اسلام آباد۔ 1 جولائی (اے پی پی) وفاقی وزیر داخلہ محسن نقوی اسلام آباد سیکٹر ایچ 16 وچ زیر تعمیر ماڈل جیل دا دورہ کیتا۔ وزیر مملکت برائے داخلہ طلال چوہدری وی انہاں دے نال ہن۔ وفاقی وزیر داخلہ محسن نقوی زیر تعمیر ماڈل جیل دے مختلف حصیاں دا معائنہ کیتا اتے تعمیراتی کماں تے پیشرفت دا جائزہ ڳِھدا۔ وزیر داخلہ محسن نقوی پراجیکٹ دے پہلے مرحلے کوں ایں سال مکمل کرݨ دی ڈیڈ لائن ݙتی اتے آکھیا جو ݙینھ رات کم کر تے تعمیراتی سرگرمیاں ہر صورت مقررہ مُد اچ مکمل کیتی ونجن۔ محسن نقوی آکھیا جو پہلے مرحلے وچ ماڈل جیل وچ 1500 قیدیاں دی گنجائش ہوسی۔ انہاں ماڈل جیل اچ 90 ݙینھ دے اندر ݙو ٻئی بیرکاں بݨاوݨ دی ہدایت کریندیں ہوئیں آکھیا جو جیل وچ 34 بستریاں تے مشتمل ہسپتال اتے مین کچن کوں جلدی توں جلدی مکمل کیتا ونجے۔ وزیر داخلہ محسن نقوی ڈی آئی جی اسلام آباد پولیس کوں ماڈل جیل اچ سٹاف دی تعیناتی کیتے پلان پیش کرݨ دی ہدایت کیتی۔ بریفنگ وچ ݙسیا ڳیا جو جیل دی تعمیر دا منصوبہ 2011 وچ شروع تھیا ہا، کئی سال تعطل دا شکار رہیا۔ وفاقی سیکرٹری داخلہ، ڈی آئی جی اسلام آباد پولیس، ݙپٹی کمشنر، اے ڈی سی جی، سی ڈی اے حکام، کنٹریکٹرز اتے کنسلٹنٹس وی ایں موقع تے موجود ہن۔
