سیالکوٹ۔ 29 جون(اے پی پی) وزیر دفاع خواجہ محمد آصف آکھیے جو سانحہ سوات متعلق ڳالھ کرݨ کیتے میں کنے الفاظ کائںی ، ایں اچ کوئی شک نئیں جو اے ریسکیو دا بریک ڈاؤن اے، اے پہلا واقعہ کائںی بلکہ ایں توں پہلے وی ریسکیو آلیں دی ناکامی دے اتھاں ایجھے واقعات تھی چُکن، حکمرانی کوئی جھولا جھوٹݨ دی چیز کائنی بلکہ حکمرانی کنڈیاں دی سیجھ اے ایں کیتے سارے حکمراناں کوں چاہیدے جو اپݨے ذاتی و سیاسی مفادات توں ودھ عوامی مفادات دے تحفظ کوں ترجیح ݙیون۔اے ڳالھ انہاں اتھاں ݙسکہ اچ سانحہ سوات اچ جاں بحق تھیوݨ آلے لوکاں دے لواحقین نال تعزیت کرݨ دے بعد میڈیا نال ڳالھ مہاڑ کریندے آکھین۔ انہاں آکھیا جو ایں سانحے متعلق ڳالھ کرݨ کیتے میں کنے الفاظ کائںی لیکن ایں اچ کوئی شک کائنی جو اے ریسکیو دا بریک ڈاؤن اے اَتے اے پہلا واقعہ کائنی بلکہ ایں توں پہلے وی ریسکیو آلیں دی ناکامی دے اتھاں ایجھے واقعات تھی چُکن، ریسکیو آلے اتھاں آئے وی تاں خالی ہتھ آئے اَتے ول چلیے وی ڳئے کیوں جو انہاں کنے کوئی ایجھی مشینری ہی موجود نہ ہئی جیں نال او سامݨے کھڑے ٻالاں اَتے انہاں دے والدین کوں موت دے مُنہ اچ ونڄݨ توں بچا سڳدے۔ انہاں آکھیا جو متاثرہ خاندان کیتے تاں قیامت ترٹ پئی اے لیکن پتہ کائںی اتھاں دے حکمران لوکاں دے ضمیریں تے کوئی قیامت ترٹی اے یا کائناں ، وزیر دفاع دا آکھݨ ہئی جو ایں توں ودھ غفلت تے وسلائی دا کیا ثبوت تھی سڳدے، بلاشبہ قدرتی آفت اللہ تعالی دی طرفوں آندی اے لیکن انہاں حادثیں دے سدباب کیتے اقدامات وی کیتے ویندن جیڑھا صوبائی حکومت نی کیتے، انہاں آکھیا جو متاثرہ خاندان تے جیڑھا اوکھا ویلھا آئے اللہ تعالی بدترین دشمن تے وی ایجھا وقت نہ گھن آوے۔ہک سوال دے جواب اچ انہاں آکھیا جو میں سیاسی ڳالھ مہاڑ نی کرݨ چاہندا، عوام خود فیصلہ کرے لیکن اتنا ضرور آکھساں جو حکمران جِتھاں وی ہوون انہاں کوں اپݨیاں ذمے واریاں ضرور محسوس کرݨیاں چاہیدن کیوں جو حکمرانی کوئی جھولا جھوٹݨ دی چیز کائںی بلکہ حکمرانی کنڈیں دی سیجھ اے ایں کیتے سارے حکمراناں کوں چاہیدے جو اپݨے ذاتی و سیاسی مفادات توں ودھ عوامی مفادات دی حفاظت کرن۔ انہاں سانحے اچ جاں بحق تھیوݨ آلیں کیتے دعائے مغفرت اَتے لواحقین کیتے صبر جمیل دی دعا وی کیتی۔صوبائی وزیر بلدیات پنجاب میاں ذیشان رفیق، رکن صوبائی اسمبلی محمد منشاء اللہ بٹ، رکن صوبائی اسمبلی چوہدری نوید اشرف، رکن صوبائی اسمبلی چوہدری فیصل اکرام، کوآرڈینیٹر وزیراعظم اوورسیز حافظ شاہد کہگ، کمشنر گوجرانوالہ ڈویژن سید نوید حیدر شیرازی، آر پی او گوجرانوالہ طیب حفیظ چیمہ، ڈپٹی کمشنر سیالکوٹ صبا اصغر علی، ایڈیشنل ڈپٹی کمشنر ریونیو سیالکوٹ محمد اقبال سنگھیڑا، اسسٹنٹ کمشنر ڈسکہ عثمان غنی اَتے چیف افسر بلدیہ ڈسکہ الفت شہزاد سودھے ݙوجھے سینئر مسلم لیگی رہنما وی ایں موقع تے اتھاں موجود ہن۔
