اسلام آباد۔ 29 جون (اے پی پی) ملک دے مختلف علاقیں اچ مینھ دے حوالے نال نیشنل ڈیزاسٹر مینجمنٹ اتھارٹی (این ڈی ایم اے) سارے مقامی اَتے صوبائی حکام تے زور ݙتے جو او ہائی الرٹ رہن اَتے علاقائی زباناں اچ وارننگ جاری کرݨ کیتے اپݨے ڈیزاسٹر رسپانس میکانزم کوں وی فعال کرن، خطرے آلے علاقیں اچ لوکاں کوں سرکاری رہنمائی تے عمل کرݨا چاہیدے، چھل توں متاثرہ علاقیں اچ آونڄ توں پرہیز اَتے ہنگامی ضرورتاں دی تیاری کرݨی چاہیدی اے۔جی ایم ٹیکنیکل (این ݙی ایم اے) سید محمد طیب شاہ آکھیے جو این ڈی ایم اے اپݨی آگاہی مہم کوں تکھا کریندا پیئے اَتے صوبائی حکام دے نال نیڑے رابطہ قائم کریندا پئے تاں جو ممکنہ آفات کیتے متحد اَتے وختی ردعمل کوں یقینی بݨایا ونڄ سڳے۔ ملک دے مختلف علاقیں اچ کوششاں کوں ہم آہنگ کرݨ دا مقصد کمیونٹی کوں تیار کرݨا، مواصلات کوں بہتر بݨاوݨا اَتے بروقت اَتے مؤثر کارروائی دے ذریعے ہنگامی حالات دے اثرات کوں گھٹ کرݨا اے۔ انہاں مزید آکھیے جو این ڈی ایم اے کمزور علاقیاں اچ اپݨی چوکسی برقرار رکھی ہوئی اے اَتے ہنگامی ردعمل دے اقدامات کوں فعال کر ݙتا ڳئے۔انہاں آکھیے جو چھل دی چتاوݨی ویلھے رہائشیاں کوں قیمتی سامان اَتے اہم دستاویزات کوں اُچی جاہ تے نی گھن ون٘ڄݨا چاہیدا اَتے چھل آلے علاقیں اچ ٹرݨ یا گاݙی چلاوݨ توں پرہیز کرݨا چاہیدے ۔ انہاں زور ݙے تے آکھیا جو خانداناں کیتے انخلاء دا واضح منصوبہ ہووݨا چاہیدے اَتے تازہ ترین اپ ڈیٹس اَتے ہدایات کیتے مقامی حکام نال جُڑے رہݨا وی ضروری اے۔
