے کھمݨ گاجاں پاروں روزمرہ دے معمولات متاثر تھیوݨ، کمزور انفراسٹرکچر (بجلی دے کھمبے، گاݙیاں، سولر پینل وغیرہ) کوں ضیان دے نال خیبرپختونخوا، مری، گلیات، کشمیر اچ لینڈ سلائیڈنگ پاروں ٹریفک دی آونڄ متاثر تھیوݨ دا وی خطرہ اے۔
