اسلام آباد۔ 2 جولائی (اے پی پی) چیئرمین سینیٹ سید یوسف رضا گیلانی باجوڑ اچ پھاٹک میلہ دے نیڑے تھیوݨ آلے دھماکے دی تکڑیں لفظاں وچ مذمت کیتی، انہاں ایں المناک واقعے دے نتیجے اچ اسسٹنٹ کمشنر ناواگئی، تحصیلدار اتے ٻئی قیمتی جاناں دے ضیان تے ݙکھ اتے افسوس کیتا۔ بُدھ کوں سینیٹ سیکرٹریٹ موجب چیئرمین سینیٹ سید یوسف رضا گیلانی آکھیا جو معصوم اَتے بے گناہ شہریاں، سرکاری افسراں تے اہلکاراں کوں دہشت گردی دا نشانہ بݨاوݨ انتہائی بزدلانہ، شرمناک اتے قابل مذمت فعل اے۔ انہاں آکھیا جو ایجھے سفاکانہ حملے قوم دے حوصلے پست نئیں کر سڳدے اَتے ملک دشمن عناصر آپݨے مذموم مقصد اچ کامیاب نہ تھیسن۔ چیئرمین سینیٹ آکھیا جو ایجھے بزدلانہ حملے دے ذمہ واراں کوں قانون دی گرفت وچ گھن تے سزا ݙتی ونجے۔ انہاں آکھیا جو پوری قوم، افواج پاکستان، قانون نافذ کرݨ آلے ادارے اَتے سول انتظامیہ دہشت گردی دے خاتمے اتے ملک اچ پائیدار امن دے قیام کیتے متحد اَتے پُرعزم ہن۔ چیئرمین سینیٹ شہداء دے ٹبراں نال دلی تعزیت اتے ہمدردی کریندیں ہوئیں آکھیا جو ݙکھ دی ایں گھڑی اچ او غم زدہ ٹبراں دے ݙکھ اچ برابر دے شریک ہن۔ انہاں شہداء دی بلندی درجات اتے لواحقین کیتے صبر جمیل دی وی دعا منڳی۔ سید یوسف رضا گیلانی دھماکے اچ زخمی تھیوݨ آلے لوکاں دی جلدی صحت یابی دی وی دعا کیتی اَتے متعلقہ حکام کوں ہدایت کیتی جو زخمیاں کوں بہترین طبی سہولتاں ݙتی ونجن۔
