اسلام آباد۔ 1 جولائی (اے پی پی) وفاقی وزیر برائے منصوبہ بندی، ترقی تے خصوصی اقدامات پروفیسر احسن اقبال دی صدارت وچ این-25 ایکسپریس وے منصوبے دی پیش رفت دا جائزہ اجلاس تھیا۔ اجلاس وچ وزارتِ مواصلات، نیشنل ہائی وے اتھارٹی (این ایچ اے) اتے فرنٹیئر ورکس آرگنائزیشن (ایف ݙبلیو او) دے اعلیٰ حکام شرکت کیتی۔ این ایچ اے حکام اجلاس کوں ݙسیا جو این -25 ایکسپریس وے دی تعمیر چار مرحلیاں وچ جاری اے۔ ایں ویلھے جیوا توں سوراب تئیں 51 کلومیٹر لمبے حصے تے 68 فیصد تعمیراتی کم مکمل تھی ڳئے۔ وفاقی وزیر احسن اقبال ہدایت کیتی جو منصوبے بارے سارے قانونی اتے انتظامی کارروائیاں فوری طور تے مکمل کیتی ونجن تاں جو منصوبے دی سنگ بنیاد دی تقریب 14 اگست 2025 کوں کیتی ونج سڳے۔ انہاں وزارت مواصلات کوں ایں بارے سارے ضروری اقدامات دی ہدایت کیتی۔ وفاقی وزیر ہدایت کیتی جو ایکسپریس وے دے ݙوہاں پاسوں تے جدید سہولتاں نال آراستہ سروس ایریاز بݨائے ونجن جِنھاں وچ ریسٹ ایریاز، فیول پمپس، ریستوران، ورکشاپس اتے ݙوجھیاں ضروری سہولتاں شامل ہوون۔ انہاں سروس ایریاز دے مقاماں دے تعین کیتے ٹرک کمپنیاں نال مشورے دی اہمیت تے زور ݙتا تاں جو سہولتاں کوں زمینی حقائق دے مطابق ترتیب ݙتا ونج سڳے۔احسن اقبال این-25 منصوبے تے کم کرݨ آلے مزدوراں دی حفاظت کوں پہلی ترجیح قرار ݙیندیں ہوئیں خصوصی سیکیورٹی فورس مختص کرݨ دی ہدایت کیتی۔ انہاں ایں موقع تے یاد ݙوایا جو ایں توں پہلے این-85 منصوبے وچال ایف ڈبلیو او دے 42 اہلکار شہید تھئن، جئیں توں ایں نوعیت دے منصوبیاں اچ سیکیورٹی دی اہمیت واضح تھیندی اے۔ وفاقی وزیر این-25 کوں سندھ اتے بلوچستان وچال ہک کلیدی مواصلاتی رابطہ قرار ݙیندیں ہوئیں آکھیا جو اے منصوبہ ایران اتے افغانستان دے رستے وسطی ایشیائی ملکاں تئیں رسائی دا ہک ممکنہ گیٹ وے ثابت تھی سڳدے۔ انہاں آکھیا جو منصوبے دی تکمیل بلوچستان وچ سماجی و اقتصادی ترقی دی راہواں کھولیسی اتے علاقے دی عوام کوں ترقی دے نویں مواقع ݙیسی۔ وفاقی وزیر منصوبے کوں اگست 2027 تئیں مکمل کرݨ دا ہدف مقرر کریندیں ہوئیں متعلقہ اداریاں کوں ہدایت ݙتی جو او سارے وسائل استعمال کرتے منصوبے دی بروقت تکمیل کوں یقینی بݨاون۔
