اسلام آباد۔ 1 جولائی (اے پی پی) وزیراعظم محمد شہباز شریف نویں مالی سال دے پہلے ݙینھ پاکستان سٹاک ایکسچینج 100 انڈیکس دے پہلی واری 127,000 دی بلند ترین سطح پار کرݨ تے اطمینان کریندیں ہوئیں آکھیا جو نواں مالی سال ہک چنڳی خبر اَتے معاشی میدان وچ ہک اہم پیشرفت نال شروع تھئے جیڑھا جو خوش آئند اے۔ منگل کوں وزیراعظم آفس دے میڈیا ونگ ولوں جاری بیان موجب وزیراعظم آکھیا جو سٹاک مارکیٹ 100 انڈیکس دا آپݨی بلند ترین سطح تے پُڄݨ ایں گالھ نشابر کریندے جو ملکی معیشت اَتے حکومتی پالیسیاں تے کاروباری برادری اَتے سرمایہ کاراں دا اعتماد ہر ݙینھ نال مضبوط تے مستحکم تھیندا پئے۔ وزیراعظم آکھیا جو گزریل مالی سال وچ حکومت دیاں بہترین معاشی پالیسیاں پاروں ملکی معیشت بتدریج بہترین ریکوری ݙکھائی اے، نواں مالی سال ملکی معیشت دی بہتری دے پندھ اچ ہک سنگ میل ثابت تھیسی۔ وزیراعظم آکھیا جو کاروباری طبقے اَتے سرمایہ کاراں دے شکر گزار ہیسے جو ملکی ترقی تے خوشحالی وچ حکومت دا بھرپور ساتھ ݙیندے پئن، حکومت ملک وچ بہترین کاروباری ماحول دے فروغ اَتے سرمایہ کاراں کوں ٻئی سہولتاں ݙیوݨ بارے کوشاں اے۔ وزیراعظم آکھیا جو حکومت دی معاشی ٹیم کوں ایں کامیابی تے خراج تحسین پیش کرینداں۔
