اسلام آباد۔ 30 جون (اے پی پی) محرم الحرام سکیورٹی پلان دے جائزے کیتے وفاقی وزیر داخلہ محسن نقوی اَتے وزیر مملکت طلال چوہدری ے مرکزی امام بارگاہ اثنا عشری جی سکس دا دورہ کیتا اَتے امام بارگاہ دے منتظمین نال ملاقات کیتی اَتے انتظامات بارے پُچھیا۔ وزارت داخلہ توں جاری بیان دے مطابق وزیر داخلہ محسن نقوی عزاداراں دی حفاظت کیتے سکیورٹی اَتے ݙوجھے انتظامات دا وی جائزہ ڳِھدا۔ وزیر داخلہ محسن نقوی امام بارگاہ دے منتظمین نال ملاقات کیتی اَتے انتظامات دے بارے پُچھیا، منتظمین سکیورٹی اَتے ݙوجھے انتظامات تے اطمینان دا اظہار کیتا۔ وزیر داخلہ محسن نقوی آکھیا جو محرم الحرام دے موقع تے ہک جامع سکیورٹی پلان ٻݨایا ڳئے، شرپسند عناصر تے سخت نظر رکھی ویندی پئی اے اَتے سرویلنس کوں ٻیا بہتر بݨایا ڳئے۔ محسن نقوی آکھیا جو بزدل دشمن دے ناپاک ارادیاں کوں ناکام بݨاوݨ کیتے سکیورٹی ہائی الرٹ اے۔ انہاں آکھیا جو آزاد کشمیر، گلگت بلتستان اَتے سارے صوبیاں وچ انہاں دی درخواست تے فوج دی تعیناتی دی منظوری ݙتی ڳئی اے۔ محسن نقوی آکھیا جو فوج صوبیاں وچ سول انتظامیہ دی مدد کیتے موجود رہسی۔ انہاں آکھیا جو ڈی آئی جی اسلام آباد پولیس وفاقی وزیر داخلہ محسن نقوی کوں سکیورٹی انتظامات بارے بریفنگ ݙتی۔ وفاقی سیکرٹری داخلہ خرم آغا، ایس ایس پی شعیب وی ایں موقع تے موجود ہن۔
