اسلام آباد۔ 29 جون (اے پی پی) محکمہ موسمیات دے ڈپٹی ڈائریکٹر عرفان ورک آکھیے جو مینھ دا سلسلہ آوݨ آلے 2 توں 3 ݙینھ تئیں جاری رہسی ، ساوݨ دا اڳلا سپیل آوݨ آلے ہفتے متوقع اے۔ انہاں شہراں اچ اربن فلڈنگ دے خطرے دے پیش نظر شہریاں توں الرٹ رہݨ دی اپیل کیتی اے۔اپݨے ہک انٹرویو اچ انہاں آکھیے جو لاہور، راولپنڈی، فیصل آباد، گوجرانوالہ اَتے حیدرآباد جیڑھے شہراں اچ اربن فلڈنگ دی توقع اے، شہری اَتے متعلقہ محکمہ جات چوکس رہن اَتے ممکنہ چھل کیتے تیار رہن۔ انہاں زور ݙتا جو ساوݨ دے مینھ دے نویں اسپیل دے دوران وݙے پیمانے تے مینھ متوقع ہے جیڑھا جو خاص طور تے نشیبی علاقیں اَتے شہری مراکز اچ چھل دے خطرے کوں ودھا سڳدے۔ انہاں آکھیا جو زور دے مینھ وسݨ دا سلسلہ جاری رہسی جئیں توں وسطی پنجاب، شمالی علاقہ جات اَتے کشمیر متاثر تھیسن جِتھاں چھل دی توقع اے۔ انہاں اے وی ݙسایا جو خیبرپختونخوا دے مختلف علاقیاں اچ زور دے مینھ وسݨ دا امکان اے جئیں پاروں چھل دا خطرہ ودھ ویسی ۔عرفان ورک شہریاں کوں مشورہ ݙتا جو او ضروری احتیاط ورتن ، موسم توں باخبر رہن اَتے مینھ ویلھے چھل آلے علاقیں اچ ونجݨ توں پرہیز کرن تاں جو حفاظت یقینی بݨائی ونڄ سڳے۔ انہاں مقامی حکام تے وی زور ݙتا جو او متوقع مینھ توں پیدا تھیوݨ آلی کہیں وی ہنگامی صورتحال کیتے تیار رہن۔
