اسلام آباد۔ 2 جولائی (اے پی پی) وفاقی وزیر داخلہ محسن نقوی اسلام آباد پولیس دی انتہائی پیشہ ورانہ مہارت نال اندھے قتلاں اَتے ہائی پروفائل کیسز کوں حل کرݨ دی کوششاں دی تعریف کریندیں ہوئیں آکھیا جو اسلام آباد پولیس کئی ہائی پروفائل کیسز بہوں گھٹ مدت وچ حل کیتن۔ انہاں ٻیا آکھیا جو سردار فہیم قتل کیس کوں حل کرݨ کیتے جدید ٹیکنالوجی اتے سرویلنس دا استعمال قابل تحسین اے۔ اے ڳالھیں انہاں بُدھ کوں کیسز دا سُراغ لاوݨ آلی اسلام آباد پولیس دی پوری ٹیم نال ملاقات اچ گالھ مہاڑ کریندیں ہوئیں کیتا۔ اسلام آباد پولیس وݙی کامیابی نال ثناء یوسف، تجزیہ نگار سردار فہیم دے قتل کیسز سودھے15 ہائی پروفائل کیسز ریکارڈ مدت اچ ٹریس کر تے ملزمان کوں گرفتار کر ڳِھدا۔ وفاقی وزیر داخلہ محسن نقوی کیسز دا سُراغ لاوݨ والی اسلام آباد پولیس دی پوری ٹیم نال ملاقات کیتی۔ وزیر داخلہ محسن نقوی اسلام آباد پولیس دے افسراں تے جواناں دی بھرپور حوصلہ افزائی کیتی اتے کارکردگی کوں سراہیا۔ وزیر داخلہ آئی جی اسلام آباد پولیس علی ناصر رضوی، ڈی آئی جی جواد طارق، ایس ایس پی آپریشنز محمد شعیب، ایس ایس پی انویسٹی گیشن عثمان طارق بٹ، ایس پی سٹی سلیمان ظفر، ایس پی صدر کاظم نقوی، اے ایس پی علی رضا، اسسٹنٹ ڈائریکٹر عباس مہدی، ݙی ایس پی سلیمان شاہ، متعلقہ تھاݨیاں دے ایس ایچ اوز اتے انویسٹی گیشن ٹیماں دے اہلکاراں نال ملاقات کیتی اتے انہاں کوں شاباش ݙتی اتے آکھیا جو “ویل ڈن اسلام آباد پولیس، تہاݙی کارکردگی تے فخر اے”۔ وزیر داخلہ محسن نقوی آئی جی اسلام آباد پولیس کوں 21 سال توں کانسٹیبل دے عہدے تے کم کرݨ آلے رانا وسیم کوں قواعد تے ضوابط دے تحت ترقی ݙیوݨ دی ہدایت کیتی۔ وزیر مملکت داخلہ طلال چوہدری، وفاقی سیکرٹری داخلہ خرم آغا، چیف کمشنر اسلام آباد محمد علی رندھاوا اتے ڈپٹی کمشنر اسلام آباد وی ایں موقع تے موجود ہن۔
