اسلام آباد۔ 2 جولائی (اے پی پی) وزیراعظم محمد شہباز شریف سال 25-2024 اچ وفاقی ٹیکس محصولات اچ گزریل 10 سالاں دی نسبت 42 فیصد وادھے تے وزارت خزانہ اَتے ایف بی آر (FBR) دی کوششاں دی تعریف کریندیں ہوئیں آکھیا جو پاکستان دے روشن معاشی مستقبل کیتے معاشی اہداف دے حصول وچ کہیں قسم دی کوتاہی برداشت نہ کیتی ویسی۔ بُدھ کوں وزیراعظم آفس دے میڈیا ونگ توں جاری بیان موجب وزیراعظم محمد شہباز شریف دی صدارت اچ ایف بی آر دی ڈیجیٹلائزیشن اَتے ٻئی اصلاحات بارے ہفتہ وار جائزہ اجلاس تھیا۔ایں موقع تے بریفنگ وچ ݙسیا ڳیا جو مالی سال 25-2024 اچ اصلاحات اَتے ٹیکس قانوناں دے نفاذ نال گزریل سال دی نسبت کُل 865 ارب روپے دے ودھ محصولات وصول کیتے ڳئے جو تاریخ ساز 8 گنا وادھا اے۔ مالی سال 25-2024 اچ محصولات دا مجموعی پیداوار نال تناسب (Federal Revenue to GDP Ratio) 11.3 فیصد رہیا جو گزریل سال دے مقابلے وچ 1.5 فیصد ودھ اے۔ وزیراعظم آکھیا جو نویں مالی سال اچ محصولات دی وصولی اَتے ݙوجھے معاشی اہداف کوں حاصل کرݨ وچ وی ایں مستعدی دا مظاہرہ کیتا ونجے، ایں اچ کہیں قسم دی ادارہ جاتی سُستی کوں برداشت نہ کیتا ویسی۔وزیراعظم آکھیا جو نویں مالی سال اچ محصولات دی وصولی اَتے ݙوجھے معاشی اہداف کوں حاصل کرݨ کیتے سارے ادارے مکمل جانفشانی نال کم کرن۔ وزیراعظم آکھیا جو محصولات دی وصولی اَتے معاشی اہداف دے سارے مرحلیاں دی ذاتی طور تے نگرانی کریندا پیاں۔ انہاں ایف بی آر دے افسراں کوں ہدایت کیتی جو محصولات دی وصولی اتے آپݨے فرائض دی ادائیگی وچ ایف بی آر عوام نال عزت و تکریم نال پیش آوے، ملکی معیشت دی ترقی کیتے سارے سرکاری ادارے ایف بی آر نال مکمل تعاون کرن۔ وزیراعظم ہدایت کیتی جو ٹریک اینڈ ٹریس ڈیجیٹل پروڈکشن سسٹم کوں شیواں دے پیداواری اتے ترسیل دے مرحلیاں وچ شامل کیتا ونجے تاں جو ساری پیداوار کوں ٹیکس نیٹ وچ گھن آیا ونج سڳے۔ انہاں ٻئی ہدایت کیتی جو ٹیکس نادہندہ اَتے ساریاں صنعتاں دے پیداواری عمل کوں ݙیجیٹلائز کر تے ٹیکس نیٹ وچ گھن آیا ونجے۔ وزیراعظم ریٹیل دے شعبے وچ ایف بی آر دے پوائنٹ آف سیل سسٹم دا دائرہ کار ٻیا وݙا کرݨ دی ہدایت کیتی۔ وزیراعظم وفاقی بجٹ دی منظوری تے اجلاس دے شرکاء کوں مبارخ ݙتی۔ اجلاس اچ وزیراعظم کوں ایف بی آر اچ اصلاحات دے حوالے نال اقدامات دی پیشرفت تے بریفنگ ݙتی ڳئی۔ کاروباری برادری اتے ٹیکس دہندگان کوں مکمل سہولتاں ݙیوݨ کیتے ایف بی آر سارے دروازے کھلے رکھے۔ وزیراعظم آکھیا جو ٹریک اینڈ ٹریس ڈیجیٹل پروڈکشن سسٹم کوں ہݨ تئیں کھنڈ، تمباکو اَتے فرٹیلائزر وچ مکمل طور تے نافذ کر ݙتا ڳئے اَتے سیمنٹ اَتے ٻئی صنعتاں اچ جلدی مکمل نافذ تھی ویسی۔ اجلاس اچ وفاقی وزیر اطلاعات تے نشریات عطا اللہ تارڑ، وفاقی وزیر قانون اعظم نذیر تارڑ، چیئرمین ایف بی آر اتے ٻئے سرکاری حکام شرکت کیتی۔
